Ինչու հենց Արշակ Կարապետյանը. Փաշինյանը ինչ մեսիջ է հղում

Ապրիլյան պատերազմից հաշված օրեր հետո Սերժ Սարգսյանի հրամանագրով Զինված ուժերի Գլխավոր շտաբի հետախուզական վարչության պետի պաշտոնից թերացման պատճառով հեռացված Արշակ Կարապետյանը կրկին վերադառնում է Գլխավոր շտաբ: Նիկոլ Փաշինյանն Արշակ Կարապետյանին նշանակել է ԳՇ պետի առաջին տեղակալի պաշտոնում՝ Տիրան Խաչատրյանի փոխարեն: Հիշեցնենք, որ Կարապետյանի գլխավորած հետախուզական վարչությունը թերացել էր իր պարտականություններում, և հայկական կողմը բավարար տեղեկություններ չէր ստացել 2016-ին առ այն, որ ադրբեջանական կողմը դիվերսիոն լայնամասշտաբ գործողությունների է նախապատրաստվում:

2018 թվականի դեկտեմբերից արդեն Արշակ Կարապետյանը միացավ հեղափոխական թիմին և նշանակվեց վարչապետ Նիկոլ Փաշինյանի խորհրդական: Մամուլում տեղեկություններ տարածվեցին, որ Կկարապետյանը միակ մարդն է, որը Մարտի 1-ի գործով ցուցմունք է տվել Ռոբերտ Քոչարյանի դեմ, 2008-ի փետրվարի 23-ին պաշտպանության նախարարի հույժ գաղտնի 0038 հրամանով ստեղծված կայազորում Արշակ Կարապետյանը նշանակվել էր ՀՀ կայազորի պետի տեղակալ՝ հատուկ հանձնարարությունների գծով : Երկրորդ նախագահի դեմ իր ցուցմունքի համար Փաշինյանը նրան նշանակեց իր խորհրդականի պաշտոնում:
Թե արցախյան 44-օրյա պատերազմի ժամանակ Նիկոլ Փաշինյանին ինչ խորհուրդներ է տվել և որ արժանիքի համար է այժմ պաշտոնեական առաջխաղացման արժանանում, հայտնի չէ:
Նիկոլ Փաշինյանը ըստ էության վերջնականապես բանակը տանում է կազմաքանդման եւ այստեղ վերջին ժամանակների նշանակումները կայացվում են ոչ թե րոֆեսիոնալիզմի սկզբունքից, այլ քաղաքական նպատակահարմարության: Արշակ Կարապետյանի նշանակմամբ Նիկոլ Փաշինյանը թերեւս մեսիջ է հղում բոլորին առ այն, որ իր գլխի վրա, ամենաբարձր պաշտոնում կտեղավորի բոլոր նրանց, ովքեր պատրաստ են իր գլխավոր ախոյան, մրցակից Ռոբերտ Քոչարյանին դեմ դուրս գալ: Սա քայլ է ընդդեմ Քոչարյանի, հանուն Թուրքիայի, որը երազում է հայոց բանակը հիմնահատակ կազմաքանդված տեսնել:
Նշենք, որ ԳՇ նախկին պետ Օնիկ Գասպարյանը մարտին ստորագրել էր գլխավոր շտաբի պետի առաջին տեղակալ Տիրան Խաչատրյանի արձակուրդի հրամանը, և երբ ՊՆ ղեկավար Վաղարշակ Հարությունյանն աշխատանքից ազատել է Խաչատրյանին, վերջինս արձակուրդում էր։
Տիրան Խաչատրյանին աշխատանքից ազատ արձակելու որոշումը նախագահը կայացրել է փետրվարի 24-ին ՝ վարչապետ Նիկոլ Փաշինյանի առաջարկով։ Աշխատանքից ազատվելու պատճառը գեներալ-լեյտենանտի արձագանքն էր Փաշինյանի այն հայտարարությանը, թե «Իսկանդերի» հրթիռը մարտական գործողությունների ժամանակ պայթել է 10 տոկոսով:
ՀՀ ԶՈւ ԳՇ պետի նախկին առաջին տեղակալ, ՀՀ ազգային հերոս Տիրան Խաչատրյանը նոր հայցադիմում է ներկայացրել ՀՀ վարչական դատարան՝ ընդդեմ ՀՀ ՊՆ նախարար Վաղարշակ Հարությունյանի և ՀՀ ԶՈւ գլխավոր շտաբի։

Անի Սահակյան