SOCAR-ը դադարեցրել է Ադրբեջանում խոշորագույն նախագիծը

Ադրբեջանի պետական նավթային ընկերությունը (SOCAR) նավթի գնանկման պատճառով դադարեցրել է Բաքվից 60 կմ դեպի հարավ, Գարադաղի շրջանի Սանգաչալ ավանում նավթաքիմիական համալիրի շինարարության խոշորագույն` 9 մլրդ դոլար արժողությամբ նախագիծը: Այս մասին հաղորդում է Reuters-ին հայտնել է SOCAR-ի ռազմավարական զարգացման գծով փոխնախագահ Թոֆիկ Գահրամանովը: Նախագծի վրա ներդրումը, որի նկատմամբ հետաքրքրություն են դրսեւորել մի քանի արտասահմանյան ընկերություններ, այդ թվում` ճապոնական Misui-ն, սկզբում գնահատվել էր 17 մլրդ դոլար, սակայն նավթավերամշակման գործարանը նախագծից հանվելուց հետո, գնահատականն իջեցվել էր 8,5-9 մլրդ դոլարի: Գահրամանովն ասել է, որ ընկերությունը կարող է վերադառնալ գազավերամշակման եւ նավթավերամշակման համալիրի նախագծին, եթե նավթի գները վերականգնվեն, իսկ այժմ կապիտալ վերանորոգման կենթարկեն Բաքվի  նավթավերամշակման գործարանը եւ «Ազերքիմիա» քիմիական ընկերության օբյեկտները, որի վրա պետբյուջեից նախատեսվում է ծախսել 1,3 մլրդ դոլար: Նրա խոսքով` նախագիծը պետք է իրականացվի մի քանի փուլով 4 տարվա ընթացքում, եւ այդ ժամանակի ընթացքում հնարավոր են արտադրության դադարեցումներ գործարանում: