Հիմա ինչ պատուհաս է «եփվում» Հայաստանի գլխին

Ռուսաստանի արտաքին գործերի նախարար Սերգեյ Լավրովը մայիսի 5-6-ը աշխատանքային այցով կկատարի Երևան, իսկ մայիսի 10-11-ին` Բաքու: Այս մասին նախօրեին ճեպազրույցում հայտարարեց ՌԴ ԱԳՆ պաշտոնական ներկայացուցիչ Մարիա Զախարովան:

«Գոյություն ունեցող պայմանավորվածություններին համապատասխան՝ Ռուսաստանի արտաքին գործերի նախարարության ղեկավարը մայիսի 5-6-ը աշխատանքային այցեր կկատարի Երևան, իսկ մայիսի 10-11-ը՝ Բաքու», - ասել է նա:

Մինչ Լավրովը կժամանի՝ Ռուսաստանի արտգործնախարարը օրերս հեռախոսազրույց ունեցավ Ադրբեջանի իր գործընկեր Ջեյհուն Բայրամովի հետ: Ռուսաստանի ԱԳՆ հաղորդագրության մեջ նշվում էր, որ նախարարները քննարկել են Ռուսաստանի, Հայաստանի և Ադրբեջանի առաջնորդների՝ 2020թ. նոյեմբերի 9-ին և 2021թ. հունվարի 11-ին ձեռք բերած պայմանավորվածությունների իրականացման ընթացքը, այդ թվում եռակողմ աշխատանքային խմբի աշխատանքները տրանսպորտային և տնտեսական կապերի ապաշրջափակման ուղղությամբ: Կողմերը նաև քննարկել էին երկկողմ հարաբերությունների արդիական հարցեր, այդ թվում առաջիկայում սպասվող բարձր մակարդակի շփումները:

Ինչո՞ւ է Լավրովը գալիս Երևան ու Բաքու... Չափազանց խորաթափանց չպետք է լինել, որպեսի կռահել, որ, եթե անձամբ Լավրովն է գալիս, ուրեմն, վրա է հասել ղարաբաղյան բանակցային հերթական կարևոր փուլը:

Չի բացառվում անգամ, որ Հայաստան-Ադրբեջան-Ռուսաստան նոր փաստաթուղթ էլ ստորագրվի:

Ամբողջ հարցն այն է, որ Հայաստանում ամեն ինչի մասին տեղեկություն հասարակությունը ստանում պոստ-ֆակտում: Մեր երկրի նախագահն անգամ նոյեմբերի 9-ի եռակողմ հայտարարության ստորագրման առիթով, պարզվեց, հաջորդ օրը թերթերից էր ծանոթացել, որ նման փաստաթուղթ է ընդունվել:

Այնպես որ՝ «անակնկալները» չեն բացառվում՝ Լավրովի այցից հետո:
Ու եթե Լավրովը նախ Երևան է ժամանելու, հետո՝ Բաքու, ուրեմն, նախ Երևանում ունի բանակցելու, համաձայնեցնելու թեմաներ, ապա հետո՝ դրանք Բաքու տանելու առաքելություն:

Մնում է հասկանալ, թե՝ հիմա ի՞նչ պատուհաս է հիմա «եփվում» Հայաստանի գլխին:

Մետաքսյա Շալունց