Փաշինյանը կհեռանա՞ իր կաբինետից

36 խոշորացված համայնքներում դեկտեմբերի 5-ին տեղական ինքնակառավարման մարմինների ընտրություններ են։ Իշխող «Քաղաքացիական պայմանագիր» կուսակցությունը բոլոր տեղերում պայքարում է համայնքապետի պաշտոնի համար։
Ավագանու ընտրություններ են Արարատի, Արագածոտնի, Արմավիրի, Գեղարքունիքի, Լոռու, Վայոց ձորի, Շիրակի, Կոտայքի խոշոր համայնքներում։ Չնայած երեք տարի շարունակ Նիկոլ Փաշինյանը իր լսարանին կերակրում է նախկին «թալանչիների» մասին անապացույց կոռուպցիոն պատմություններով, սակայն այս ընտրություններում չկա մի այնպիսի համայնք, որտեղ Նիկոլ Փաշինյանի հույսը հենց այդ «թալանչիները» չեն, նախկինների մի մասն ընդգրկված են ՔՊ ցուցակներում, մյուսները պարզապես աջակցում են, քիչ չեն համայնքներն էլ, որտեղ ՔՊ ցուցակը գլխավորում են ՀՀԿ- ի առաջադրած կադրերը:

Ապարանում ՔՊ ցուցակը գլխավորում է Էդգար Փարվանյանը, որ 2016-ին առաջադրվել էր եւ հայտարարում էր՝ ունի Սերժ Սարգսյանի աջակցությունը, Աշտարակում՝ Թովմաս Շահվերդյանը՝ կրկին նախկին ՀՀԿ-ական, ավելին՝ հունիսի 20-ի խորհրդարանական ընտրություններին Շահվերդյանն աշխատում էր Հայաստան դաշինքի օգտին, հիմա ՔՊ ցուցակն է գլխավորում:

Մեծամորում իշխանության ավագանու ցուցակը առաջնորդում է Վահրամ Խաչատրյանը, որը 2016-ին Նորապատ համայնքի ղեկավար ընտրվեց որպես ՀՀԿ-ական։ Սերժ Սարգսյանի հրաժարականից հետո լքեց կուսակցությունը։
Մարտունիում ՔՊ-ի ցուցակը գլխավորում է Վարդենիկի երկարամյա գյուղապետ, նախկին ՀՀԿ-ական Հովհաննես Հովեյանը։ Սևանում Փաշինյանի թիմը սատարում է Սարգիս Մուրադյանին, որին նախորդ անգամ Սերժ Սարգսյանի թիմն էր սատարում։ Ջերմուկում էլ ՔՊ-ի ցուցակի առաջին համարը Հանրապետական, գործարար, նախկին պատգամավոր Աշոտ Արսենյանի որդին է՝ Վահագն Արսենյանը, Մասիսում՝ Սայեն Հայրապետյանը՝ Սայադը, որը եւ ՀՀԿ-ի աջակիցն էր, եւ ԲՀԿ-ի: Եւ այսպես բազմաթիվ այլ համայնքներում:

Դեռեւս 2020 թվականի իր ասուլիսում Նիկոլ Փաշինյանը մեծամեծ հայտարարում էր. «Չեմ կարծում որ նախկիններին նմանվում եմ, որովհետև եթե ես նախկիններին նմանվեմ կամ զգամ, որ նմանվում եմ, նույն պահին կհեռանամ այս կաբինետից, որովհետև դա ինձ համար կլինի բարոյական վերջ, ավարտ, որը ես թույլ չեմ տա»,- հայտարարեց վարչապետ Նիկոլ Փաշինյանը՝ անդրադառնալով հարցին, թե արդյոք չի՞ նմանվում նախկիններին, երբ պետական կառավարման ապարատը լցված է նախկիններով, իսկ նորերը ծանոթ-բարեկամ սկզբունքով են ընդունվում։ Հիմա ոչ թե նմանվում է, այլ ինքը թիվ մեկ նախկինն է, որի իշխանության վերարդատրունը դրված է նախկինների վրա:

Անի Սահակյան