Նիկոլ Փաշինյանի «բայղուշը»
Հայաստանն ունի այլընտրանքային ճանապարհ, եւ Գորիս-Կապան ավտոճանապարհն օգտագործելու տրամաբանություն չկա: Հանրային հեռուստաընկերության եթերում նման հայտարարություն է արել ԱԽ քարտուղար Արմեն Գրիգորյանը՝ անդրադառնալով հարցին, թե Սյունիքի մարզի Գորիս-Կապան ավտոճանապարհին ադրբեջանական մաքսակետերի տեղադրումն ինչ ազդեցություն կարող է ունենալ բեռնափոխադրումների և այլ խնդիրների վրա:
Ըստ Արմեն Գրիգորյանի՝ ադրբեջանական կողմը Հայաստանին դեռ պետք է իրազեկի, թե ինչ գործընթաց է պահանջվում այդ ճանապարհից օգտվելու համար։
«Ադրբեջանական կողմը մեզ դեռ ամբողջապես չի տեղեկացրել՝ ինչ է դա ենթադրում, բայց տրամաբանությունը կարող է ենթադրել որոշակի վճարների գանձում ճանապարհից օգտվելու համար, բնականաբար նաեւ՝ անձնագրերի ստուգում»,- ասել է Արմեն Գրիգորյանը: Նրա խոսքով՝ հայկական կողմը արդբեջանական կողմի քաղաքականությանը պատասխան քաղաքականություն է վարելու՝ մաքսակետեր տեղակայելով ճանապարհի մեր հատվածում։
<<Ադրբեջանցիներն օգտվելո՞ւ են այդ ճանապարհից, որ մենք էլ մաքսակետ տեղադրանք>> հարցին Արմեն Գրիգորյանը ջախջախիչ պատասխան է տվել՝ նշելով, որ տրամաբանական չէ, որ ադրբեջանցիներն կօգտվեն ճանապարհի հայկական հատվածից։ Ըստ նրա՝ նույն կերպ նաև տրամաբանական չէ, որ հայկական կողմը օգտվի ճանապարհի ադրբեջանական հատվածից, քանի որ կա Տաթև-Աղվանի ճանապարհը ։ <<Բայց կարող է ադրբեջանցիները, օրինակ, Սանասարից Էյվազլի գնալու համար այդ ճանապարհից օգտվեն, իսկ դրա մի մասը նաեւ ՀՀ տարածքով է անցնում, եւ այդ հատվածից օգտվելու դեպքում մենք նույնպես մաքսային հսկողություն կիրականացնենք ու մաքսային վճար կգանձենք Ադրբեջանի քաղաքացիներից>>,- պատկերավոր բացատրել է ԱԽ քարտուղարը։
Այնպիսի տպավորություն է, թե Արմեն Գրիգորյանի պաշտոնական գործառույթների մեջ բայղուշությամբ զբաղվելու և սև թուղ բերելու մասին կետեր կան։ Անգամ սովորական բայղուշները, ի տարբերություն Արմեն Գրիգորյանի, հասկանում են, Տաթևի ճանապրհով Գորիսից Կապան հասնելը առնվազն 20 կմ-ով ավելի երկար է, ավելին ձմռանը Տաթևի ճանապարհը հաճախ անանցանելի է դառնում։ Ի դեպ, հենց այն պահին, երբ Արմեն Գրիգորյանը հանրայինի եթերում վերը նշված դարակազմիկ հայտարարությունն էր անում, Տաթևի ճանապարհին մեծ խցանում էր առաջացել՝ առաջին ձյան պատճառով։ Էլ չենք խոսում այն մասին, որ Որոտան, Շուռնուխ, Բարձրավան և այլ գյուղերը փաստացի մնացել են շրջափակման մեջ և Գորիս հասնելու համար պետք է մեծ շրջապտույտ կատարեն։ Այս խնդրին մանրամասն անդրադարձել է ՀՀ մարդու իրավունքների պաշտպան Արման Թաթոյանը՝ նշելով, որ նշված բնակավայրերում արդեն իսկ առաջ են եկել սննդամթերքի (հաց և այլ պարենային ապրանքներ) ու առաջին անհրաժեշտության ապրանքների, բժշկական օգնության և սպասարկման հասանելիության լուրջ սահմանափակումներ՝ մարդկանց կանգնեցնելով հումանիտար ճգնաժամի իրական վտանգի առաջ:
Օրինակ՝ Գորիս համայնքի Որոտան, Շուռնուխ և Բարձրավան գյուղերում մեծ դժվարությամբ է կազմակերպվել հացի մատակարարումը: Այս գյուղերում երեխաներն ու ուսուցիչները չեն կարողացել անգամ դպրոց հասնել։
Իսկ ադրբեջանական կողմը, այո, կարիք չունի օգտվելու առավել ևս մաքս վճարելու ճանապարհի այն հատվածի համար, որը դեռևս հայկական տիրապետության տակ է։
Հայկ Դավթյան
Հետևեք մեզ Viber-ում
