Փաշինյանը խաբում է հայ հանրությանը. Ղազախստանում իրական պատկերն այլ է. Տիգրան Աբրահամյան (video)

«Պատիվ Ունեմ» խմբակցության պատգամավոր Տիգրան Աբրահամյանը հունվարի 10-ին «Հայելի» ակումբում հրավիրված ասուլիսին, անդրադառնալով Հայաստանից 100 խաղաղապահ Ղազախստան ուղարկելուն, ասել է.
« Հայաստանի շտապողականությունը առհասարակ պայմանավորված էր առաջին հերթին նաև ֆորմալ առումով ՀԱՊԿ -ում որպես նախագահություն ստանձնած պետության և այս իրադարձությունները նաև որոշակի առումով համընկնում են։
Այս իրավիճակը բնականաբար չափազանց վատ դրության մեջ գցեց, հենց կոնկրետ Նիկոլ Փաշինյանին, որովհետև առաջին օրերին, երբ դեռևս ահաբեկչական վտանգ չկար Ղազախստանում, փաստացի Նիկոլ Փաշինյանը դեմ գնաց Նիկոլ Փաշինյանին և այն սկզբունքներին, որոնք նա տասնամյակներ անընդհատ  օգտագործել է»։

Բանախոսը նշեց նաև, որ Ղազախստան զորախումբ ուղարկելը ռիսկեր է պարունակում․«Ամբողջական պատկերը չկա, գնահատված չէ նաև թե ինչ ազդեցություն կունենա հայկական զորախմբի ներկայությունը Ղազախստանում և ներղազախստանյան հարաբերություններում։

Հայաստանը ունի ստանձնած պարտավորություններ ՀԱՊԿ -ում, բայց ակնհայտ է, որ իշխանությունը հանրությանը պատշաճ ձևով չի ներկայացնում իրավիճակի ողջ լրջությունն ու Ղազախստանում առկա իրական պատկերը»։

Զուգահեռներ անցկացնելով Մարտի 1-ի և Ղազախստանում տիրող դեպքերի միջև՝ Տիգրան Աբրահամյանը նշեց.

«Նիկոլ Փաշինյանը հայտարարում էր, որ Մարտի 1-ի գործը ամբողջությամբ բացահայտված է, բայց այդ իրադարձությունից 3 տարի անց բոլոր փաստերը, որոնք ներկայացնում էր այս իշխանությունը, պարզվեց, որ դուրս էին իրականությունից» ։

Եզրափակելով իր խոսքը բանախոսն ասաց, որ Նիկոլ Փաշինյանի նպատակը 2008 թվականի իրադարձություններից իրեն մաքրելն է․ «Իրականության մեջ Փաշինյանի արած քայլերը շատ ավելի վատ դրության մեջ գցեցին վերջինիս և ժամանակը բնականաբար գալու է ու Նիկոլ Փաշինյանն իր յուրաքանչյուր քայլի համար պատասխան է տալու»։

Մանրամասները՝ տեսանյութում․

Գոհար Պողոսյան