Նիկոլ Փաշինյանը կհրահանգի՞ գնդակոծել Սեւ լճի տարածքը

<<Ոչ մի խուճապ չկա, ամեն ինչ գնում է իր հունով>>։ Ահա, այսպիսին է այն պետության Պաշտպանության նախարարի արձագանքն այն իրավիճակին, երբ արդեն երեք օր է թշնամին անարգել ներխուժել է իր սուվերեն տարածք, 3,5 կիլոմետր խորացել մեր հողում, զորքեր, հենակետեր դնել եւ հեռանալու մտադրություն էլ չունի, չնայած որ երեք օր է ռուս խաղաղապահների միջնորդությամբ ինտենսիվ բանակցություններ են ընթանում։ Իսկ ՊՆ նախարարը հպարտորեն հայտարարում է, թե ամեն ինչ իր հունով է գնում։ Իյա՜, իրո"ք, իսկ միգուցե այսով խոստովանում եք, որ ձեր բարեկամների հետ բանավոր պայմանավորվածության եք եկել. նրանց հանձնել նաեւ Իշխանասարը՝ Սեւ լճի ողջ տարածքով, դրա համար էլ այսպիսի անխռով հանգստություն եք պահպանում եւ ցինիկաբար նետում, թե ամեն ինչ գնում է իր հունով։

Ամեն ինչ իր հունով կգնար, եթե Հայաստանն այդքան չավիրեիք, չոչնչացնեիք հայկական բանակը, դիրքերն անառիկ պահեիք, որ թշնամին առանց արգելքի չսլանար առաջ, չզավթեր մեր սահմանները եւ տեղեկատվական տիրույթում էլ դա չներկայացներ Ադրբեջանի պատմական տարածք։ Իսկ եթե հանկարծ շշկռեին, ինչպես կասեր Արարատ Միրզոյանը, պետք է ստանային արժանի պատիժը։ Հայաստանը, ի դեմս ՊՆ-ի եւ ԱԱԾ-ի, պարտավոր էր կամ գերի վերցնել սահմանախախտներին, կամ էլ նրանց ոչնչացնել։ Եթե մեծ խմբով էին ներթափանցել, եթե տեղում կանխելն անհնար էր, ապա նույնիսկ հիմա Նիկոլ Փաշինյանն ունի լեգիտիմ իրավունք իր ղեկավարած պետության սահմաններ օկուպացրածներին ոչնչացնել՝ տալով մի հրթիռ արձակելու հրաման։ Կտա՞ այդ հրամանը, կասենք, այո, ամեն բան գնում է իր հունով: Բայց քանի որ վաղուց բոլորիս հասկանալի է, թե ովքեր են այս իշխանություններն ու ինչ առաքելությամբ են բազմել ղեկին, ապա Վաղարշակ Հարությունյանի հայտարարությունը պետք է ընդունել առավել քան ուղիղ իմաստով, որ, այո, ամեն բան գնում է իր հունով եւ այսպես էլ պետք է լիներ։

Եթե հիշում եք, վերջերս պաշտպանության նախարարը Արավուսի հովվին մեղադրեց սահմանային միջադեպ հրահրելու հարցում՝ նշելով, որ հովիվն անցել է սահմանը, բնական է, որ պետք է լիներ քաշքշուկ, միջադեպ։ Վաղարշակ Հարությունյանն, իհարկե, լավ կանի մի սեմինար կազմակերպի սահմանամերձ համայնքների ընտանի կենդանիների համար եւ ինքն էլ վարի այդ սեմինարը՝ կենդանիներին բացատրելով, որ չի կարելի սահմանն անցնել, այլապես հովիվները պարբերաբար կարող են նման պատմությունների մեջ հայտնվել։ Բայց նա ինչպես երեւում է չի ցանկանում ավելորդ ձեւականությունների ետեւից ընկնել եւ կարծում է, որ վաղ, թե ուշ ամեն բան իր հունով կգնա,եւ իրենց իշխանույունը մեր հարյերնի տարածքները իրենց <հունով> կհանձնի հակառակորդին։ Ուշագրավ է, որ մինչ նախարարը հորդորում էր խուճապի չմատնվել, ամեն բան լավ է, կամ առնվազն վերահսկելի, Սյունիք գործուղված փոխվարչապետ Տիգրան Ավինյանը բոթում էր, թե պետք է սպասել անցանկալի զարգացումների։ Իշխանության հակասական հայտարարություններն արդեն մտահոգվելու առիթ են տալիս եւ գուժում, որ ամեն բան չէ, որ իր հունով է գնում։ 

Անի Սահակյան