Փաշինյանը կործանում է. ԱԳ նախարարն ու տեղակալները պետք է խոսեն

Երեկ հաստատվեց տեղեկությունը, որ ՀՀ ԱԳ նախարարի պաշտոնակատար Արա Այվազյանի հրաժարականից հետո նաև փոխարտգործնախարարներն են հրաժարականի դիմումներ ներկայացրել:

ՀՀ ԱԳ նախարարի բոլոր երեք տեղակալները` Արտակ Ապիտոնյանը, Ավետ Ադոնցը և Արմեն Ղևոնդյանը ներկայացրել են աշխատանքից ազատման դիմումներ, որոնք անցյալ շաբաթ համապատասխան միջնորդագրերով ուղարկվել են վարչապետի աշխատակազմ:

Մայիսի 27-ին արտգործնախարարի պաշտոնակատարի պաշտոնից հրաժարական էր ներկայացրել Արա Այվազյանը, 4 օր անց Արտգործնախարարության անձնակազմի հետ հրաժեշտի հանդիպման ժամանակ խոսել իր պատճառների մասին, մասնավորապես ասել, թե իր որոշումը պայմանավորված էր հենց այն պատճառով, «որպեսզի երբևիցե որևէ կասկած չլինի, որ այս նախարարությունը կարող է ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել»։ Նույն այդ օրը հրաժարական էր ներկայացրել նաև նրա տեղակալներից Գագիկ Ղալաչյանը: Նրա հրաժարականի մասին արդեն հայտնի դարձավ 4 օր անց` մայիսի 31-ին:

Այսինքն, ստացվում է, մեր երկիրը չունի ԱԳ նախարարի և 4 փոխարտգործնախարարի պաշտոնակատարներ: Մեր երկրի արտաքին քաղաքական գերատեսչությունը, կարելի է ասել, կաթվածահար վիճակում է:

Ու ի՞նչ եք կարծում, այս օրերին քարոզարշավ իրականացնող Փաշինյանը հա՞րկ է համարում անդրադառնալ այդ հարցին, թե ինչո՞ւ իր կառավարության ներկայացուցիչը նման տեքստով հայտարարություն արեց և հրաժարական ներկայացրեց, ակնարկելով, որ հեռանում է, որովհետև «մեր պետականության, մեր ազգային և պետական շահի դեմ» քայլերի չի գնացել, ապա ԱԳՆ փոխնախարարները հեռացան։

Եթե սա լիներ մի ժամանակ, երբ մեր ընդդիմության շարքերում կլիներ Փաշինյանը, ապա կարելի է պատկերացնել, թե նա ԱԺ ամբիոնից ինչ բոցաշունչ ելույթներ կունենար նույն հարցով:

Ինչո՞ւ Փաշինյանը հարկ չի համարում խոսել այդ մասին, բացատրություն տալ, դա կառավարության կարևոր ճյուղ է, այն էլ երկրի համար այս կարևոր փուլում:

Արա Այվազյանը Փաշինյանի նշանակած արտգործնախարարն է, վստահաբար գիտի բաներ, որոնք մեր հասարակությանը հասու չեն, հետևաբար, եթե Փաշինյանը ջայլամի քաղաքականություն է վարում, ուրեմն, Արա Այվազյանը և փոխարտգործնախարարները պետք է խոսեն, ներկայացնեն հասարակությանն իրենց հեռանալու պատճառները:

ԱԳՆ-ից հեռանալ ու դրա պատճառների մասին չխոսել, այսպես ասած՝ «ծածկադմբոց անելը»՝ կլինի նոր հանցագործություն, եթե մեր հասարակությունը չիմանա, թե այս իշխանությունը ինչ քայլերի է դիմում՝ երկրի ինքնիշխանության կործանման ու ազգային շահը ոտնահարելու տեսանկյունից:

Մետաքսյա Շալունց