Սերժ Սարգսյանից աբիժնիկների վերջին հանգրվանը

Նիկոլ Փաշինյանի հրամանով նախկին օբուդսմեն Կարեն Անդրեասյանը նշանակվել է արդարադատության նախարար:
Վերջինս Մարդու իրավունքների պաշտպան է ընտրվել Սերժ Սարգսյանի պաշտնովարման ընթացքում՝ 2011-ին, վեց տարով ՄԻՊ ընտրված Անդրեասյանը չորս տաի անց հրաժարական ներկայացրեց՝ խզելով կապերը երբեմնի սիրելի իշխանության ու իր մեկենասների հետ: Նրա առջեւ կանաչ լույս էր վառել Սերժ Սարգսյանի փեսա Միքայել Մինասյանը:

Տեղեկացնենք, որ Կարեն Անդրեասյանը Միքայել Մինասյանի եղբոր՝ Երեւանի ավագանու այն ժամանակվա անդամ Գրիգոր Մինասյանի մտերիմ ընկերն է: 2011-ին հենց Գրիգորի միջնորդության արդյունքում Միքայել Մինասյանը լոբբինգ արեց Սերժ Սարգսյանի մոտ, որպեսզի Անդրեասյանը ՄԻՊ դառնա: Ավելին՝ Անդրեասյանն ու Գրիգոր Մինասյանը համատեղ իրավաբանական «AM» ընկերությունը հիմնեցին եւ վայելում էին իշխանական հովանավորչությունն ու բարիքներն այնքան ժամանակ, մինչեւ մի օր Միքայել Մինասյանի եւ հարազատ եղբոր միջեւ ինչ-որ «սեւ կատու անցավ»:
Ի դեպ, եղբայրների լարված հարաբերությունների մասին մամուլում շատ է գրվել: Ի վերջո, Անդրեասյանը երկու եղբայրների կոնֆլիկտի «զոհը» դարձավ եւ սեփական դիմումի համաձայն ազատվեց զբաղեցրած պաշտոնից՝ մնչեւ հոգու խորքը աբիժնիկ մնալով նախկիններից: Գաղտնիք չէ, որ նախկինների նկատմամբ հիվանդագին սեւեռվածությամբ տառապող Նիկոլ Փաշինյանի խելքը գնում է նախկիններից աբիժնիկների համար, ուստի 2011-ի իր հրաժարականից հետո դեակտիվացած Կարեն Անդրեասյանը կրկին ասպարեզ դուրս եկավ՝ սեփական նախաձեռնությամբ, թե իշխանությունների պատվերով, դժվար է ասել, փաստն այն է, որ արդեն երեք տարի շարունակ իրավաբանի մասնագիտությամբ այս անձնավորությունը Նիկոլ Փաշինյանի եւ իր իշխանությունների հակաօրինական գործողությունների եւ իդեաների մոլի երկրպագուի տիտղոսակիրն էր, որ պարբերաբար ողջունում էր երկրում ընթացող ապօրինություերը՝ դատարաններ վեթինգից ու շրջափակումից սկսած, վերջացրած ՍԴ-ում իշխանության ուզուրպացիա:
Որպեսզի հասկանալի դառնա, թե ինչպիսի ստորաքարշությամբ ու քծնանքով էր ծառայություն մատուցում Փաշինյանին, կներկայացնենք իր բազում գրառումներից ընդամենը մեկը՝ արված 2019-ի ամռանը.«Նիկոլ Փաշինյանը հաղթում է Մարտի 1-ի դատավարությունում, սակայն այս մրցապայքարում նա մի միավոր կորցրեց Սահմանադրական դատարանում, և հաշիվը դարձավ 1:1 (սեպտեմբերի 17-ին պարզ կդառնա, թե ով է վերջնական հաղթողը):
2. Կոռուպցիոն գործեր բացահայտելու և ամբողջ նախկին թալանչի համակարգը աստիճանաբար ծնկի բերելու գործում Փաշինյանի թիմը միանշանակ հաղթող դուրս եկավ՝ հատկապես այն բանից հետո, երբ դատարանները դադարեցրին իրենց համատարած սաբոտաժը կոռուպցիայի դեմ պայքարին (հաշիվը՝ 2:1):
