Մինչև սեպտեմբերի 16 դեռ պետք է ապրել, դուք այդքան ժամանակ ունե՞ք՝ «թավիշներ»...

Իր տարածքային ամբողջականության դեմ ուժի կիրառմանն ի պատասխան Հայաստանի Հանրապետությունը գործի կդնի միջազգային իրավունքով վերապահված իր ռազմաքաղաքական ողջ գործիքակազմը, հայտարարել է այսօր Արտաքին գործերի նախարարությունը:

«Հատկանշական է, որ ադրբեջանական կողմը գնում է իրավիճակի միտումնավոր սրման այն պայմաններում, երբ շարունակվում է Հայաստանի Հանրապետության ինքնիշխան տարածքում ադրբեջանական զինուժի ապօրինի ներկայությունը, երբ Ադրբեջանի ղեկավարությունը հիմնավորում է նմանօրինակ գործողությունները Հայաստանի հանդեպ տարածքային և պատմական պահանջների առաջադրմամբ», - շեշտում է Արտգործնախարարությունը՝ հավելելով. «Ադրբեջանի կողմից Հայաստանի տարածքային ամբողջականության դեմ ուժի կիրառմանն ի պատասխան Հայաստանի Հանրապետությունը գործի կդնի միջազգային իրավունքով վերապահված իր ռազմաքաղաքական ողջ գործիքակազմը»։ Իրադրության հետագա սրման ամբողջ պատասխանատվությունն ընկնում է Ադրբեջանի ռազմաքաղաքական ղեկավարության վրա», - ասված է հայտարարությունում:

Ադրբեջանական, ինչպես նաև ռուսական լրատվամիջոցներն այսօր մի սենսացիոն լուր հրապարակեցին: Թուրքիան ու Ադրբեջանը պայմանավորվել են համատեղ թյուրքական բանակ ստեղծելու վերաբերյալ, ընթանում են բանակցություններ, հաղորդեցին նրանք՝ վկայակոչելով Թուրքիայի խորհրդարանի նախագահի հայտարարությունը: Նշվում է, որ հունիսին Ադրբեջանի և Թուրքիայի զինված ուժերն արդեն անցկացրել են համատեղ մարտավարական զորավարժություններ Նախիջևանում: Թուրք-ադրբեջանական համագործակցության խորացումը ռազմարդյունաբերության ոլորտում նախատեսված էր Շուշիի հռչակագրով:

Այժմ, թուրքական ԶԼՄ-ները մեկնաբանում են, թե Թուրքիայի խորհրդարանի նախագահի խոսքերը սխալ են թարգմանել, հարցը վերաբերյալ միացյալ ռազմական համագործակցության շուրջ ընթացող բանակցություններին: Թեև առանձնապես տարբերություն չկա՝ ռազմական համագործակցությունը ենթադրվում է, որ Շուշիի ռազմական հռչակագրի շրջանակներում Ադրբեջանն ու Թուրքիան միասնական բանակ ունեն:

Հետևաբար, այս իրողության պայմաններում, պետք է հասկանալ, թե Հայաստանն իր ռազմավարական դաշնակցի հետ՝ Ռուսաստանի հետ ինչ պայմանավորվածություններ է ձեռք բերում, ինչ բանակցություններ է վարում առհասարակ:

«Սույն թվականի սեպտեմբերի 16-ին Հայաստանը ստանձնելու է ՀԱՊԿ նախագահությունը` սրանից բխող բոլոր հետևանքներով»,-այսօր հայտարարել է Ազգային ժողովի Արտաքին հարցերի հանձնաժողովի նախագահ Ռուբեն Ռուբինյանը։ Հարցին, թե արդյոք Հայաստանը կրկին կդիմի ՀԱՊԿ-ին, Ռուբինյանը պատասխանեց, որ գործընթացը շարունակվում է։

Իսկ ինչ հետևանքներ է բխեցնելու Հայաստանը մի կառույցի շրջանակներում, որին վարկաբեկելու հարցում ամեն ինչ արեց Փաշինյանը: ՀԱՊԿ-ականները, որոնք աշնանը պատերազմի օրերին չեզոքություն էին պահպանում, ծպտուն չէին հանում, որպեսզի չպաշտպանեն Հայաստանին, այդ ի՞նչ են անելու ՀՀ-ի նախագահության ընթացքում... Ադրբեջանին պատժելո՞ւ են: Ո՞ւմ հետ համագործակցելով, Էրդողանի ու Ալիևի հետ սերտ հարաբերություններ ունեցող պետությունների ղեկավարների՞ հետ: Հետո մինչև սեպտեմբերի 16-ին դեռ պետք է ապրել, դուք այդքան ժամանակ ունե՞ք...

Մետաքսյա Շալունց