Փաշինյանը որոշել է «տոկոս առ տոկոս» հանձնել Հայաստան

Նոյեմբերի 10-ին լուրեր տարածվեցին, որ վիճակն անհանգիստ է Սյունիքի մարզի Սեւ լճի տարածքում:
Հիշեցնենք` ադրբեջանցի զինվորականները մայիսի 12-ից Սյունիքի մարզում գտնվող Սև լճի տարածքում են և բավականին լավ ամրապնդվել են այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի եւ չի էլ ունենա: Ճիշտ հակատակը նոյեմբերի 10-ի լուրերն այն մասին են, որ 60 հայ զինվորների ադրբեջանցիները շրջափակել են եւ փորձում են առաջ ընթանալ, տեղի է ունեցել քաշքշուկ, ծեծռտուք: Իհարկե, ՀՀ ՊՆ-ն շտապեց հերքել այդ լուրերը, սակայն եթե կա որեւէ մեկը, ով լուրջ է ընդունում Փաշինյանի եւ իրեն ենթակա գերատսչությունների հերքումները, ապա դա իր խնդիրն է, քանզի ընդամենը երկու ամիս առաջ Նիկոլ Փաշինյանը խորհրդարանի ամբիոնից վստահեցնում էր, թե Գորիս-Կապան ավտոճանապարհը հայկական կողմի համար անարգել կիրառվելու է, իսկ այսօր ԱԽՔ-ը տեղեկացնում է, թե ադրբեջանական կողմը մաքսակետ է դնում.«Այսօր ադրբեջանական որոշ լրատվամիջոցներ տեղեկություն էին տարածել, թե իբր Սյունիքի Սև լճի տարածքում ծեծկռտուք է տեղի ունեցել հայ և ադրբեջանցի զինվորականների միջև, և որ հայ զինծառայողներ հայտնվել են շրջափակման մեջ։ Այս ապատեղեկատվությանը միացել է նաև Ադրբեջանի ՊՆ–ն` հայտարարելով, թե 60 հայ զինվոր հայտնվել է շրջափակման մեջ, և միայն ռուսական կողմի միջնորդությամբ են ազատ արձակվել։ Սա բացահայտ ապատեղեկատվություն է»,–նշված է Հայաստանի պաշտպանության նախարարության հաղորդագրության մեջ։
Հայաստանի պաշտպանական գերատեսչությունը հայտնում է նաև, որ ադրբեջանական կողմի` ռուսական կողմին դիմելուց հետո հենց վերջիններիս ակտիվ աշխատանքի շնորհիվ է հաջողվել կայունացնել իրադրությունը։ ՀՀ պաշտպանության նախարարությունը վերահաստատում է, որ իրադրությունը Սև լճի տարածքում գտնվում է ՀՀ ԶՈւ լիարժեք վերահսկողության ներքո։
Փաստորեն՝ մի կողմից հայտարարում են, թե ապատեղեկատվություն է, մյուս կողմից՝ նշում, որ ռուսական կողմին դիմելուց հետո խնդիրը հարթվել է: Իրականում միանգամայն սպասելի է, որ ադրբեջանական կողմը Սեւ լճի տարածքում նոր տարածքներ նվաճելու հավակնություններ է դրսեւորելու: Նիկոլ Փաշինյանը ընտրություններից առաջ շատ հստակ հայտարարեց, որ Հայաստանը Սեւ լճի 30 տոկոսի համար չի պատրաստվում պատերազմել, այսինքն ըստ էության լեգիտիմացրեց ադրբեջանցիների մուտքը եւ հետագա գործողությունները լճի տարածքում: Այս մարդը, որ երեք տարի շարունակ թատրոն է բեմադրում, թե Հայաստանից թալանածը կոպեկ առ կոպեկ, լումա առ լումա վերադարձնելու են ժողովրդին, իրականում Հայաստանի տարածքն է տոկոս առ տոկոս հանձնում իր սիրելի Ալիեւին, այնպես որ չի բացառվում, որ վաղը հայտնի դառնա Սեւ լճի ոչ թե 30, այլ 60, ապա ամբողջն է ադրբեջանցիների տիրապետության տակ:

Անի Սահակյան