Թուրքերը բացեցին Փաշինյանի հետ հանդիպման առաջին նախապայմանը

Թուրքիայի և Հայաստանի հատուկ բանագնացներ Սերդար Քըլըչի և Ռուբեն Ռուբինյանի առաջին հանդիպումը տեղի կունենա Մոսկվայում, երեկ այս մասին հայտարարել է Թուրքիայի արտգործնախարար Մևլութ Չավուշօղլուն: «Հայաստանի հետ հարաբերությունների կարգավորման համար նշանակվել են հատուկ ներկայացուցիչներ:

Առաջին հանդիպումը կլինի Մոսկվայում: Հույս ունենք, որ Հայաստանը կգործի միջազգային իրավունքի շրջանակում»,- ասել է Չավուշօղլուն Անկարայում լրագրողների հետ զրույցում: Նա նաև հավելել է, որ առաջիկա օրերին կբացվեն Ստամբուլի և Երևանի միջև չվերթները: Նաև տեղեկություն կա, որ հանդիպումը տեղի է ունենում հայկական կողմի նախաձեռնությամբ:

Ու մինչ Փաշինյանի իշխանությունը թուրքերից հանդիպում է սպասում, թուրքերն արդեն բացահայտում են իրենց օրակարգը:

Հայ-թուրքական գործընթացը կոչնչացնի ԱՄՆ-ում հայկական սփյուռքի փաստարկները, Չիկագոյում Թուրքիայի քաղաքացիների հետ հանդիպմանն ասել է Թուրքիայի նախագահի մամուլի քարտուղար Իբրահիմ Քալինը։ Քալինն ասել է, որ ԱՄՆ-ում հայկական լոբբին հակաթուրքական տրամադրություններն իր ինքնության մաս է դարձրել: «Կովկասում հիմա բոլորովին այլ գործընթաց է իրականացվում, և այն հիմքը, որի վրա այդ սփյուռքը կառուցել է իր բոլոր փաստարկները, կործանման եզրին է։ Այսինքն՝ Հայաստանի և Թուրքիայի միջև հակամարտությունը կամ հայ-թուրքական հակամարտությունը Կովկասում մոտենում է ավարտին։ Ղարաբաղի ազատագրմամբ և այդ շրջանի` Ադրբեջանի կազմ վերաինտեգրմամբ պատմության նոր էջ է բացվել»,- ասել է Քալինը։

Նրա խոսքով` ուրիշ ոչ ոք այս առումով ուրիշ ակնկալիքներ չունի, Անկարան և Երևանը փոխադարձ քայլեր են ձեռնարկում հարաբերությունների կարգավորման ուղղությամբ։ Միաժամանակ, Թուրքիայի նախագահի մամուլի քարտուղարը նշել է, որ Հայաստանն ամենաշատը կշահի կարգավորումից. «Թուրքիայի հետ հարաբերությունների կարգավորումը մեծ ներդրում կունենա Հայաստանի համար` որպես դեպի ծով ելք չունեցող, տնտեսապես թույլ և Ռուսաստանի խնամակալության տակ գտնվող երկրի` թե՛ քաղաքական, թե՛ տնտեսական առումներով»,- ասել է Քալինը։

Բաքուն էլ իր հերթին իր օրակարգն է առաջ տանում:

Անկլավների հարցն իրականություն է, որը ոչ ոք հերքել չի կարող, երեկ տարվա ամփոփիչ մամուլի ասուլիսում ասել է Ադրբեջանի արտաքին գործերի նախարար Ջեյհուն Բայրամովը։ «Անկախ տարբեր քարտեզներին կատարվող տարբեր հղումներից՝ դեռևս խորհրդային ժամանակներում կային այնպիսի բնակավայրեր, որոնք գոյություն են ունեցել հարյուրավոր տարիներ։ Այնտեղ եղել են պետական և մասնավոր սեփականության օբյեկտներ, փաստաթղթեր։ Չի կարելի ժխտել դա։ Բայց ի՞նչ ձևով պետք է լուծվեն այդ հարցերը ներկա դարաշրջանում։ Միայն սահմանազատման ընթացքում։ Դրա համար էլ կարևոր է ստեղծել հայ-ադրբեջանական աշխատանքային խումբ, և մենք դրան պատրաստ ենք։ Մենք պետք է իրատես լինենք. պետք է կատարել համակարգված և անընդհատ աշխատանք այս ոլորտում։ Ադրբեջանը կարծում է, որ գործընթացը պետք է ընթանա բանակցությունների սեղանի շուրջ, և ոչ մի լարվածություն զինվորականների միջև չպետք է լինի»,- ամփոփել է Բայրամովը։

Անկարան Փաշինյանից պահանջելու է Ադրբեջանի տարածքային ամբողջականության ճանաչում, «Զանգեզուրի միջանցք» ու Հայոց Ցեղասպանության ուրացում, Ալիևն էլ արդեն անկլավների թեման է թեժացնում: Անկարան ու Բաքուն իրենց նախապայմաններն արդեն իսկ հրապարակավ ներկայացնում են:

Իսկ Փաշինյանը ո՞ր օրակարգով է գնում բանակցությունների Էրդողանի ու Ալիևի հետ... Դեպի ծով ելքով, ավտոճանապարհներից ու երկաթուղիներից բացվող լայն տնտեսական կապերի ամրապնդման կենացներն ու խոստումնե՞րն են նրա համար հիմք:

Իսկ Հայաստանի անվտանգության, ՀՀ քաղաքացիների անվտանգության մասին ո՞վ պետք է մտածի: Հայաստանի պետական շահը ո՞վ պետք է պաշտպանի:

Մետաքսյա Շալունց