Սրա համար նորմալ երկրում ԱԺ-ն վարչապետին դուրս կշպրտեր․ Օնիկ Գասպարյանի փաստաբան (video)
ԳՇ նախկին պետ Օնիկ Գասպարյանին առնչվող դատական գործից հետո լրագրողների հետ զրույցում փաստաբան Արամ Օրբելյանն ասաց, որ կան անձի և պետության հարաբերություններ, ՀՀ նախագահը չի ստորագրել Գասպարյանին պաշտոնից ազատման ակտը՝ նշելով, թե Սահմանադրության հետ խնդիրներ կան, հետո ասում են՝ ինչ-որ ֆորմուլայով որոշումն ուժի մեջ է մտել, որից հետո դիմում ենք դատարան, որովհետև այն անձը, որ պետք է դիմեր ՍԴ, չի դիմում, հետևաբար պետք է ընդունվեր մի ակտ, որը սահմանադրականության հետ խնդիրներ ունի, առնվազն ակտն ընդունող մարմնի կողմից այդպես է ընկալվում:
Օրբելյանի փոխանցմամբ՝ դատական նիստի ժամանակ մոտավորապես ասվել է՝ վերջում որ որոշումն էլ ստանան, չեն կատարելու։
«Պատասխանողն ասում է՝ այս որոշումը, որ ստանանք, մի հատ էլ դատի կտաք, կասեք՝ ստիպեք կատարել որոշումը, նոր կկատարենք։ Նման մոտեցման դեպքում ցանկացած իրեն հարգող երկրում վարչապետի ներկայացուցիչը, եթե ինքնագլուխ է արել, գործից կազատվեր, իսկ եթե ինքնագլուխ չէր արել, վարչապետը գործից կազատվեր։ Բացառվում է, որ ԱԺ-ն կամ պատասխանատու մարմինը վարչապետին դուրս չշպրտեր նման մոտեցման համար։ Սրա համար նորմալ երկրում ԱԺ-ն վարչապետին դուրս կշպրտեր: Եթե ներկայացուցչի ինքնուրույն միտքն էր, ինքը պետք է ենթարկվի կարգապահական պատասխանատվության իր գործատուի կողմից, եթե ինքնուրույն չէր, և ներկայացնում է իր վստահորդի շահերը, ապա վստահորդը պետք է ենթարկվի քաղաքական պատասխանատվության»,-ասաց նա:
Հետևեք մեզ Viber-ում
