Մոսկվան ու Վաշինգտոնը կորոշեն Հայաստանի տարածքային ամբողջականության հարցը
Երեկ ուշ երեկոյան կայացավ մի իրադարձություն, որը կարող է փոխել Հայաստան-Ադրբեջան սահմաններում նախապատերազմական իրավիճակը:
Ռուսաստանն իհարկե, ակտիվ ներգրաված է հետպատերազմյան գործընթացներում: Սակայն, մյուս կողմից՝ նկատելի է թուրք-ադրբեջանական տանդեմի հարձակողական ոճն ընդդեմ Հայաստանի:
Այս իրավիճակում շատ կարևոր է, որպեսզի ԵԱՀԿ Մինսկի խմբում համանախագահող Ռուսաստանն ու Միացյալ Նահանգները ընդհանուր հայտարարի գան, միասնական դիրքորոշում ունենան Հայաստանի վերաբերյալ այս վճռորոշ փուլում: Մոսկվա-Վաշինգտոն դիմակայությունը որևէ դրական բան չի խոստանում Հայաստանին:
Ահա երեկ կայացավ պատմական իրադարձություն՝ հանդիպեցին Ռուսաստանի ԱԳ նախարարն ու ԱՄՆ պետքարտուղարը:
ԱՄՆ պետքարտուղար Էնթոնի Բլինկենը Ռուսաստանի ԱԳ նախարար Սերգեյ Լավրովի հետ քննարկել է համագործակցության հնարավորություններն ու ԱՄՆ մտահոգությունները, հայտնել է Պետդեպարտամենտի ներկայացուցիչ Նեդ Փրայսը: «Պետքարտուղարը նշել է, որ ԱՄՆ-ը փնտրում է ավելի կայուն և կանխատեսելի հարաբերություններ Մոսկվայի հետ», - ասվում է Փրայսի հայտարարության մեջ, որը մեջբերում է CNN-ը: Հայտնի դարձավ, որ նրանք քննարկել են նաև տարածաշրջանային խնդիրներ՝ ներառյալ Հայաստանի և Ադրբեջանի միջև հակամարտության երկարաժամկետ քաղաքական լուծման որոնումը:
Երեկ նաև Ռուսաստանի նախագահը հեռախոսազանգեր ունեցավ Փաշինյանի ու Ալիևի հետ:
Վարչապետի պաշտոնակատար Նիկոլ Փաշինյանը հեռախոսազրույց է ունեցել Ռուսաստանի նախագահ Վլադիմիր Պուտինի հետ: «Նիկոլ Փաշինյանը ներկայացրել է ՀՀ և ԱՀ սահմանին տիրող ներկայիս իրավիճակը՝ ընդգծելով, որ ադրբեջանական ուժերը, հակառակ միջազգային իրավունքի բոլոր նորմերի, խախտել են Հայաստանի Հանրապետության ինքնիշխան տարածքը», - ասված է Փաշինյանի աշխատակազմի տարածած հաղորդագրությունում:
Փաշինյանը շնորհակալություն է հայտնել այս օրերին ՌԴ կողմից ներդրվող ջանքերի համար, որոնք ուղղված են տարածաշրջանում խաղաղության և կայունության ամրապնդմանը: Հայկական կողմը հաղորդում է նաև, որ զրուցակիցները «միակարծիք են եղել իրավիճակի հանգուցալուծման ճանապարհների և դրա մեթոդաբանության շուրջ»: Ըստ Կրեմլի տարածած հաղորդագրության՝ Վլադիմիր Պուտինը շեշտել է, որ ռուսական կողմը, որպես միջնորդ, ակտիվորեն նպաստում է իրավիճակի կարգավորմանը և կշարունակի գործել նույն ոգով:
Այսօր ավելի վաղ Պուտինը հեռախոսազրույց է ունեցել նաև Ադրբեջանի նախագահ Իլհամ Ալիևի հետ:
«Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը այսօր կայացած հեռախոսազրույցի ընթացքում կարծիք են հայտնել, որ Հայաստանի և Ադրբեջանի սահմանին ստեղծված իրավիճակը հանգուցալուծումը պետք է իրականացվի դիվանագիտական մեթոդներով», - նշում է Կրեմլի մամուլի ծառայությունը։
«Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը այսօր կայացած հեռախոսազրույցի ընթացքում կարծիք են հայտնել, որ Հայաստանի և Ադրբեջանի սահմանին ստեղծված իրավիճակը հանգուցալուծումը պետք է իրականացվի դիվանագիտական մեթոդներով», - հաղորդեց Կրեմլի մամուլի ծառայությունը։ «Կողմերը անդրադարձել են ադրբեջանա-հայկական սահմանին վերջերս տեղի ունեցած միջադեպին։ Ընդհանուր տրամադրվածությունն այնպիսին է, որ կարգավորումը պետք է ընթանա բացառապես քաղաքական-դիվանագիտական մեթոդներով», - հաղորդում է Ռուսաստանի նախագահի մամուլի ծառայությունը։
Առայժմ հայտնի չեն Լավրով-Բլինկեն հանդիպման այլ մանրամասներ՝ Հայաստան-Ադրբեջան խնդրի վերաբերյալ: Բայց, ամեն դեպքում կարևոր է, որպեսզի Մոսկվան ու Վաշինգտոնը մեկ հարցում՝ խաղաղության հաստատման և Հայաստանի տարածքային ամբողջականության պահպանման հարցում միասնական դիրքորոշում ունենան:
Մետաքսյա Շալունց
Հետևեք մեզ Viber-ում
