Փաշինյանի նոր խայտառակությունը. հայ գերիներին «կալանավոր» են անվանում

Պետք չէ հիմա գործընթացը քաղաքականացնել, Երևանում այսօր լրագրողների հետ հանդիպմանը հայտարարել է ՌԴ ԱԳ նախարար Սերգեյ Լավրովը՝ հորդորելով չքաղաքականացնել այն գործընթացները, որոնք ընթանում են Լեռնային Ղարաբաղում խաղաղ կյանք հաստատելու համար: «Գործընթացները բավականին բարդ են ընթանում, քանի որ լուծվում են հարցեր, որոնք կապված այս շրջանը երթուղիներին միացնելուն, լուծվում են շփման գծում սահմանների դեմարկացիայի և դելիմիտացիայի հարցեր: Դրանք գործնական, հասկանալի բաներ են, որոնք պետք է լուծվեն, որպեսզի տարածաշրջանը շնչի ազատորեն և սկսի ապրել խաղաղ կյանքով», - ասել է Սերգեյ Լավրովը:

Ահա, ինչպես և կանխատեսել էինք, Լավրովը Երևան է ժամանել՝ արձանագրելու ընթացող երթուղիների միացման, շփման գծում սահմանների դեմարկացիայի և դելիմիտացիայի հարցերի շուրջ ընթացող պրոցեսները: Նա դա ներկայացվել է, որպես միանգամայն օրինաչափություն, որոնք պետք է լուծվեն:

Փաշինյանի իշխանությունը ամեն ինչ գցել է «ռուսների գրպանը»՝ ինքը համաձայնություններ է տալիս, բանակցում, Լավրովը գալիս է Երևանում դժգոհում, թե ինչո՞ւ եք քաղաքականացնում թեման:

Ավելին, Լավրովը շեշտում է, որ տնտեսական կապերի ապաշրջափակման գործում Հայաստանի, Ռուսաստանի և Ադրբեջանի փոխվարչապետների աշխատանքի հաջողությունը որոշիչ նշանակություն կունենա տարածաշրջանում ընդհանուր իրավիճակի կարգավորման համար անհրաժեշտ պայմաններ ստեղծելու գործում:

Ու ոչինչ, որ Բաքուն նույնիսկ հայ ռազմագերիներին չի վերադարձնում, բայց փաստորեն, դա որևէ մեկին չի անհանգստացնում, կարևորը՝ կոմունիկացիաներն են: Լավրովը միայն ասել է, թե չեն նվազեցնում ջանքերը, որոնք ուղղված են բոլոր պահվողներին տուն վերադարձնելու հարցում:

Ի դեպ, երեկ երեկոյան ԵԱՀԿ Մինսկի խմբի համանախագահները հանդես էին եկել հայտարարությամբ, որում ողջունել էին Ադրբեջանի կողմից երեք հայ ռազմագերիների ազատ արձակումը:

Այսպես ողջունելով, հավանաբար նրանք կշարունակեն տարիներով՝ 2-3 ռազմագերիների վերադարձը ողջունել, առանց պահանջներ ներկայացնելու ու դատապարտելու Ադրբեջանի իշխանության պահվածքը: Օրեր առաջ տեղեկատվություն ստացվեց, որ 19 հայ ռազմագերիներ են սպանվել ադրբեջանական բանտերում: Եվ ի՞նչ, ԵԱՀԿ Մինսկի խումբը ասելիք չունի՞...

Ունի, պարզվում է, այդ ռազմագերինը, որոնք շարունակվում են պահվել, «ձերբակալված» անձիք են:

Համանախագահները երեկ կոչ են արել կողմերին՝ «ամբողջությամբ և արագորեն ավարտել ձերբակալվածների և զոհվածների մասունքների փոխանակման գործընթացը, հարգել կալանավորների նկատմամբ մարդասիրական վերաբերմունքն ապահովելու պարտավորությունները»:

Հիշեցնելով ապրիլի 13-ի իրենց հայտարարությունը` համանախագահները կողմերին հորդորում են փոխանակել բոլոր տվյալները, որոնք անհրաժեշտ են հակամարտության շրջանների արդյունավետ ականազերծման համար, ևս մեկ անգամ կոչ անում վերացնել Լեռնային Ղարաբաղ մուտքի սահմանափակումները, այդ թվում` միջազգային մարդասիրական կազմակերպությունների ներկայացուցիչների համար:

Համանախագահները խրախուսում են կողմերին` ձեռնարկելու կոնկրետ քայլեր փոխվստահության մթնոլորտ ստեղծելու համար` ի նպաստ խաղաղության ամրապնդման` միաժամանակ հիշեցնելով արդեն նախկին հայտարարությունում մատնանշած կետերին, ինչը, մասնավորապես, ներառում է բարձր մակարդակի քաղաքական երկխոսության վերսկսումը համանախագահների հովանու ներքո առաջին իսկ հնարավորության դեպքում:

Երեկ ավելի վաղ նաև ԱՄՆ պետքարտուղար Էնթոնի Բլինքենն էր հայտարարությամբ ողջունել հայ ռազմագերիների վերադարձը: Թվիթերում նա գրել էր, որ Միացյալ Նահանգները կոչ է անում կողմերին ամբողջությամբ և արագորեն ավարտել պահվող բոլոր անձանց փոխանակման գործընթացը և հարգել կալանավորների նկատմամբ մարդասիրական վերաբերմունքն ապահովելու պարտավորությունները:

Ի դեպ, մինչ Լավրովը Երևանում է՝ երեկ ՌԴ նախագահ Վլադիմիր Պուտինը և Թուրքիայի նախագահ Ռեջեփ Էրդողանը հեռախոսազրույցում անդրադարձ են կատարել Լեռնային Ղարաբաղի իրավիճակին: «Անդրադարձ է կատարվել Լեռնային Ղարաբաղի հակամարտության կարգավորման խնդիրներին, այդ թվում` կրակի և հակամարտության գոտում բոլոր ռազմական գործողությունների դադարեցման վերահսկողության ռուս-թուրքական կենտրոնի գործունեության համատեքստում»,- ասվում էր Կրեմլի մամուլի ծառայության տարածած հաղորդագրությունում:

Եթե Լավրովի՝ Երևան գալուց առաջ Պուտինն ու Էրդողանը ԼՂ խնդիր են քննարկում, ուրեմն՝ նրանք ունեն խոսակցության կոնկրետ թեմա, ճշգրտման կարիք ունեցող հարցեր: Թերևս, հենց դրանք էլ Լավրովը բերել է Երևան:

Իսկ ընդհանուր առմամբ՝ Փաշինյանի իշխանության անգործության պատճառով, փաստորեն, ԵԱՀԿ Մինսկի խմբի համանախագահող պետությունները սկսել են մեր գերիներին «ձերբակալված» անվանել, այսինքն, այնպես ինչպես ներկայացնում է Բաքուն:

Մետաքսյա Շալունց