Բատկան իր ոճի մեջ է․ թե ինչու Մինսկում չեն պատասխանել CNN-ի լրագրողի հարցերին

Ցանկացած երկրի սուվերենությունն ու անկախությունը չի կարող վաճառվել կամ գնել։ Նման հայտաարություն է արել է Ալեքսանդր Լուկաշենկոն ամերիկյան CNN հեռուստաընկերությանը տված հարցազրույցում։ Նա բացարձակ հիմարություն է անվանել խոսակցությունները, թե Բելառուսը կարող է ընդգրկվել Ռուսաստանի կազմում։

<<ԱՄՆ-ին և Արևմուտքին չի հաջովվի մարդու իրավունքների պաշտպանության մասին իրենց կողմից հնարված ստանդարտներով ողջ աշխարհը նվաճել>>,- հայտարարել է Լուկաշենկոն՝ ավելացնելով, թե ամեն ինչ իմացվում է համեմատության մեջ։ Նա պնդել է, որ Բելառուսը աշխարհի ամենաանվտանգ երկրներից է, և մարդու իրավունքների ամենամեծ նվաճումը հենց դա է։ Որպես իր ասածի ապացույց, նա վկայակոչել է փաստը, որ Բելառուսի քաղաքացիները, այդ թվում նաև ծերերն ու երեխաները օրվա բոլոր ժամերին կարող են հանգիստ քայլել փողոցում․ <<Դա մեր ամենակարևոր ձեռբերումն է>>,- ընդգծել է նա։

Լուկաշենկոն մտացածին, ֆեյք լուրեր է անվանել այն խոսակցությունները, թե Բելառուսում խախտվում են մարդու իրավունքները։ Հիշեցնենք, որ Լուկաշենկոյի հասցեին նման մեղադրանքներ հնչում էին անցյալ տարվանից սկսած, երբ նա հերթական անգամ հաղթեց ընտրություններում։ CNN –ի լրագրողի դիտարկմանը, թե օգտվելով առիթից Լուկաշենկոն կարող է ներողություն խնդրել իր ժողովրդից՝ Լուկաշենկոն՝ Բատկան, հակադարձել է, թե ինքը որևէ բանի համար ներողություն խնդրելու կարիք չունի։ CNN-ի լրագրողի դիտարկմանը, թե Մինսկի փողոցներում քաղաքացիները հրաժարվել են պատասխանել իր հարցումներին, քանի որ վախենում են բանտում հայտնվելուց, Լուկաշենկոն հակադարձել է՝ չեն պատասխանել, քանի որ շատ լավ գիտեն, թե ինչ է իրենից ներկայացնում CNN ասվածը։

«Ես պատրաստ եմ թողնել նախագահի պաշտոնը, երբ Արևմուտքը դադարեցնի ճնշումը Բելառուսի վրա, իսկ երկրի ինքնիշխանությունը երաշխավորված լինի», - CNN հեռուստաընկերությանը տված հարցազրույցում հայտարարել է Ալեքսանդր Լուկաշենկոն։
«Երդվում եմ, ես չեմ պատրաստվում ցմահ պաշտոնավարել։ Ամեն ինչ կախված է լինելու Բելառուսում ստեղծված իրավիճակից։ Եթե Արևմուտքը չմիջամտի մեր գործերին, եթե մենք զգանք մեզ ինչպես անկախ և ինքնիշխան պետություն, ապա ամեն ինչ տեղի կունենա շատ ավելի վաղ, քան ձեզ թվում է», - նշել է Լուկաշենկոն։ «Բայց եթե դուք հանդգնեք մեկ անգամ ևս, ինչպես նախորդ տարի, միջամտել մեր երկրում տեղի ունեցող իրադարձություններին, շատ վատ է լինելու», - հայտարարել է Բելառուսի նախագահը և հեգնանքով ավելացրել․ «Ես 27 տարի ծառայել եմ իմ ժողովրդին։ Սակայն ես դեռ չեմ հասել այն տարիքին, ինչը Վաշինգտոնում։ Այնտեղ նախագահը շուտով 90 տարեկան կլինի»։

Նա նաև ասել է, որ Մինսկը պատրաստ է գնալ Մոսկվայի հետ լուրջ մերձեցման և արտաքին ագրեսիայի դեպքում նույնիսկ վերածվել Ռուսաստանի և Բելառուսի թիվ մեկ ռազմակայանի: Ի պատասխան Պուտինի հետ հարաբերությունների վերաբերյալ հարցին՝ նա ասել է, որ Բելառուսի և Ռուսաստանի նպատակները միասնական են՝ իրենց ժողովուրդների ապագան կառուցելու հարցում, և որևէ մեկը, այդ թվում նաև ԱՄՆ-ն ու Արևմուտքը չեն կարող իրենց խանգարել։ Արձագանքելով դիտարկմանը, թե իրենց երկիրը որոշակի գին է վճարում Ռուսաստանի հետ հարաբերությունների դիմաց, Լուկաշենկոն հակադարձել է․ <<Դուք, հավանաբար, անգլոամերիկյան ազդեցության տակ եք,մենք Պուտինի հետ այդ ոճով չենք բանակցում և հարաբերվում>>,- ասել է նա։
Բելառուսի https://www.belta.by/ պետական գործակալությունը Լուկաշենկոյի հարցազրույցը աղճատված և ոչ ամբողջական է համարել՝ գրելով, թե ավելի քան մեկժամանոց հարցազրույցից հրապարակվել է ընդամենը 8-9 րոպեանոց հատվածը, իսկ մնացածը լրագրողը հրապարակել է սեփական մեկնաբանություններով՝ խնդիրները ներկայացնելով քաղական այլ ասպեկտով և մանիապուլյատիվ խեղաթյուրումներով։ <<Անգամ սառը պատերազմի ժամանակ CNN նման ոճով չի աշխատել>>,- գրել է բելառուսական պաշտոնական կայքը։ Ավելի ուշ CNN-ը հրապարակել է հարցազրույցի ամբողջական տարբերակը։

Հայկ Դավթյան