Ով է դեմ Վանո Սիրադեղյանի վերադարձին

Տարբեր ժամանակներում սոցիալական ցանցերում, լրատվամիջոցներում բարձրացվում է Երեւանի նախկին քաղաքապետ, ՀՀ ներքին գործերի նախկին նախարար, գրող, հրապարակախոս Վանո Սիրադեղյանին Հայաստան վերադարձնելու հարցը։ Հեղափոխությունից հետո թեման կրկին ակտուալ դարձավ, նման կոչեր հնչեցին, առաջիններից մեկը խոսեց ՀՀՇ նախկին նախագահ Արարատ Զուրաբյանը։ Ապա լուրեր շրջանառվեցին, որ Վանո Սիրադեղյանը Հայաստանից մոտ 500 կիլոմետր հեռավորության վրա է, որ նրա հարազատները նախաձեռնել են նրան Հայաստան վերադարձնելու հարցն ու անգամ փաստաբան վարձել։ Բայց խնդիրն այն է, որ գրեթե 20 տարի տարագրության մեջ գտնվող Սիրադեղյանն առողջական ու հոգեբանական այնպիսի վիճակում չէ, որ գա եւ մինչեւ գործի վերանայումն ընկած ժամանակն անցկացնի կալանավայրում։
Եվրոպական երկրներից մեկում ապաստանած Սիրադեղյանը վերջին ժամանակներս, մեր տեղեկություններով` տեղափոխվել է Դուբայ, նա պահում է կապը նախկին ընկերներից ոմանց, հարազատների հետ, ինչպես նաեւ Նիկոլ Փաշինյանի հետ է կապի դուրս եկել, քննարկել են վերադարձի հարցը, սակայն նրա վերադարձին դեմ է Նիկոլ Փաշինյանի քաղաքական կնքահայր Լեւոն Տեր-Պետրոսյանը։ Նա հասկանում է, որ Վանոյի վերադարձից հետո աղմկահարույց սպանությունների, իր ժամանակ գործող բանդաների մասին սենսացիոն բացահայտումներ են լինելու, եւ որ այդ ամենին իր կապը դժվար է լինելու թաքցնել, ուստի խոր ծերության մեջ չի ցանկանում խայտառակվել։