Քայլող փորձանք. էլ ինչ սեղան առանց քավորի
Խորհրդարանում շարունակվում է ղեկավար կազմի ձեւավորման գործընթացը, քննարկվում է մշական հանձնաժողովների նախագահության հարցը, իշխող ՔՊ-ն որոշել է թեկնածուներին, խորհրդարանում քննարկումից հետո կլինի քվեարկություն:
44-օրյա պատերազմից իշխանությունը այդպես էլ դասեր չքաղեցին , տեղի չունեցավ կադրային ռեինկարնացիա, որը հույս կներշնչեր որոշակի փոփոխությունների: Եւ չնայած նախկինների նկատմամբ անհաղթահարելի ատելության, որը տեսանելի է նաեւ այսօր, Նիկոլ Փաշինյանի հույսը նախկինի մնացուկ-թափոններ են, օրինակ Անդրանիկ Քոչարյանն ու Պետաիրավականի նախագահ Վլադիմիր Վարդանյանը, որոնք կշարունակեն իրենց նախագահությունը առաջինը պաշտպանության, երկրորդը՝ պետաիրավականի հանձնաժողովում:
Անդրանիկ Քոչարյանի մասին ամեն ինչ վաղուց հայտնի է. նա այս իշխանության հավաքական կերպարն է՝ ցինիկ, ամբարտավան, մարտնչող անամոթ: Վլադիմիր Վարդանյանն էլ ՍԴ աշխատակազմի նախկին քարտուղարն է, իշխանության երբեմնի ամենակարկառուն սիմվոլներից Գագիկ Հարությունյանի գիդն է եղել, ուղեկցել է գործուղումների ժամանակ, օգտվել իշխանական բարիքներից , այսօր իշխանության քիչ, թե շատ ինտելեկտուալներից է:
Անցած երեք տարում նա նույնպես ղեկավարում էր այս հանձնաժողովը, եւ նրա բարձր հովանու ներքո բազմակի անգամ բռնաբարվեց երկրի Մայր օրենքը, ՍԴ-ում հակաիրավական հաղթարշավը կյանքի կոչվեց եւ առհասարակ տասնյակ հակասահմանադրական օրենքներ ընդունվեցին, որոնց մեծ մասը բարձր դատարանում կասեցվեցին: Հիմա իշխանության կադրային բանկն այնքան սնանկ է, որ նույն դեմքերը կրկին ասպարեզ են բերվում:
Հաջորդը թեկնածուն նախկին ՀՀԿ-ական Գեւորգ Պապոյանն է, իհարկե, Պապոյանն իրեն ֆիկտիվ ՀՀԿ-ական է հռչակել՝ պարզաբանելով, թե ձեւական է անդամակցել ՀՀԿ-ին, սակայն նրա պատանեկան եւ քաղաքական անցյալի մասին շատերն են հիշում, թե ինչպես էր մոլագարության աստիճանի համակրում ՀՀԿ-ի գաղափարներն ու լոզունգները եւ հանուն կարիերայի մարտնչում ընդդիմախոսների նկատմամբ: Կյանքը փոխվել է, դերերը՝ եւս, պատեհապաշտ երիտկարիերիստը դիրքավորվել է իշխանության խրամատում, ինչպես ՀՀԿ-ում էր:
Դե, էլ ինչ սեղան, առանց քավորի, Տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նախագահի պաշտոնում՝ Վահե Ղալումյանի թեկնածությունն է դիտարկվում, Ղալումյանը Փաշինյանի քավորի եղբայրն է, քայլող՝ փորձանք, համենայն դեպս Փաշինյանի համար: Հենց նա էր, որ առաջինը խոստովանեց Տավուշում առկա «ադրբեջանական» գյուղերի փաստը, ասաց, որ դրանք բնակեցված չեն, ամայի են ու պետք է հանձնվեն թշնամուն: Բայց, քանի որ քավորը հայկական ընտանիքում սրբություն է, Փաշինյանը իր սրբության սրբոցին չի կարող առանց ծառայողական մեքենայի թողնել:
Անի Սահակյան
Հետևեք մեզ Viber-ում
