ՄԱԿ-ը 24-ժամյա համաշխարհային հրադադարի կոչ է անում

ՄԱԿ-ի գլխավոր քարտուղար Անտոնիու Գուտերեշը հանդես է եկել ուղերձով Խաղաղության միջազգային օրվա 100-օրյա հետհաշվարկի մեկնարկի կապակցությամբ։ Ուղերձում, մասնավորապես, ասված է. «Այս տարվա հունվարին Գլխավոր քարտուղարի պարտականություններն ստանձնելով՝ առաջին բանը, որ արեցի, խաղաղության կոչ արձակելն էր. կոչ բոլոր քաղաքացիներին, կառավարություններին ու առաջնորդներին՝ խաղաղությանն առաջնահերթություն տալու։ Խաղաղության միջազգային օրը, որ նշվում է ամեն տարի սեպտեմբերի 21-ին, մարմնավորում է զինված հակամարտությունների պատճառած անտեղի տառապանքներին վերջ դնելու մեր ընդհանուր ցանկությունը։ Այդ օրը հնարավորություն է աշխարհի մարդկանց համար՝ ճանաչելու այն կապերը, որ միավորում են բոլորին՝ անկախ ծագման երկրից։ Սա օր է, երբ ՄԱԿ-ը 24-ժամյա համաշխարհային հրադադարի կոչ է անում՝ հույսով, որ խաղաղության մեկ օրվան կհաջորդի ևս մեկը, հետո՝ էլի մեկը, և, վերջիվերջո, զենքերը կլռեն։ Այնուամենայնիվ, խաղաղության հասնելը սոսկ զենքերը վայր դնելը չէ։ Իրական խաղաղությունը պահանջում է կամուրջների կառուցում,  պայքար խտրականության դեմ և հանուն աշխարհում բոլոր մարդկանց իրավունքների։ Ահա թե ինչու այս տարի Խաղաղության միջազգային օրվա թեման է «Միասին՝ հանուն խաղաղության. հարգանք, ապահովություն ու արժանապատվություն բոլորի համար», որի սևեռակետում, մասնավորապես, աշխարհով մեկ փախստականների ու միգրանտների ծանր կացությունն է։ Որպես միջազգային համայնք՝ մեր պարտավորությունն է ապահովել, որ բոլոր նրանք, ովքեր հարկադրված լքել են իրենց տները, ստանան միջազգային իրավունքով իրենց համար նախատեսված պաշտպանությունը։ Որպես մարդկային ընտանիք՝ մեր պարտքն է վախը փոխարինել բարությամբ։ Հաջորդ 100 օրվա ընթացքում եկեք հիշենք, որ մեր հասարակության միլիոնավոր խոցելի անդամներ, որոնցից շատերը կորցրել են ամեն ինչ, մեր կողմից հասկացվելու և մեր օգնության կարիքն ունեն։ Եկեք միասին նրանց օգնելու ռազմավարություն մշակենք։ Եկեք գիտակցենք, թե որքան բազմաթիվ միջոցներով են նրանք նպաստում իրենց ընդունող երկրների ու համայնքների զարգացմանը։ Եվ եկեք կրկնապատկենք մեր ջանքերը` հակամարտության հիմնային պատճառները հաղթահարելու, կատարելագործենք կայուն զարգացման նպատակներին ուղղված մեր գործունեությունը և ավելի մեծ ուշադրություն դարձնենք բռնության կանխարգելման հարցը առաջնային դարձնելուն։ Բացելով մեր սրտերը, ձեռք ձեռքի տալով և միգրանտներին ու փախստականներին օգնության հասնելով՝ մենք կարող ենք ավելի մոտենալ բոլորի համար խաղաղությանը, բարգավաճմանն ու ապահովությանը»։