Ցավոտ ճշմարտություն, պողոսական կտեր

Թեպետ բառացիորեն մի քանի օր առաջ Նիկոլ Փաշինյանը սովորական հիստերիա էր բարձրացրել, թե սուտ են, ընդդիմադիրների տարածած տեղեկություննեը, որ ինքը պատրաստվում է հերթական ստորագրվելիք երրորդ փաստաթղթով նոր տարածքներ զիջել իր կիրթ բարեկամին, եւ սովորույթի ուժով լկտիաբար ստեց՝ ասելով, որ այո, ստորագրելու է փաստաթողթ, բայց դա լինելու է հայամետ, բխելու է հայկական շահից, այդուհանդերձ ինչպես կասեն անբարոյականի եւ գողի օրերը հաշված են, Փաշինյանի ստերը ջրի երես հանելու համար այս պարագայում ոչ թե 40, այլ ընդամենը չորս օր պահանջվեց:
Հայաստանի թիվ մեկ քավորը՝ Նիկոլ Փաշինյանի նաեւ մանկության ընկեր, իջեւանցի Վահե Ղալումյանը հաստատեց, որ առնվազն 6- 7 գյուղ մտադիր են հանձնել ադրբեջանական կողմին:
Ի պատասխան tert.am-ի հարցի, իմքայական պատգամավորը, որը նաեւ Տավուշի նախկին մարզպետն էր, ասել է որ հանձնելու մասին լուրերը ոչ կարող է հերքել, ոչ հաստատել, բայցեւայնպես հաջորդ վայրկյանին հաստատել է: Նախ ասել է՝ « Եթե չեմ սխալվում, փաստաթուղթն ամբողջական տարբերակն է և նման բան այնտեղ չկա: Հանձնաժողովը պետք է որոշի, թե հետագայում ինչ կանի, այդ փաստաթղթով հանձնաժողով է ստեղծվելու, որպեսզի սահմանային խնդիրներ ուսումնասիրի և լուծում տա»,-ասել է նա և չբացառել, որ հակառակորդը կարող է ստորագրել մի փաստաթուղթ, որը հարյուր տոկոսով հայկական շահերից է բխում:
Ապա նշել՝ Տավուշում կան ադրբեջանական հողեր, որոնք գտնվում են հայկական տիրապետության տակ և կան տարածքներ, որոնք ադրբեջանական հսկողության տակ են: «Բարխուդարլու, Սոֆուլու, Խեյրիմլի, Ոսկեպար, սա ինձ համար չէ, քարտեզով սրանք ադրբեջանական տարածքներ են: Ես ուրիշ քարտեզ չունեմ, դուք ունե՞ք, այդ գյուղերը գնացե՞լ եք, տեսե՞լ եք, և՞, միգուցե հանձնաժողովը եզրակածություն տա, որ հայկական են»:
Դիտարկմանը, թե ինչու ենք թշնամու հետ գնում նոր փաստաթղթի ստորագրման, երբ դեռ անգամ մեր գերիները չեն վերադարձվել, վերջինս շեշտել է՝ պետք է բանակցեն և դիտարկմանը, թե միայն պետք է գլխիկոր բանակցել՝ պատգամավորն արձագանքել է. «Գլխիկոր դուք եք բանակցում, մենք գլխիկոր չենք բանակցում: Պետք է բանակցենք, որ Հայաստան եկած ադրբեջանական ԶՈՒ-ն դուրս գա: Մինչև հիմա կռվել ենք, հիմա պիտի բանակցենք, որ հասկանանք»:
Կարելի էր, անշուշտ, զվարճանալ պատգամավորի հայտնած մտքերի առիթով, եթե իրականությունն այսքան ողբերգական ու տխուր չլիներ: Իսկ իրականության մասին ինչպես հայտնի է ՝ կամ տան փոքրից է հնարավոր իմանալ, կամ խենթից:
Եթե Փաշինյանի ամենահարազտ մարդը, ով նաեւ ծնունդով տավուշեցի է, չի վարանում խոսել այսպես կոչված ադրեբաջանական համայնքներից, ապա կարելի է չկասկածել, որ հարցն արդեն քննարկվել է թիմում եւ արդեն իսկ դրա համար հող են նախապատրաստում:Գրեթե նույնաբովանդակ հայտարարությամբ է հանդես եկել մեկ այլ իշխանական Հովիկ Աղազարյանը, նույն օրը լրագրողների հետ ճեպազրույցի ընթացքում նա ասել է «Ես կարծում եմ, որ դա անհրաժեշտ փաստաթուղթ է: Այստեղ կա իրադրություն, որ հայտնի դեպքերից հետո 90-ական թվականներից հետո բնակավայրեր կան, որոնք ադրբեջանական են եղել, բայց մեր հողերի մեջ են եղել և հակառակը, և այդ իրավիճակը գրեթե սիմետրիկ է, խնդիրը լուծելու համար սիմետրիկությունը չպետք է խախտվի»: Պատգամավորը ի տարբերություն նախորդի ավելի ճարպիկ է գտնվել, դառը իրականության մասին խոսելուց հետո պողոսներին կուտ է տվել նաեւ «Ես մտածել եմ մի 10 տարի հետո այնպիսի բանակ ստեղծեմ, որ Տիգրան Մեծի քարտեզը վերականգնեմ, և դա եղել է իմ մանկական երազանքը: Ես այդ բանակը կստեղծեմ, գաղափարը կտամ, ով էլ ուզում է լինի իշխանության ղեկին, և սահմանները կգծեմ Տիգրան Մեծի ժամանակվանից, և մենք պատմական հայրենիքի վրա կստեղծենք այս պետությունը»:

Անի Սահակյան