Ու՞մ գիրկն եք գցվում, ով ուզում է քեզ մորթե՞լ. Արծվիկ Մինասյան (video)
Պատմությունը ցույց է տվել՝ երբ մարդիկ արհամարհում են ժողովրդի ցանկությունը, նպատակը, ազգին բերում են կործանման եզրին, Ազգային ժողովում լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը։
«Շատ ակնհայտ է, որ Թուրքիան ու Ադրբեջանն այսօր թուլացած Հայաստանից, իրենց շահերը սպասարկող իշխանություններից ցանկանում են պոկել ամեն ինչ, այս վտանգավոր միտումը տանելու է մեր պետականության վերջնական կործանման», - ասաց նա։
Ըստ Մինասյանի՝ կամ իշխանությունը չի գիտակցում, կամ էլ հատուկ է անում, որ Հայաստանն անընդհատ հայտնվի թուրք-ադրբեջանական ճիրաններում։
Անդրադառնալով թեմային, որ Հայաստանը Թուրքիայի հետ առանց նախապայմանների հարաբերությունների կարգավորման երկխոսության համար հատուկ ներկայացուցիչ կնշանակի՝ Մինասյանն ասաց, թե սա Հայաստանի ազգային նպատակներին չի ծառայելու։
Հարցին՝ Դաշնակցությունը դե՞մ է, որ Հայաստանն ու Թուրքիան փորձեն բարիդրացիական հարաբերություններ կառուցել, Մինասյանն արձագանքեց. «Եթե խոսքը գնում է առանց նախապայմանների հարաբերությունների հաստատման մասին, մենք բացմիցս ենք ասել՝ այո, բայց երբ ասում եք բարիդրացիություն, ո՞ւմ հետ բարիդրացիություն, մի պետության, որն ուզում է ոչնչացնել քեզ, դրա հետ ի՞նչ բարիդրացիություն»։
Հետևեք մեզ Viber-ում
