Նիկոլը շարունակում է կործանել երկիրը

Այդպիսի ժողովրդական արտահայտություն կա՝ «ստերի հերն անիծեց»: Այս արտահայտության իմաստը ոչ թե այն է, որ ստերը կամ ինչ-որ կեղծ տեղեկություն ինչ-որ մեկը բացահայտեց ու ցույց տվեց դրա սուտ (կեղծ) լինելը, այլ հակառակը: Այո, այդ արտահայտությունը նշանակում է, որ ինչ-որ մեկը այնպիսի ստեր, անհավանական բաներ ասաց, այնպես փչեց, որ «ստերի հերն անիծեց», այսինքն՝ այդ նոր ստերով ծածկեց նախորդ ստերը:

Հիմա նիկոլ փաշինինն է: Ասենք, ինչո՞ւ «հիմա». մի երկու տասնամյակ լրագրողի կարգավիճակով է ստել, մի 8 տարի՝ պատգամավորի կարգավիճակով ստեց, ապա 3 տարի ստեց, խաբեց ու կեղծեց ՀՀ վարչապետի կարգավիճակով, հիմա էլ շարունակում է ստել որպես նախկին վարչապետ և վարչապետի պարտականություններն ապօրինաբար յուրացրած ապագա մեղադրյալ: Առիթ ունեցել ենք ասելու (գնահատելի է, որ այլոք մեր այդ ֆրազը վերցրեցին և տարածում են), որ կա սուտ, լկտի սուտ և նիկոլ փաշինի ասածները՝ որպես ստի գերադրական աստիճան:

Այլ իրավիճակ ու հոգեվիճակ լինեին, նիկոլ փաշինն ու իր ստերը սպանիչ ծաղրի, ծաղրուծանակի առարկա կդարձնեինք: Բայց առայժմ նիկոլ փաշինն է սպանում: Սպանում է իր իշխանության ապիկարության հետևանքով տարածված համաճարակով, սպանեց իր իշխանության մեղքով ու ապիկարության հետևանքով ծավալված պատերազմում, հիմա էլ ամեն օր շարունակում է սպանել Հայաստանն ու երկրի, ժողովրդի ապագան:

Ընդհանուրից գանք մասնավորին: «Փչան Թոդորոսն» օրերս, մասնավորապես, իր կրկնակի հրաժարման-չընտրման պրոցեդուրայի ժամանակ հայտարարել է՝ եթե ինքը, այսինքն՝ ՀՀ կառավարությունը չուզենար, որ ԱՄՆ նախագահ Բայդենը «Հայոց ցեղասպանություն» բնորոշումը գործածեր, նա չէր գործածի: Մի խոսքով, տեսել-լսել-կարդացել եք, նման մի բան է ասել:

Հա, բազմաթիվ ստերի շարքում ուշադրություն գրավեց և այն, թե նիկոլ փաշինն ինչպես է իրեն ու իր գլխավորած երկրաքանդ ու պարգևավճարացավի եկած կառավարությանը վերագրում Սևանա լճի մակարդակի բարձրացումը:

Սկսենք Բայդենից: ԱՄՆ նախագահ Ջո Բայդենը, փաստորեն, Հայաստանին ու հայությանը վերաբերած հարցերում, ըստ նիկոլ փաշինի, իր հայտարարություններն ու գործողությունները ճշտում է անձամբ նիկոլի ու ՀՀ կառավարության հետ, և հետո միայն արտահայտվում: Ենթադրենք (չնայած դա խելացնորություն է), բայց ենթադրենք, թե իրոք այդպես է: Տեղում ու միանգամից գալիս ենք հետևության, որ Ջո Բայդենը անձամբ նիկոլ փաշինի ու նրա չարաղետ կառավարության ցանկությամբ ոչ միայն արտասանել է «Հայոց ցեղասպանություն» բառակապակցությունը, այլև... դրանից 10 օր անց թույլատրել է ԱՄՆ-ի կողմից Ադրբեջանին ռազմական օգնություն ցուցաբերելու թույլտվությունը: Հաշվի առնելով, թե նիկոլ փաշինն ու իր թրքահպատակները ինչպիսի մոլեռանդությամբ են սպասարկում Հայաստանի ու հայության թշնամիների շահերը՝ կարելի է միգուցե չբացառել, որ նիկոլ փաշինն էլ է Բայդենին խնդրել, որ ԱՄՆ-ն շարունակի ռազմական օգնություն ցուցաբերել Ադրբեջանին:

Եթե մարդը նիկոլավիրուսով ախտահարված չէ, ուղեղն առկա է և շարունակում է գործել, ապա մեզանից ոչ պակաս արագ ու նաև ինքնուրույն հասկանում է, որ նիկոլ փաշինն ուղղակի փչում է, իսկ ԱՄՆ նախագահն էլ ըստ իր պետության և իր ներկայացրած ուժի հետապնդած քաղաքական շահերի ու նպատակների է արտասանում այս կամ այն բառը, ստորագրում այս կամ այն որոշումը:

Ինչ վերաբերում է Սևանին, ապա լիճն ասում են՝ բարձրացած ջրերով բուռն ալեկոծվել է նիկոլ փաշինի արած հայտարարությունից հետո, նույնիսկ ցանկացել է մի 15 րոպեով իր գիրկն առնել նիկոլ փաշինին՝ առանց ակվալանգի:

Իսկ այն, որ Սևանա լիճը երկու տարի ավելի ու ավելի է ծաղկում, այն, որ ափամերձ տարածքների մաքրման լուրջ աշխատանքներ կան, որոնք, սատանան գիտե, թե ինչպես են իրականացվում, եթե իրականացվում են առհասարակ, դա հեչ: Ու ո՞վ և ինչի՞ մասին է գլուխ գովում, էլի: Նիկոլ փաշի՞նը, որ խմելու ջրերի հսկայական ռեսուրսներ է հանձնել թշնամուն: Նիկոլ փաշի՞նն է Սևանա լճի մակարդակը բարձրացնելուց խոսում, որ Սևանի արևելյան ափամերձ գոտին վերստին դրել է թշնամու հրաձգային կրակի հասանելիության տակ՝ հանձնելով Քարվաճառը:

Ու ընդհանրապես, վաղո՜ւց անցել է ժամանակը՝ նիկոլ փաշին կոչվող արյունահեղ խեղկատակի ստերը բանատեղ դնելու համար: Ավելին, այժմ նրա ստերը ոչ թե բնորոշում են ստախոսին, որի նկարագիրն ու էությունն ակնհայտ են, այլ բնորոշում ու բնութագրում են այդ ստերն ու ցնդաբանությունները հալած յուղի տեղ ընկալողներին:

Վերջիններս, շարժելով ամենամոլի աղանդավորների նախանձը, շարունակում են «ապրել» ինչ-որ հորինված նիկոլական աշխարհում: Դա պատրանքն է:

Իսկ իրականությունն այն ողբերգությունն է, որ կատարվում է Արցախի մնացորդների վրա, որ կատարվում է Սիսիանի բարձունքներում, որ կատարվում է այստեղ ու հիմա:

Միակ հարցն այն է, թե դեռ որքան կտևի այս աղետը: Եվ արդյոք արժե՞ ասել՝ մնաց 39 օր: Գուցե մենք այդ 39 օրն է՞լ չունենք արդեն:

Արմեն Հակոբյան

7or.am