ԱԱԾ-ն գործի է անցել. Փաշինյանի հրահանգի հետքերով

Մեկ շաբաթ էլ չի անցել կառավարության այն նիստից, որի ժամանակ վարչապետ Նիկոլ
Փաշինյանը հանդիմանեց առողջապահության նախարար Անահիտ Ավանեսյանին եւ
իրավապահ կառույցներին հրահանգ տվեց գտնել եւ պատժել հակապատվաստումային
քարոզ իրականացնողներին, եւ ահա, ԱԱԾ-ն հայտում է, որ Շիրակի
մարզպետարանի ենթակայությամբ գործող «Գյումրիի Վ.Աբաջյանի անվան ընտանեկան
բժշկության կենտրոն» պոլիկլինիկա ՓԲ ընկերության մի խումբ
բուժաշխատակիցներ, շահադիտական շահագրգռվածությունից ելնելով, իրենց
պաշտոնեական դիրքը ծառայության շահերին հակառակ են օգտագործել, այն է՝ 2021
թվականի ապրիլ ամսից մինչև օրս ընկած ժամանակահատվածում նույն բժշկական
հաստատությունում փաստաթղթերով ձևակերպված և ինչպես Շիրակի մարզում, այնպես
էլ Հայաստանի Հանրապետության այլ տարածքներում բնակվող ավելի քան 700
քաղաքացիների փաստացի չեն պատվաստել սահմանված դեղատեսակներով և
դեղաչափերով, փոխարենը` կազմել և հաստատել են կորոնավիրուսային
հիվանդության (COVID-19) դեմ ամբողջական պատվաստված լինելը հավաստող,
իրականությանը չհամապատասխանող փաստաթղթեր՝ սերտիֆիկատներ, որոնք
մուտքագրել են էլեկտրոնային առողջապահության միասնական տեղեկատվական
«ԱՐՄԵԴ» համակարգ:
ԱԱԾ-ն հայտնում է նաեւ, որ քրեական գործի նախաքննությամբ պարզվել է, որ
բժշկական սպասարկում իրականացնող աշխատակիցները նշված գործողությունների
համար յուրաքանչյուր քաղաքացուց ստացել են 5 000-10 000-ական դրամի չափով
կաշառք, իսկ պատվաստանյութերը ոչնչացվել են:
Փաստորեն, ինչ է ստացվում, ստացվում է, որ Հայաստանում ցանկացած
հանցագործություն կարող է բացահայտվել, երբ դրա ցուցումը տրվում է
վարչապետի կողմից: Մի քանի ամիս է ընթանում է պատվաստումների գործընթացը,
իշխանության կողմից քովիդային սահմանափակումները բացատրվում են հանրային
առողջությանն ողղված սպառնալիքի վերացման համատեքստում, բայց արիուտես, որ
հայրենի իրավապահները մատը մատին չեն խփել, օպերատիվ տվյալներ չեն ստացել
կատարվող հանցագործությունների մասին եւ դրանցով սկսեցին զբաղվել այն
ժամանակ, որբ Նիկոլ Փաշինյանից ցուցում ստացան: Սա, անշուշտ, կասկածների
տեղիք է տալիս , որ պարզապես չի եղել նման համատարած զեղծարարություն ,
իսկ իրավապահները ընդամենը նման գործ են ցույց տալիս՝ ոլորտի
պատասխանատուների աչքը վախեցնելու, քաղաքացիներին պատվաստման մղելու
նկատառումներից ելնելով, կամ էլ եթե ճիշտ է, ապա իրավապահ մարմինները
կնշանակի իրենց տեղում չեն եւ գործում են ըստ նպատակահարմարության, ավելի
ճիշտ՝ երբ Նիկոլ Փաշինյանն է ցուցում տվողը:
Մյուս կողմից՝ հասկանալի է, որ կլինեն նաեւ զեղծարարներ, բայց ի՞նչ իմաստ  ունի դեռ դատավճիռը չեղած՝ վարկաբեկել մի ողջ համակարգ, որը 2 տարի  տիտանական ջանքեր է գործադրում համավարակի դեմ պայքարում: Նույնիսկ այն ժամանակ, երբ Նիկոլ Փաշինյանն ու իր թիմը ի դեմս առողջապահության նախարար  Արսեն Թորոսյանի լուրջ չէին վերաբերում կորոնավարակին, Փաշինյանը  վստահեցնում էր, որ պինցետով կքաշեն, արաղով կոչնչացնեն այն ու  Սահմանադրական դատարանի դեմ իր արշավն էր շարունակում , իսկ նախարարն էլ  վստահեցնում էր, թե լուրջ վարակ չէ: Այս մարդիկ  չեն հասկանում իրենց  խոսքի կշիռը, երբ պետական ամենաբարձր մակարդակով նման բան է հայտարարվում,  շարքային քաղաքացին կարող է ամենատարբեր կասկածներն ունենալ եւ չվստահել  պատվաստումներին:

Անի Սահակյան