Սասդ կտրի՛ ու վեր ընկի՛ տեղդ

Էկոնոմիկայի նախարար Վահան Քերոբյանը աննախադեպ ֆանտաստիկ հայտարարություն է արել, որը հավակնում է, որպես աքսիոմատիկ սուտ տեղ գրավել Գինեսի ռեկորդների գրքում։

<<Տնտեսական ակտիվության ցուցանիշն ապրիլին` +23.2%, իսկ առաջին չորս ամսվանը` +2.6%
Երկնիշ տնտեսական աճն իհարկե լինելու է, Հայաստանն արդեն շինհրապարակ է, գյուղատնտեսությունը վայելում է մասշտաբային օժանդակություն, ներդրումները հորդում են, աշխատատեղերն ավելանում>>,- Ֆեյսբուքի իր էջում գրել է նա։

Քերոբյանն, իհարկե, չի մանրամասնել, թե այս դարակազմիկ հայտարարությունն անելիս ինքը սթափության ինչ վիճակում է գտնվել, ինչ է խմել կամ ծխել, որ այսպիսի լեգենդար մտքեր է արտահայտել։ Մի բան հաստատ է՝ այս կարգի խայատառակությունը չափազանց է անգամ Նիկոլի ստասխոս և ցինիկ թիմի համար։ Ըստ ամենայնի՝ Վահան Քերեբյանը <<վիզ է դրել>> և ուզում է ամեն գնով ապացուցել, որ կարող է գերազանցել իր շեֆ Նիկոլ Փաշինյանին՝ անշուշտ ստախոսությամբ։
Դատեք ինքներդ՝ ընդամենը մի քանի օր առաջ հրապարակված պաշտոնական վիճակագրական տվյալներով 2021 թվականի առաջին եռամսյակում նախորդ տարվա նույն ժամանակահատվածի համեմատ ՀՆԱ-ի անկումը կազմել է 3,3 տոկոս։
Ապրիլին արձանագրված աննախադեպ ցուցանիշների մասին առիթ ունեցել ենք գրելու, որ այդ թվերը ընդամենը խաբկանք են։ Անցյալ տարի, կորոնավիրուսի համավարակով պայմանավորված, տնտեսությունը գտնվում էր շատ վատ վիճակում, և կառավարությունը, բիզնեսին աջակցելու նպատակով, հարկային արձակուրդներ էր սահմանել։ Մասնավորապես շահութահարկի գանձումը հետաձգվել էր՝ հաշվի առնելով, որ ոլորտները գոյատևելու խնդիր ունեին։ Եվ ահա այս տարվա առաջին հունվար-ապրիլ ամիսներին Պետական եկամուտների կոմիտեն անցյալ տարվա սառեցված հարկերն այս տարվա առաջին ամիսներին ակտիվորեն հավաքագրել է, որի արդյունքում էլ գոյացել է ապրիլ ամսվա ռեկորդային ցուցանիշը։ Այլ կերպ ասած՝ բիզնեսը պետությանը վճարել է անցյալ տարվա հարկային պարտքը։ Սա որևէ կապ չունի ներդրումների և նոր աշխատատեղերի ստեղծման հետ։

Ադրբեջանի զինված ուժերը հատել են ՀՀ պետական սահմանը և արդեն 14 օր շարունակ գտնվում են մեր պետության ինքնիշխան տարածքում, ՀՀ տեղակայված բոլոր դեսպանատները հայտարարություն են անում նոր հնարավոր պատերազմի բռնկման մասին՝ կոչ անելով իրենց քաղաքացիներին չայցելել սահմանամերձ Սյունիքի, Գեղարքունիքի և Վայոց Ձորի մարզեր, իսկ Փաշինյանի կաբինետի անդամը հորդացող ներդրումներից է խոսում։ Աշխարհում չկա երկիր, որտեղ պատերազմը դեռ չավարտված, նոր ռազմական բախման սպառնալիքի տակ, ներդրումներ են հորդում։ Սա դեմ է տնտեսության և բիզնեսի կանոններին։ Իսկ ամնենամեծ խայտառակությունն այն է, որ նախարարը, երևի, հավատում է ինքն իր ասածին։
Տեսնես, որտե՞ղ են այդ ներդրումները, ովքե՞ր են այդ ներդնողները․ դրանք անուն, ազգանուն, գործունեության հասցե ունե՞ն։ Կա՞ որևէ կենդանի մարդ, որը ականատես է եղել, թե որտե՞ղ և ինչպե՞ս են ստեղծվել այդ աշխատատեղերը կամ ո՞վ է այն երջանիկը, որ աշխատում է նորաստեղծ որևէ աշխատատեղում։ Միգուցե, Վահան Քերոբյանի տրամաբանությամբ, այս բոլոր հարցերը երկրորդական նշանակության անկարևոր մանրուքներ են։
Իսկապես, չի կարելի այս աստիճանի ցինիկ լինել։ Կարելի է ուղղակի լռել կամ ինչպես արցախցին կասեր ՝ սասդ կտրի ու վեր ընկի տեղդ։

Հայկ Դավթյան