Նիկոլ Փաշինյանի բաց խաղը՝ հայկական տարածքների հանձնումը միակ բանաձև
Նիկոլ Փաշինյանը Ազգային ժողովում հայտարարել է, որ Սյունիքում զորքերի հետքաշման հրամանը, որը տեղի է ունեցել 2020 թվականի դեկտեմբերին, տվել է ինքը, իրականացրել է Պաշտպանության նախկին նախարար Վաղարշակ Հարությունյանը:
«Այդ որոշումը կայացվել է ստրատեգիական նշանակության ճանապարհն առնվազն ինչ-որ ժամանակ չկորցնելու նկատառումով»,- իր այդ քայլը այսկերպ է հիմնավորել վարչապետը և շեշտել, որ դա արվել է Սյունիքում հնարավոր էսկալացիայի կանխման նպատակով։
Փաշինյանը մի քա նի անգամ շեշտել է, որ Սյունիքի հարցով միանձնյա պատասխանատուն ինքն է: «Այդ որոշումը կայացվել է պատերազմից խուսափելու համար, որովհետև իմ համոզմունքն այն էր, որ եթե այդ որոշումը չկայացվեր, այնտեղ ռազմական գործողություններ էին սկսելու ու, իրոք, Սյունիքում մենք ունենալու էինք խնդիրներ: Ես հարյուր անգամ ասել ենք՝ մենք տասնյակ կիլոմետրեր առաջ էինք կանգնած, ցավոք սրտի եկել հասել ենք այդտեղ: Այդ որոշումը կայացվել է նաև այն տրամաբանությամբ, որ բանակցային քննարկումների ընթացքում եղել է ըմբռնում, որ յոթ շրջանը, այո, պետք է հանձնենք: Այդ տարածքները հանձնվել են յոթ շրջանների մաս լինելու բերումով»,- նշել է նա։
Անդրադառնալով հարցին, թե նման որոշում կայացնելիս արդյոք եղե՞լ է որևէ քննարկում, Փաշինյանը ասել է, թե մի քանի քննարկումներ են եղել․ «Հինգ-վեց անգամ քննարկում է եղել, բանակցութուն է եղել, մեկնում է եղել, պայմանավորվածություն է եղել, գրավոր պայմանավորվածություն է եղել: ԱԽ նիստ չի եղել, բայց ԱԽ բոլոր անդամները, Սյունիքի մարզպետը, ԱԳ նախարարը, որ ասում էր՝ մենք տեղյակ չենք, նախարարի տեղակալը, որովհետև հետո ինքը գործուղման էր, մասնակցել են այդ քննարկմանը: Այդ քննարկումը տեղի է ունեցել կառավարությունում, և որոշում է կայացվել», - հայտարարել է Փաշինյանը և կոչ արել ընդդիմությանը՝ կողմնորոշվել, թե ո՞րն է՝ Հայաստանը։
Նա նաև առաջարկել է ընդդիմությանը հայտարարել, որ իրենք իշխանության գալու պարագայում Հայաստանի ստորագրությունը հանելու են նոյեմբերի 9-ի հայտարարության տակից: Դեմագոգիայի և էժան պոպուլիզմի գործելաոճը Նիկոլ Փաշինյանի համար արդեն վաղուց է դարձել պետական քաղաքականության մաս։ Չկա պետական ռազմավարություն, թե դեռ ինչքան ենք հետքաշվելու և թշնամուն տարածք զիջելու պատերազմից խուսափելու անվան տակ։ Ադրբեջանը գնալով ավելին է պահանջում։ Սյունիքն ամբողջությամբ վերցնելու խնդիր է դրված՝ միջանցքի անվան տակ։ Մենք արդեն նրանց ենք տվել Գորիս-Կապան միջպետական ճանապարհը։ Ո՞րն է հետագա պահանջներին դիմակայելու մեր պետական ռազմավարությունը, թե՞ Փաշինյանը պատրաստվում է Ալիևի բոլոր պահանջները կատարել՝ հիմնավորելով, թե չանելու դեպքում նոր պատերազմ կսկսվի։
Պատերազմը կանխելու Փաշինյանի իմացած ու կիրառած միակ բանաձևը հայկական տարածքների հանձնումն է։ Որտե՞ղ են դիվանագիտությունն ու բանակցությունները, ո՞րն է անվտանգության մեր դոկտրինի առանցքը խայտառակ պարտությունից մեկ տարի անց։ Այս հարցերի մասին ԱԺ բարձր ամբիոնից որևէ հայտարարություն չի հնչել, որովհետև այդ հարցերը բաց են։ Իշխանությունների օրակարգում, բացի կոմունիկացիաները բացելու, տարածքները հանձնելու հարցերից, այլ կետեր չկան։
Հայկ Դավթյան
Հետևեք մեզ Viber-ում
