Էշը մնացել է Նիկոլ Փաշինյանի կոկորդում

Իջեւանցի էշատեր Սեւադա Ղազարյանը հայտնվել է իրավապահների թիրախում, երեկ նրա տանն են խուզարկություն իրականացրել, ինչ են փնտրել ոստիկանները
շարքային քաղաքացու բնակարանում, կարելի է գուշակել: Սովորաբար կասկածյալների բնակարաններում խուզարկություն են կատարում՝ փորձելով հայտնաբերել <հանցագործության> ապացույցներ: Իսկ աչաջուրեցի Սեւադայի հանցանքն այն է, որ անցած շաբաթ Իջեւանից Երեւան էր բերել մի համակրելի իշուկ ու Ազգային ժողովի դիմաց կոչ էր անում այնտեղ գտնվող Նիկոլ Փաշինյանին հոժարակամ գալ, նստել իր իշուկին, եւ ինքը նրան էշի վրա դրած կվերադարձնի հայրենի Իջեւան:

Աչաջրեցի իշուկատերը իր վարմունքը բացատրեց՝ հղում անելով հայկական վաղեմի սովորույթին, երբ դավաճան, անպետք, անբարո անձնավորությանը թարս նստեցնում էին էշին և այդպես պտտում գյուղում կամ քաղաքում: Դա հասարակական պարսավանքի յուրօրինակ դրսևորում է եղել ժամանակին: Եվ ահա, մեր հայրենակիցը, որ ներկայացավ որպես ԳՇ նախկին պետ Օնիկ Գասպարյանի համագյուղացի, որոշել էր նույնն անել իր համերկրացու հետ:

Այս անշառ, բայց միեւնույն ժամանակ տպավորիչ ակցիան, ինչպես երեւում է, մնացել է Նիկոլ Փաշինյանի կոկորդում, նա ամեն ինչ անում է, որ կրեատիվ քաղաքացին հայտնվի ճաղերի ետեւում, կամ էլ մինչեւ հոգու խորքը փոշմանի իր արածից:
Դեռեւս ակցիայի օրը բերման ենթարկելով քաղաքացուն՝ ոստիկանական բաժանմունքում թմրանյութ էին <գցել> նրա գրպանը: Սեւադա Ղազարյանը լրատվամիջոցներին վստահեցրել էր, որ իր գրպանում չի ունեցել նման զանգված եւ ինքն էլ անակնկալի է եկել, երբ այնտեղ դատարկել է գրպաններն ու հայտնաբերել թղթի մեջ փաթաթած դեղնականաչավուն զանգվածը:
Իջեւանցու դեմ նյութեր են նախապատրաստում, սակայն ինչպես երեւում է, հիմնավոր ապացույցներ չունեն եւ ամեն գնով փորձում են ձեռք բերել, որ քաղաքացու նկատմամբ հարուցված քրեական գործը չջրվի-գնա:

Բանն այն է, որ Ղազարյանին բժշկական փորձաքննության են ենթարկել եւ բացասական պատասխան ստացել. քաղաքացին թմրանյութ չի օգտագործել: Դրանից հետո շտապել են խուզարկել տունը՝ թերեւս հույս ունենալով, որ տան անկյուններում էլ մի քանի տեղով թմրանյութ կկարողանան գցել եւ ազգին ներկայացնել, թե մի թմրամոլի ակցիա էր եւ որ Փաշինյանի հայրենի մարզում իրեն բոլորը սիրում եւ հարգում են:
Բայց ապարդյուն, Սեւադա Ղազարյանի տնից ոչ թմրանյութ են հայտնաբերել, ոչ էլ թմրադեղեր ու դրանց պատրաստման գործիքները, ոստիկանների հայտնաբերածը եղել է մի բուռ բոված կանեփ:

ՀՀ իրավապահ մարմինները թերեւս պետք է պատասխանեն հարցին՝ ինչու է երկրաքանդների այս բանդան մինչ օրս հանգիստ շրջում, իսկ բանդայի պարագլխի դեմ անշառ ակցիայի կազմակերպիչը հայտնվել է իրենց թիրախում, ինչպես հին ու բարի ժամանակներում, որոնց ծաղրում էր նախեւառաջ Նիկոլ Փաշինյանը, իսկ տակավին վերջերս պարծենում, թե Հայաստանում այլեւս անմեղ մարդիկ բանտում չեն հայտնվում, առավել եւս չեն հետապնդվում քաղաքական հայացքների համար:

Սա ոչ այլ ինչ է, քան քաղաքական հետապնդում:
Հ.Գ.-Ի դեպ, եթե մեր օրերի իրավապահների համար երկրի հանձնումը դրա բոլոր հետեւանքներով ավելի պակաս հանցանք է, քան թմրամոլությունը, ապա այս հարցում էլ իրենց անելիքները պետք է տեղափոխեն կառավարության շենք, դեռեւս հեղափոխությունից հետո մամուլում տեղեկություններ տարածվեցին, որ փոխվարչապետերը հենց աշխատանքի ժամին, իրենց աշխատասենյակներում այդ գործով են զբաղված, այնպես որ ի գործ:

Անի Սահակյան