Մասկի շոու. Zorro-ի արկածները Երեւանում

Մինչ Վարդենիսում եւ Հայաստանի այլ տարածքներում թուրքը սրընթաց առաջ է գալիս ու հիմնավորվում մեր սուվերեն տարածքներում, Վարդենիսի քաղաքապետ, ՔՊ-ական Արամ Մմելքոնյանը Երեւանի կենտրոնում դիանագրիգորյանական մոտիվներով փիառ ներկայացում է նկարահանում առաջիկա ՏԻՄ ընտրություններին ընդառաջ:

Առավոտյան ԶԼՄ-ներով տեղեկություն տարածվեց, որ 38-ամյա տղամարդը, Արտակ Ս-ն, «Հաղթանակ» կամրջի վրա անցել է վտանգավոր եզրագիծն ու սպառնում է ինքնասպան լինել։ Ոստիկանները, ԱԻՆ աշխատողները, նույնիսկ հոգեբան շտապեցին դեպքի վայր, բայց ոչ ոք չկարողացավ նրան համոզել, որ կյանքին վերջ չտա, ու միայն քաղաքապետ Արամ Մելքոնյանը, որը պատահաբար Վարդենիսից եկել-հասել էր Երեւան, անցավ կամրջի կողքով, տեսավ իր համերկրացուն, իջավ ու համոզեց նրան փոխել որոշումը։
Ավելի ուշ պարզ դարձավ, որ Արտակ Ս-ն, Վարդենիսի Փամբակ գյուղից է։ Փամբակը քաղաքապետ Արամ Մելքոնյանի հարազատ Արեգունի գյուղի հարևան համայնքն է։ Լրատվամիջոցներում հայտվեց տեղեկություն, որ Արամ Մելքոնյանը գլխավոր դերակատարին՝ քցվողին իր մեքենայով անձամբ է բերել Վարդենիսից, որ մայրաքաղաքի կենտրոնում մի սիրուն փիառ ակցիա անի ու նկարի: Իհարկե, նա հերքել է, թե կատարվածը կազմակերպված էր, ասել, որ ինքը պատահաբար անցնելիս է եղել ու նկատել, հանրությունը վաղուց է ծանոթ ինքնասպանությունը կանխելու փորձերի վրա կառուցված PR քաղտեխնոլոգիայի զինանոցին, անգամ Հայաստանում դա նոր բան չէ եւ հեղափոխական քաղաքապետը ժողովրդին չի կարող իր սրամտությամբ զարմացնել: Դեռեւս 2013-ին ԱԻՆ ղեկավար, երջանկահիշատակ գեներալ Արմեն Երիիցյանն էր նման կինո նկարահանում, դեմքը հետաքրքրասերների հայացքներից ինչ-որ լաթով թաքցրած մի «ինքնասպանի» անհրաժեշտ պահին Դավիթաշենի կամրջի վրա նա փրկել էր. ինչպես գրում-հավատացնում էր ժամանակի մամուլը՝ հանուն ինքնաPR-ի:
Գեներալ Երիցյանն ի՜նչ իմանար, որ տարիներ անց իր ոտնահետքերով անցնելու են շատերը, հիշում եք՝ ՀՀ ոստիկանապետի պաշտոնակատար Արման Սարգսյանի «մարդասիրական» քայլը, «Էրեբունի պլազա» մտած ահաբեկչին հարգանքով-պատվով նստեցրեց իր ծառայողական մեքենան ու տեղափոխեց ոստիկանություն, անգամ Փաշինյանը «ինքնասպանին» նստեցրեց ծառայողական ավտոմեքենան ու տարավ անհայտ ուղղությամբ:
Եթե այս պաշտոնյաների բեմադրությունն այդ ժամանակամիջոցում կարելի էր ինչ-որ կերպ ընկալել, հասկանալ, որ փիառի խնդիր են լուծում, ապա հիմա Վարդենիսի քաղաքապետի ձեռամբ նոր «մասկի շոու»-ն բանական մարդու ուղեղում չի տեղավորվում: Հա, ի դեպ, մոռացանք ասել, որ կամրջից «քցվողը» դիմակով էր:
Իսկ մեր օրերում, երբ երկրի գլխին դամոկլյան սրի պես կախված է պատերազմի վտանգը, երբ թուրքը նստել է մեր սահմաններում, նման էժանագին ակցիաներով, սուպերհերոս խաղալով ոչ մեկին չես զարմացնի: Ավելին, ինչ կարգի հայրենազուրկ մարդ պետք է լինի, որ այս օրերին մտածի նման էժանագին սյուժեներ բեմադրելու մասին: Ամենամեծ փիառ ակցիան եթե կուզեն իշխանական մանր ու միջին չինովնիկներ, թող իմանան, որ հայ ժողովրդին Նիկոլից ազատելն է, այ երբ ինչ-որ մեկը կկարողանա դա անել ոչ թե շարքային համայնքապետի, այլ վարչապետի աթոռին կհասնի:

Անի Սահակյան