Ռուսաստանից հաշիվ կպահանջեն

«Ադրբեջանցիները 1974 թ-ի քարտեզը ձեռքներին եկել էին, ինչ-որ մի բարձունքի վրա կանգնել, ասում էին՝ սա մերն է։ Հիմա գնում է այդ լարվածության հետ կապված խնդիրների լուծման և հստակեցման պրոցեսը»։ Այս մասին լրագրողների հետ ճեպազրույցում ասաց Ազգային ժողովի պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։
«Հիմա բանակցում են, հենց հիմա այնտեղ է գտնվում ռուսական կողմի ներկայացուցիչը, մեր սահմանապահ զորքերի հրամանատարը։ Բանակցությունների փուլում ենք, և ես համոզված եմ, որ դա ավարտվելու է հանգուցալուծմամբ»,- ասաց Քոչարյանը։
Նիկոլ Փաշինյանի իշխանության ազգակործան պատուհասները անգամ 44-օրյա պատերազմից, Արցախը կորցնելուց, հազարավոր զոհերից հետո հետեւություններ չեն արել եւ շարունակում են անպատասխանատու, ցինիկ պահվածքը ինչպես ներքին, այնպես էլ արտաքին լսարանի առջեւ: Մինչ Սյունիքում սահմանային միջադեպի մասին տեսանյութեր էին հրապարակվում եւ համայնքային պաշտոնյաները խոստովանում, որ թշնամին 3-4 կիլոմետր առաջխաղացում է ունեցել եւ մեզ համար կարեւոր ռազմավարական նշանակության Սեւ լիճը վերցրել իրենց վերահսկողության տակ, ԱԺ Պաշտպանության հանձնաժողովի նախագահ Անդրանիկ Քոչարյանը ստախոսությամբ եւ պոռոտախոսությամբ էր զբաղված: Մասնավորապես,Գորիսի համայնքապետի տեղակալ Իրինա Յոլյանը ֆեյսբուքի իր էջում գրել էր, որ Իշխանասարի հատվածում թշնամին պետական սահմանը անցել է և ևս երեք կիլոմետր առաջ եկել դեպի Վերիշեն բնակավայր։
Իսկ Անդրանիկ Քոչարյանը հերքում է նաև ադրբեջանական զինուժի առաջ գալու մասին լուրը․ «Ընդամենը մեկ դիրք է, ոչ մի առաջ գալ չկա։ Մի հատ բարձունք կա այդտեղ, այդ բարձունքն է, ընդ որում՝ չպահպանվող բարձունք էր։ Հիմա գնում են հստակեցումներ, ճշտումներ»: Ուշ երեկոյան Նիկոլ Փաշինյանի գլխավորությամբ անցկացված Անվտանգության խորհրդի նիստից հետո անգամ Փաշինյանը խոստովանեց, որ 3,5 կիլոմետր առաջ են եկել ՀՀ պետական սահմանից եւ իրավիճակը գնահատեց ճգնաժամային, որը անելիքներ է պահանջում:
Եւ քանի որ Քոչարյան Անդրանիկը դե ֆակտո պաշտպանության նախարարն է եւ նա է իր ընկերոջ՝ Վվաղարշակ Հարությունյանի փոխարեն որոշումներ կայացնում, կարծում ենք, որ լուրջ բախում է լինելու նրա եւ Նիկոլ Փաշինյանի միջեւ: Ի վերջո, մադն ասում է, որ մեդիատեռոր են իրականացնում, մտածված խուճապ են տարածում ժողովրդի մեջ, որ չկա նման բան, ինչ առաջ գալ, ինչ կմ խորանալ, եղած-չեղածը մի բարձունք է: Այնպես որ, իմքայականները բոլոր հիմքերն ունեն Փաշինյանին կարգելու թիվ մեկ մեդիատեռորիստ: Բայց սա դեռ ամենը չէ:

Անդրանիկ Քոչարյանը` անդրադառնալով Սյունիքում ստեղծված իրավիճակին, ասել է. «Այս հարցում Ռուսաստանը մտածելու տեղ ունի, քանի որ հրադադարի կնքման հարցում ՌԴ-ն ծանրակշիռ դեր ունի»: Նա նաև նշել է, որ Սյունիքում ստեղծված խնդրի լուծմամբ հիմա զբաղված են ՌԴ ներկայացուցիչները` ամենաբարձր մակարդակով։
Ինչպես ասում են՝ սրանով ամեն ինչ ասված է, վերջ: Հայաստանն այլևս գոյություն չունի: Սրանից հետո որ սահմանային խնդիրներ են լինում Ադրբեջանի հետ, պետք է Ռուսաստանից հաշիվ պահանջենք, մի հատ էլ մուննաթ գանք, թե ինչու մեր սահմաններն անառիկ չի պահում: Սա է այս իշխանության դեմքը, այսպիսին է սրանց տված ներկան , իսկ ապագայի մասին անգամ մտածել է սարսափելի:

Անի Սահակյան