3. Փաշինյանը հաղթում է նաև Արցախի հարցում, որտեղ առանց ավելորդ զիջողականության կարողացավ թուլացնել սահմանային լարվածությունը, գրեթե զրոյացնել հակառակորդի կրակից զոհերը, ինչպես նաև առաջ տանել հայկական դիրքերը շփման գծում (հաշիվը՝ 3:1):
4. Փաշինյանին ծանր հարված հասցրին Ամուլսարով, քանի որ նրա իշխանության գրպանը գցել էին այնպիսի ցավալի ժառանգություն, որ Փաշինյանին դեռ բավական ժամանակ է պետք, որպեսզի չվնասի երկրի ներդրումային իմիջին և աշխարհաքաղաքական կարևոր հարաբերություններին, բայց նաև փրկի հայրենի բնությունը նախկին սխալներից (հաշիվը՝ 3:2):
5. Նոր իշխանության օգտին հաղթական մեծ միավոր է բերում Վարչապետի հաջողությունը երկրի ժողովրդավարացման գործում, ինչի ամենադրական օրինակներից է Հայաստանում և Արցախում բացառիկ ազատ ու օրինական ընտրությունների անցկացումը (հաշիվը՝ 4:2):
6. Փաշինյանի յուրահատուկ հաղթանակներից է այն, որ նա հադուրժում է այդքան քանակի թշնամական լրատվամիջոցների և, ի հեճուկս դրանց, պահպանում է իր բարձր վարկանիշը (հաշիվը՝ 5:2):
7. Ռուսաստանի հետ հարաբերվելու հարցում էլ Փաշինյանը հաղթում է նախկինների թողած կարծրատիպը: Հայաստանն այժմ ունի բավական սուվերեն ու արժանապատիվ, բայց և գործընկերային կեցվածք Ռուսաստանի հետ (հաշիվը՝ 6:2):
8. Մի շատ կարևոր հարցում հեղափոխական կառավարությունը դեռևս պարտություն է գրանցում: Նախկին թալանը վերադարձնելու գերնպատակով տարված լինելով` այն մերթընդմերթ ստիպված է լինում տնտեսական բացասական ազդակներ տալ գործարար համայնքին և կարող է շատ վնասել տնտեսական ակտիվությանը: «Ապօրինի գույքի բռնագանձման մասին» օրենքի ներկայիս խմբագրությունը, բանկային գաղտնիքի հետ կապված նոր իրավակարգավորումները, ինչպես նաև անշարժ գույքի հարկման գործընթացները պետք են, բայց միայն ու միայն մի շարք էական փոփոխություններով, որոնց պարագայում հնարավոր կլինի ոչ միայն ժողովրդին վերադարձնել թալանվածը, բայց նաև չվնասել արդար բիզնեսին, ինչպես նաև ապագայում չպարտվել Մարդու իրավունքների եվրոպական դատարանում (հաշիվը՝ 6:3)» ,- գրել էր նա ֆեյսբուքյան իր էջում:
Համաձայնեք, որ նախկիններից ժառանգություն մնացած այսպիսի աբիժնիկը գտնված կադր է Նիկոլ Փաշինյանի համար, նրա միջոցով հնարավոր կլինի կյանքի կոչել ամենաաբսուրդ, ամենաանհեթեթ ու հակաօրինական ցանկացած բան: Նախկինների շնորհիվ քաղաքական ասպարեզում հայտնված այս պերսոնը այժմ կարող է նրանց դեմ հուժկու գործիք դառնալ Փաշինյանի ձեռքում:

Անի Սահակյան