Ներիշխանական բազառ. ինչ է խոստացել Փաշինյանն Ավինյանին

Հոկտեմբերի 17-ին Հայաստանի մի շարք համայնքներում ՏԻՄ ընտրություններ են, մասնավորապես, Սյունիքի համայնքներում իշխանությունը կենաց-մահու պայքար է տանում իշխանությունը վերցնելու եւ Սյունիքը զավթելու համար: Հասկանալի է, որ մարզն այժմ առավել քան ստրատեգիական նշանակություն ունի եւ իշխանությունների համար հույժ կարեւոր է, որ իրենց լիակատար իշխանությունը հաստատվի եւ Սյունիքը սակարկելիս խոչընդոտների չհանդիպի: Շուրջ մեկ ամիս շարունակ մենք լսում ենք, թե ինչպես է իշխանությունն այստեղ կենտրոնացրել ողջ ներուժը: ԱԺ պատգամավորներից մի քանիսը, առանցքային ՔՊ-ականները դուրս չեն գալիս Սյունիքից, իսկ Նիկոլ Փաշինյանը պետական բյուջեից օրերս մեկ միլիարդ դրամ հատկացրեց, որը սոցիալական օգնության անվան տակ ընտրակաշառք կբաժանվի սյունեցիներին:

Մենք լսում ենք, թե ինչպես է մարզպետը վարչական լծակները գործադրում հանուն իշխանական թեկնածուների հաղթանակի, սպառնում են պետական եւ մասնավոր հաստատությունների աշխատակազմերին ներկա գտնվել թեկնածուների քարոզարշավին, ապաեւ ընտրել նրանց: Եւ չնայած գործադրված ջանքերի Գորիսում իշխանության քարոզարշավի եզրափակումը խայտառակ պատկեր ուներ: Գգորիսի կենտրոնական հրապարակում առավելագույն հարյուր մարդ էր հավաքվել ՔՊ թեկնածու Վլադիմիր Աբունցի հանրահավաքին: Մի քանի տասնյակը Երեւանից ժամանած իշխանականներն էին՝ պատգամավորներ եւ առհասարակ իշխանության տարբեր ներկայացուցիչներ: Թեեւ ՔՊ խմբակցության ղեկավար, ճամբարափոխ Հայկ Կոնջորյանը Նիկոլ Փաշինյանի ոճում ելույթ ունեցավ, անգամ լեքսիկոնը, բառերն էին նույնը, բայց դա հավելյալ զանգված չհավաքեզ հրապարակում: Քանզի ակնհայտ է, որ ի տարբերություն ՀՀ այլ մարզերի, սյունեցին հասկացել է, թե ինչ աղետ է բերել այս իշխանությունն իր գլխին եւ նրա մնալը ինչի կարող է հանգեցնել: Ինչ վերաբերում է խորհրդարանական ընտրություններին մարզում իբր ՔՊ հաղթանակին, ապա սրա մասին մեկ անգամ չէ, որ խոսել ենք: Բանակը քվարկել է Սյունիքում , բացի դա իշխանությունն այստեղ մասսայական լցոնումներ է կատարել, սակայն ամեն բան դեռ կորած չէ, համայնքային ընտրությունները հեշտ չի լինելու կեղծել, եթե սյունեցին մինչեւ վերջ պայքարի իր քվեի համար, անշուշտ, հասկանալի է, որ իշխանության հույսը կեղծելն է, հակառակ դեպքում ազատության մեջ կթողնեին հիմնական մրցակից Առուշ Առուշանյանին, ով կմոբիլիզացներ ամբողջ ուժերը եւ կփորձեր կանխել, վերահսկել իրավիճակը:

Ինչեւէ, ՔՊ եզրափակիչ հանրահավաքին հատկապես ուշագրավ էր նախկին փոխվարչապետ Տիգրան Ավինյանի հայտնությունն ու ելույթը: Խնդիրն այն է, որ խորհրդարանական ընտրություններին Ավինյանը չընդգրկվեց խորհրդարանի ցուցակում, ապա հարցազրույց տվեց եւ մոտավորապես ասաց, որ ինքը չի կարող լինել մի իխանության հետ, որտեղ բիզնեսը քաղաքականությանն է սերտաճում, ակնարկը ՔՊ ցուցակում, իսկ այսօր արդեն խորհրդարանում հայտնված հայտնի գործարարին էր ուղղված, որն ըստ լուրերի պետք է գործադիր տեղափոխվեր, նշանակվեր փոխվարչապետ, կամ էլ Երեւանի քաղաքապետ:

Վերջին ժամանակներում մամուլում տեղեկություններ հայտնվեցին, որ Ավինյանը եւս հավակնում է քաղաքապետի պաշտոնին: Հիմա վերջինիս՝ իշխանության հետ մնալը առնվազն տարօրինակ է այն առումով, որ հայտնի գործարարը խորհրդարանում է, կնշանակի Ավինյանը Նիկոլ Փաշինյանից ինչ-որ բան է պոկել՝ ընտրություններից առաջ նրան ընդդիմանալով, ըստ ամենայնի Փաշինյանը որոշել է հենց նրան նշանակել քաղաքապետի պաշտոնում , այդ պատճառով էլ նա չի խզել կապը կուսակցության հետ, ավելին, հիմա էլ ակտիվ ներգրավված է ՏԻՄ ընտրապայքարին:

Անի Սահակյան