Նրանց ապագան խոպան գնալն է

Ռուսաստանի պետական վիճակագրության տվյալներով՝ Հայաստանը 2021 թվականին միգրանտների ներհոսքի առումով առաջատար երկրների եռյակում է։ 2021 թվականի հունվար-հուլիս ամիսներին Հայաստանից Ռուսաստան է ժամանել 20 հազար միգրանտ, որոնք այդ երկիր են գնացել հիմնականում աշխատելու նպատակով։ Այս ընթացքում Ռուսաստանից Հայաստան է փոխանցվել 281 մլն դոլար գումար։

Ռուսաստան գնացող աշխատանքային միգրանտների առումով առաջատարը Տաջիկստանն է, որտեղից այս տարի ՌԴ է մեկնել 38 հազար միգրանտ։ Երկրորդ տեղում Ուկրաինան է, որտեղից Ռուսաստան է մեկնել 26 հազար միգրանտ։ Սակայն եթե Ռուսաստան մեկնող միգրանտների թիվը գնահատելու լինենք ըստ տվյալ երկրի բնակչության թվի, ապա տոկոսային հարաբերությամբ Հայաստանը կարող է դառնալ բացարձակ առաջատար։

Չնայած այն փաստին, որ Նիկոլ Փաշինյանն անընդհատ խոսում է Հայաստանում օրեցօր աճող աշխատատեղերի աննախադեպ թվի մասին, Հայասատանի քաղաքացիները, ինչպես նախկինում, այնպես էլ այժմ շարունակում են աշխատանք փնտրել Ռուսաստանում։ Օրինակ՝ 2021 թվականի հուլիսին Փաշինյանը կառավարության նիստում հայտարարեց, որ գրանցված վարձատրվող աշխատատեղերի ռեկորդ ենք սահմանել։ Այդ թիվը հուլիսին, ըստ Նիկոլ Փաշինյանի, հասել է 643 000–ի, որը աննախադեպ բարձր ցուցանիշ է։ <<Համեմատության համար պետք է ընդգծել, որ այն 34 000-ով ավել է 2020 թվականի, 38000-ով՝ 2019 թվականի, 80 000-ով՝ 2018 թվականի ցուցանիշներից>>,- այն ժամանակ հայտարարեց վարչապետը։

Նա նաև բազմիցս հրապարակավ պնդել է, թե Հայաստանում կան ազատ աշխատատեղեր, սակայն չկան աշխատողներ։ Իրականում, սակայն, հարկային վարչարարության շնորհիվ հնարավոր է եղել նախկինում գոյություն ունեցող չգրանցված աշխատատեղերը դարձնել գրանցված և կուրծք ծեծել աննախադեպ թվով աշխատատեղերի մասին։ Մինչդեռ կյանքը ցույց է տալիս, որ խոպանչիների թիվը բացարձակ չի նվազել․ մարդիկ շարունակում են օրվա հացի համար լքել երկիրը, հեռանալ ընտանիքից։ Ռուսաստան մեկնող խոպանչիների համար ևս կա ապագա, և դա, ինչպես նախկինում, այնպես էլ հիմա սեզոնային աշխատանքն է, որն ի վերջո ավարտվում է ընտանիքով երկիրը լքելուն։

Վերադառնալով միգրանտների թեմային․ 2021 թվականի արդյունքներով՝ ՌԴ-ում միգրանտների աճը կարող է ռեկորդային լինել վերջին 25 տարվա ընթացքում ՝ հասնելով 398 հազարի։ Ռուսաստանում աշխատանքային միգրանտների ամենամեծ թիվը գրանցվել է 1996 թվականին, երբ միգրանտների թիվը հատել է 400 հազար մարդու սահմանը։

Հայկ Դավթյան