Չորրորդ զորավարժությունը վերջին 4 ամիսներին. Ինչ են Պուտինին հասկացնում Էրդողանն ու Ալիևը

Ապրիլի 8-9-ն Ադրբեջանը Թուրքիայի հետ իր տարածքում համատեղ օպերատիվ-մարտավարական զորավարժություններ կանցկացնի, հայտնեց ադրբեջանական ՊՆ-ն՝ վկայակոչելով Ադրբեջանի Հանրապետության պաշտպանության նախարարությունը: Նշվում է, որ միջոցառումները տեղի են ունենալու ադրբեջանական բանակի «զինվորական միավորումների պատասխանատվության գոտիների տարբեր ուղղություններում» տեղակայված համաբանակային պոլիգոններում:

Այսպես, Ադրբեջանի և Թուրքիայի զինված ուժերն ապրիլի 8-9-ը ևս մեկ օպերատիվ-մարտավարական զորավարժություն են անցկացնում։ Աղբյուրի համաձայն՝ վարժանքները կանցկացվեն ադրբեջանական համազորային զորավարժարաններում, դրանց նպատակն է բարելավել ադրբեջանական և թուրքական բանակների օպերատիվ ստորաբաժանումների փոխգործակցությունը և մարտունակությունը։

Սա կլինի թուրք-ադրբեջանական արդեն չորրորդ զորավարժությունը այս տարվա չորս ամիսների ընթացքում։ Երկու երկրների զինված ուժերի հերթական համատեղ վարժանքները մեկնարկել է ապրիլի 6-ից, դրանք երկու երկրների կապի զորքերի զինծառայողների մասնակցությամբ։

Երեկվանից մեկնարկած և մինչև այսօր շարունակվող վարժանքների ընթացքում զինվորականները պետք է լուծեն կապի միասնական համակարգի կազմակերպմանն ուղղված խնդիրներ, կապավորներին հանձնարարվել է նաև ապահովել զորքերի փոխգործակցությունը, կառավարման դաշտային կենտրոնների ձևավորումը։ Եվս մեկ օպերատիվ-մարտավարական զորավարժություն էլ ապրիլի 8-9-ինն են։ Ադրբեջանն ու Թուրքիան բարելավում են ադրբեջանական և թուրքական բանակների օպերատիվ ստորաբաժանումների փոխգործակցությունը և մարտունակությունը։

Սա կլինի թուրք-ադրբեջանական արդեն չորրորդ զորավարժությունը այս տարվա չորս ամիսների ընթացքում։ Նախորդ ամսվա կեսերին պլանային զորավարժություն էր. 10 000 անձնակազմ, մինչև 100 միավոր զրահատեխնիկա, 200 միավոր հրթիռահրետանային միջոց, 30 միավոր ավիացիոն միջոց, այդ թվում՝ ԱԹՍ-ներ։ Փետրվարին էլ Կարսում համատեղ զորավարժությունների ժամանակ նոր՝ հիմնականում հարձակողական զինատեսակներ ցուցադրվեցին։

Ի՞նչ է նշանակում զորավարժությունների այսպիսի հաճախականությունը, պատերազմի ավարտից հետո, ու դրանք գերազանցում են նախորդող տարիներին։ Իհարկե, պատերազմից հետո կա հոգեբանական գործոնը, թուրք-ադրբեջանական դաշինքը փորձում է վախեցնել հայկական կողմին՝ դրա արդյունքում ցանկալի զիջումներ ստանալ արդեն կոմունիկացիոն հարցերում:

Բայց ամենակարևորը՝ Ադրբեջանն ու Թուրքիան ապագայի հեռու գնացող ծրագիր են մշակում, թուրք-ադրբեջանական համատեղ զորամիավորում ստեղծելու ճանապարհին են։ Այսինքն՝ ՆԱՏՕ-ի անդամ Թուրքիան դիրքավորվում է հետխորհրդային տարածքում, սա էլ մեկ այլ մի խնդիր է Ռուսաստանի համար, որն առայժմ հանդուրժվում է, բայց պարզ չէ, թե մինչև երբ...

Թուրք-ադրբեջանական հերթական զորավարժություններին զուգընթաց Նիկոլ Փաշինյանն այսօր մեկնեց Մոսկվա՝ հանդիպելու ՌԴ նախագահ Վլադիմիր Պուտինի հետ։ Ըստ Կրեմլի՝ կողմերը մտադիր են քննարկել Լեռնային Ղարաբաղի հակամարտության կարգավորման հարցով նախորդ տարվա նոյեմբերի 9-ի և այս տարվա հունվարի 11-ի եռակողմ ռուս-հայ-ադրբեջանական հայտարարությունների կատարման ընթացքը, ինչպես նաև Հարավային Կովկասում տնտեսական և տրանսպորտային կապերի վերականգնմանն ուղղված քայլերը:

Ապրիլի 7-ին Մոսկվա աշխատանքային այցի նախօրեին Նիկոլ Փաշինյանը «Ինտերֆաքսին» տված հարցազրույցում նշեց. «Հայաստանը կենտրոնացած է Ռուսաստանի Դաշնության հետ լայն և երկարաժամկետ ռազմատեխնիկական համագործակցության վրա, ինչը բխում է երկու պետությունների երկարաժամկետ ռազմավարական շահերից»:

Մետաքսյա Շալունց