Ցեղասպանի ուրվականը թաքցնել հնարավոր չէ

Նիկոլ Փաշինյանն ու իր քայլիստ ընկերները որոշել են բոլորիս սեփական արշինով չափել եւ հայտնի կենդանու տեղը դրած ինչ-որ բաներ են մեզ հրամցնում։ Նրանց թվում է, թե հաջողվեց համոզել, որ ունեն 70 տոկոս վստահություն, որ Հայաստանի ընտրողների առնվազն հիսուն տոկոսը ցեղասպան է, Արցախը հանձնող եւ իրենք մաքուրով են այդ ձայները ստացել, հիմա էլ անցել են հանրությանը մոլորեցնելու, թյուրիմացության մեջ գցելու, մանիպուլացնելու հաջորդ փուլին։ Պարզվում է՝ պատերազմից հետո էլ դեռ կան մարդիկ, որոնք հիացած են Քաղաքացիական պայմանագիր կուսակցության գաղափարներով եւ կուսակցությանն անդամակցության հայտ են ներկայացնում։ Այս մասին հպարտորեն տարածել էին կուսակցության ՖԲ էջով։

Այն, որ աքսիոմատիկ ճշմարտություն է, որ ցանկացած իշխանություն տնօրինում է ընտրողների առնվազն 50 տոկոսի քվեին, դրանք մարդիկ են, որոնք այս կամ այն կերպ կախում ունեն իշխանությունից, նույնիսկ ՀՀԿ-ի իշխանության համար խնդիր չի եղել 50 տոկոս ձայնը։ Այնպես որ ընտրությունների արդյունքները դարձնել դրոշակ եւ չագուջային քաղաքականություն վարել, կարող են միայն քաղաքական տհասները։ Նրանք, որոնք հույս ունեն, որ ընտրությունները մաքրել են պատերազմի արյունն իրենց վրայից, որ այլեւս ազատվել են քաղաքական եւ առհասարակ ցանկացած պատասխանատվությունից։

Այս մարդիկ պատմություն չգիտեն, ուստի չեն կարող պատմությունից դասեր քաղել, հասկանալ, որ ցեղասպանները երբ էլ լինի ստանում են իրենց դատաստանը, որ ցեղասպանի ուրվականը հենց իրենց է ողջ կյանքում հետապնդելու, անգամ եթե ամեն օր մի նոր շոու հնարեն աղվանհովսեփյանների, ԱԺ ծեծկռտուքների տեսքով, հնարավոր չի լինելու իրենք իրենց համոզել սեփական ուժի ու վստահության հարցում։ Այս ամենը սոսկ ինքնապաշտպանական բնազդ է,իսկ զուգահեռ իրականությունում հետընտրական ճգնաժամը օրեցօր ավելի է խորանում։ Կա ամենամեծ ընտրազանգվածը՝ 800 հազարը, որը մնաց տանը եւ չքվեարկեց որեւէ ուժի համար կամ դեմ։ Հենց այս ընտրազանգվածից է պետք վախենալ, եթե նույնիսկ համարում են, որ լուծել են խորհրդարանական ընդդիմության հարցերը։

Անի Սահակյան