Սերժ Սարգսյանը կորոշի. ՀՀԿ -ում խմորումներ են

Մի քանի շաբաթ է Հանրապետական կուսակցությունում թեժ քննարկումներ են հունիսի 20-ի ընտրություններին մասնակցելու հարցի շուրջ: Սերժ Սարգսյանը կարծում է, որ ճիշտը չմասնակցությունն է: Սերժ Սարգսյանը հարցում է պատվիրել, որոնց արդյունքները մխիթարիչ չեն, նա իր կուսակիցներին ներկայացրել է հարցումների արդյունքները եւ ասել, որ հատկապես միայնակ մասնակցությունն անցանկալի է, պետք է բանակցել եւ այլ ուժի հետ գնալ ընտրության: Մասնավորապես, բանակցություններ կան ԱԱԾ նախկին տնօրեն Արթուր Վանեցյանի հետ: Վերջին ամիսներին Սերժ Սարգսյանն ու Վանեցյանը հաճախակի հանդիպումներ են ունենում, քաղաքական կոnսուլտացիաներ իրականացնում:

Մեզ հայտնի է դարձել, որ նախօրեին Սերժ Սարգսյանն այցելել է Վանեցյանի տուն, սակայն դեռեւս համաձայնության չեն եկել: Արթուր Վանեցյանը իր շրջապատում դժգոհել է, որ այդպես էլ չի հասկանում՝ ինչ է ուզում Սերժ Սարգսյանը: Ինքն անձամբ դեմ է, որ ՀՀԿ-ի վարկաբեկված գործիչները՝ Արմեն Աշոտյանը, Էդուարդ Շարմազանովը, Վահրամ Բաղդասարյանը եւ այլք, հայտնվեն իր զուցակում, նա պատկերացնում է հնարավորինս անհայտ անուններ, բայց մեծ աջակցություն ՀՀԿ-ից, ինչը մեծ դժգոհություն է առաջացրել մյուս կողմում: Սերժ Սարգսյանը հասկանում է, որ նման համաձայնությունը կկազմաքանդի կուսակցությունը եւ շատերը կմիանան Ռոբերտ Քոչարյանին:

ՀՀԿ-ում կարծում են, որ եթե պետք է դաշինքով մասնակցեն, ապա որեւէ կողմ չպետք է նախապայման դնի եւ ցուցակն էլ պետք է գլխավորի ՀՀԿ-ական, քանի որ փորձառությամբ ՀՀԿ-ն որեւէ կուսակցության չի զիջում: Սերժ Սարգսյանին ասել են, որ ամոթալի է, որ իրենք օգտվեն ինչ-որ ուժի կռճոններից,ու դաշինքի դեպքում վատագույն սցենարով պետք է ցուցակը կազմվի 50/50 սկզբունքով: Հակառակ դեպքում ՀՀԿ-ն կպառակտվի եւ զգալի թվով ՀՀԿ-ականներ այլ ապաստան կգտնեն, իսկ շատերը կողմ են Ռոբերտ Քոչարյանի հետ համագործակցությանը, որովհետեւ վստահ են, որ Նիկոլ Փաշինյանի ընդդիմադիր այլընտրանքը Քոչարյանն է լինելու: Հատկապես գործարարների մեծ մասը արդեն բանակցում է Քոչարյանի հետ: Կա մի խումբ ի դեմս Տարոն Մարգարյանի, որ կարծում են ՀՀԿ-ն եւ մարդկային եւ ֆինանսական ռեսուրս ունի իրեն թույլ տալու միայնակ մասնակցել:
Քննարկվել է նաեւ Միքայել Մինասյանի ստեղծած ուժին աջակցելու հարցը, բայց այն էլ կարծես չի ընդունվել: Սերժ Սարգսյանը ՀՀԿ-ականներն ասել է, որ առաջիկա օրերին ինքը կորոշի ինչպես են անում եւ կտեղեկացնի:

Անի Սահակյան