Էրդողանը լցնում է Պուտինի համբերության բաժակը. թուրք 4 գեներալ են Ադրբեջան գործուղվել, մեկը՝ 44-օրյա պատերազմի կազմակերպիչը

Թուրքիայի պաշտպանության նախարար Հուլուսի Աքարը լիակատար աջակցություն է խոստացել Ադրբեջանին: «Թուրքիան մեծ նշանակություն է տալիս Հարավային Կովկասում կայունության ապահովմանը և ակտիվ ջանքեր է գործադրում այդ տարածաշրջանում խաղաղություն և կայունություն հաստատելու համար»,-ասել է Աքարը կղզային ծովի խնդիրներին և Հունաստանի հետ բարիդրացիական հարաբերություններին նվիրված միջոցառմանը: «Ադրբեջանը մեր եղբայրական երկիրն է, ազատագրել է իր հողերը, որոնք 30 տարի օկուպացված էին»,- ասել է Հուլուսի Աքարը: Նա նաև նշել է, որ Թուրքիան կշարունակի աջակցել Ադրբեջանին՝ իր բոլոր հնարավորություններով ու ներուժով:

44-օրյա պատերազմում գործնականում ապացուցելով, որ աջակցություն են Ալիևին, Անկարան շարունակում է վստահեցնել, որ աջակցելու են Ադրբեջանին, որի նախագահը շարունակում է թշնամական քաղաքականություն վարել Հայաստանի հանդեպ
Ընդ որում, ուշադրություն դարձրեք հանգամանքին, որ Թուրքիայի պաշտպանության նախարարն այս ամենն ասում է՝ Հայաստանից Թուրքիայի հետ հարաբերությունները կարգավորելու մասին իշխանությունների շարունակական հայտարարությունների ֆոնին:

Թուրքիայի ՊՆախարարի հայտարարությունը միակը սատարող հայտարարությունը չէ:
Բաքվում ստեղծվել է հատուկ հրամանատարական խումբ, որը ներկայացնում է Թուրքիայի զինված ուժերն Ադրբեջանում: Այն ներառում է չորս թուրք գեներալ, գրում են ադրբեջանական լրատվամիջոցները: Բացի այդ, փոխարինվել է նաև Ադրբեջանում Թուրքիայի զինված ուժերի ռազմական կցորդը. Այժմ այս պաշտոնը զբաղեցնում է գեներալ Զաքարիա Յալչինը:

Այսինքն, Թուրքիան Ադրբեջան է ուղարկել 4 գեներալների: Այդ 4 թուրք գեներալ գործուղվել են Ադրբեջան՝ իբրև թուրքական զորքերի հրամանատարական խումբ: Նրանք են՝ Թուրքիայի ցամաքային զորքերի օպերատիվ կառավարման ղեկավար, գեներալ-մայոր Բախտիյար Էրսայը, գեներալներ Աբդուլա Քաթիրչին, Էնդեր Գյուները, փոխվել է Թուրքիայի ԶՈւ ռազմական կցորդը. նոր կցորդ է նշանակվել Զաքարիա Յալչինը:

Ի դեպ, Բախտիյար Էրսայն, ով ղեկավարել է գեներալների խումբը, անմիջականորեն կազմակերպել ու կառավարել է Արցախի դեմ ռազմական գործողությունները: Նշենք, որ Բախտիյար Էրսայի անունը հայտնվել էր ռուսական «Վզգլյադ» պարբերականի հետաքննական նյութերում։ Թերթը, վկայակոչելով Ադրբեջանի ՊՆ իր աղբյուրները, գրել էր, որ 2020թ. աշնանը Էրսայի գլխավորած թուրք զինվորականների խումբն անմիջականորեն մասնակցել է Լեռնային Ղարաբաղի դեմ ռազմական գործողությունների կազմակերպմանը:

Ու այս ամենը՝ Ռուսաստանի «քթի տակ», ինչպես ասում են: Լեռնային Ղարաբաղում ռուս խաղաղապահներ են, իսկ Ադրբեջանում՝ թուրքական բանակի ներկայացուցչություն է ստեղծվում: Սա իսկապես, նոր մարտահրավեր է Ռուսաստանի համար: Սա նշանակում է՝ փորձել Պուտինի համբերության բաժակը:

Երեկվանից համացանցում եռացող հայտարարությունների ֆոնին վստահաբար պատահական չէր Ռուստամ Մուրադովի այս հայտարարությունը:

Լեռնային Ղարաբաղում ռուսական խաղաղապահ առաքելության նախկին հրամանատար, գեներալ-լեյտենանտ Ռուստամ Մուրադովը ՏԱՍՍ-ի հետ զրույցում նշել է, որ ռուս խաղաղապահների՝ ԼՂ տարածքում մնալու հարցը բնակչության որոշելիքն է՝ համաձայն 44-օրյա պատերազմին հաջորդած եռակողմ հայտարարության, իսկ դրանից հետո որոշում կընդունվի խաղաղապահների մանդատի հետագա երկարաձգման վերաբերյալ: «Մեզ գնահատական տվողը խաղաղ բնակչությունն է: Այսօր ԼՂ-ում կյանքը իր հունով է գնում: Կան, իհարկե, շատ բարդ հարցեր, սակայն գործընթացը շարունակվում է՝ մարդկանց վերադարձ, մի շարք խնդրահարույց հարցերի լուծում: Այդ պատճառով էլ, կարծում եմ, ամեն ինչ լավ կլինի»,- ասել է նա:

Սա թեթև ակնարկ է այն մասին, եթե ԼՂ-ի հայ բնակչությունը անվտանգ չզգա՝ ռուս խաղաղապահները կշարունակեն այնտեղ մնալ նաև 5 տարուց հետո:

Մետաքսյա Շալունց