Հայկ Մարությանի կոշտ ելույթը (video)

Այսպիսի բան անելու համար նախաձեռնողները պետք է շատ ծանրակշիռ փաստարկներ ունենային ընդդեմ քաղաքապետի, Երևանի ավագանու արտահերթ նիստում հայտարարեց քաղաքապետ Հայկ Մարությանը՝ անդրադառնալով իրեն անվստահություն հայտնողներին։

«Օրինակ՝ բյուջեի խոշոր չափերի գումարների հափշտակում, աշխատանքային կամ կենցաղային զարհուրելի հանցանք։ Ներկայացվող հիմնական պատճառը լրիվ այլ է։ Քանի որ դուրս եմ եկել ՔՊ կուսակցությունից, պետք է լքեմ նաև այս պաշտոնը», - հայտարարեց Մարությանը։

Նա հիշեցրեց՝ հեղափոխական «Իմ քայլը» դաշինքը ստեղծվելիս ավագանու առաջին 57 հոգուց միայն 27-ն էին այդ պահին «Քաղաքացիական պայմանագիր» կուսակցության անդամ։

«Սա հատկանշական տվյալ է, որն արտացոլում է մեր հեղափոխական թիմի իրական ներկապնակը», - ասաց քաղաքապետը։

Նա որպես «կարևոր նրբություն» հիշեցրեց, որ հեղափոխական թիմն ընտրությունների չգնաց «Քաղաքացիական պայմանագիր» կուսակցության դրոշի ներքո.

«Ոչ միայն նրա համար, որ հեղափոխությունն արեց ամբողջ ժողովուրդը, այլ նրա համար, որ ուղղակի «Քաղաքացիական պայմանագիր» անունն այդ ժամանակ լայն զանգվածներին գրեթե ծանոթ չէր։ Եկեք արձանագրենք, որ 2018 թվականի Երևանի քաղաքապետի ընտրությունների ժամանակ ժողովուրդն ընտրեց «Իմ քայլը» հեղափոխական դաշինքը։ Այսօր այս պրոցեսը նախաձեռնող խումբը որպես անվստահության հիմք ասում է՝ քանի որ ես դուրս եմ եկել «Քաղաքացիական պայմանագիր» կուսակցությունից և դուրս եմ եկել «Իմ քայլը» դաշինքից, ապա չեմ կարող լինել քաղաքապետ։

Սիրելի հայրենակիցներ, պաշտոնապես ասում եմ՝ ես դուրս եմ եկել ՔՊ կուսակցությունից, բայց դուրս չեմ եկել «Իմ քայլը» դաշինքից։ Շարունակում եմ մնալ «Իմ քայլը» խմբակցության անդամ և նախաձեռնող խմբի այս պնդումն ուղղակի կեղծիք է»։

Մարությանն ասաց, թե ավագանու անդամները, հիշատակելով «Քաղաքացիական պայմանագիր» կուսակցության անունը, այդ մարդիկ փորձում են սեփականաշնորհել հեղափոխությունը։

Նա ասաց, թե այս օրերին նախաձեռնության հեղինակները և նրանց կուսակցության ընկերներն ասում են, թե Հայկ Մարությանը շեղվել է հեղափոխական արժեքներից.

«Հիմա տեսնենք, թե ով է իրականում շեղվել հեղափոխական արժեքներից:

2018-ի արտահերթ ընտրություններից հետո սկսեցինք աշխատել և հանկարծ մի օր իմացանք, որ կառավարության հեղափոխական անդամները գաղտնի որոշմամբ կտրուկ բարձրացրել են իրենց աշխատավարձերը, օրինակ՝ նախարարները 1.5 միլիոն դրամ են ստանում, խոսքը մաքուր գումարի մասին է, փոխնախարարները 1 միլիոն դրամ են ստանում՝ գաղտնի որոշմամբ։ Հեղափոխական նախարարները։

Ես չեմ խոսում պետական համակարգի, այսպես կոչված, տեխնոկրատ անդամների մասին, որոնք անկախ ամեն ինչից պրոֆեսիոնալներ են և իրենց աշխատանքի համար պետք է գնահատվեն։ Ես խոսում եմ գաղափարական, հեղափոխականների մասին, հեղափոխությանը մասնակցած և հեղափոխության շնորհիվ պաշտոն ստացած մարդկանց մասին։

Ես կարծում էի, թե հեղափոխականի գերնպատակը պետք է լինի բարելավվել ուրիշների կյանքը, բայց իրականության մեջ նրանք եկան ու անմիջապես սկսեցին բարելավել իրենց կյանքը, այն դեպքում, երբ երկրում բնակչության աղքատության ցուցանիշը շարունակում էր տատանվել 30 տոկոսի սահմաններում։ Կասեք՝ ինչու չէիր շուտ խոսում սրա մասին։

Ուրեմն բազմիցս այդ հարցը բարձրացրել եմ ՔՊ-ում, թիմի ներսում, տարբեր մակարդակներում, ոչ մի արձագանք», - հայտարարեց Հայկ Մարությանը: