Աննա Դանիբեկյանը որոշեց՝ գնդակահարել...

Սահմանադրական դատարանը, ինչպես հայտնի է, մարտի 26-ին հակասահմանադրական է ճանաչել ՀՀ քրեական օրենսգրքի 300․1 հոդվածը: Ըստ ՍԴ որոշման՝ այդ տխրահռչակ 300․1 հոդվածը հակասում է Սահմանադրության 78 և 79-րդ հոդվածներին: ՍԴ որոշումը վերջնական է և ուժի մեջ է մտնում հրապարակման պահից:

Հիշեցնենք, որ քայլիստ իշխանությունների կողմից Արցախի առաջին նախագահ, Արցախի հերոս, Հայաստանի երկրորդ նախագահ Ռոբերտ Քոչարյանի, ինչպես նաև Արցախի ազատամարտի հերոսներ, Արցախյան առաջին պատերազմում մեր տարած հաղթանակում անուրանալի ներդրում ունեցած գեներալ-գնդապետներ Միքայել Հարությունյանի, Յուրի Խաչատուրովի, Սեյրան Օհանյանի դեմ իրականացվող հետապնդումը խարսխված էր հենց այդ չարաբաստիկ 300.1 հոդվածի վրա, որն իրականում այս իշխանության կողմից հորինված «սահմանադրական կարգի ենթադրյալ տապալման գործի» անկյունաքարն էր։ Ավելին, Նիկոլ Փաշինյանը դեռ երկու տարի առաջ հայտարարում էր, որ Մարտի 1-ի գործը բացահայտված է, այն պարագայում՝ երբ հայտնի դարձավ, թե որ հոդվածով ու ինչ մեղադրանք է ներկայացված, բազմաթիվ իրավագետներ, փորձագետներ, մեկնաբաններ նշեցին, որ 300.1 հոդվածը գոյություն չունեցող հոդված է եւ, ի վերջո, ՍԴ-ում այդ ավազե տնակը փշրվելու է։ Նիկոլ Փաշինյանը, թերեւս, այդ նպատակով էլ ՍԴ-ի դեմ իր արշավանքներն իրականացրեց, բայց եղավ այն, ինչ եղավ։ Հիմա ՍԴ հայտնի որոշումից անմիջապես հետո ենթադրվում էր, որ դատարանը պետք է կարճի այս գործը, քանի որ աբսուրդ է գոյություն չունեցող հոդվածով գործի քննությունը, բայց այն, ինչ տեղի ունեցավ իշխանության խամաճիկ Աննա Դանիբեկյանի կատարմամբ, ավելին էր քան իրավական ֆարսը, դա պարզապես զավեշտ էր, ծաղր ու մեծ հաշվով բեսպրեդել իրավական հռչակված պետության նկատմամբ։ Դանիբեկյանը փոխարենն անհապաղ քններ Քոչարյանի պաշտպանների միջնորդությունը` գործը կարճելու վերաբերյալ, մեղադրող դատախազի չներկայանալու պատճառով նիստը հետաձգեց։ Ակնհայտ է, որ Նիկոլ Փաշինյանն ու իր վնգստացող դատավորները ցայտնոտի մեջ են եւ քննարկում են գործը նոր սցենարով զարգացնելու ուղղությամբ, այդ պատճառով ժամանակ են փորձում ձգել։

Չնայած Ռոբերտ Քոչարյանի պաշտպան Հայկ Ալումյանը փորձեց Դանիբեկյանի համար «մարդասիրական միջանց բացել», սակայն վերջինս անդրդվելի մնաց․ «ՍԴ-ն ՀՀ քրեական օրենսգրքի 300․1 հոդվածը ճանաչել է Սահմանադրության 78 և 79-րդ հոդվածներին հակասող և անվավեր։ Այս օրվանից ՀՀ քրեական օրենսգրքում գոյություն չունի 300․1 հոդվածը։ Շաբաթ օրը, այսինքն, այդ որոշման հաջորդ օրը ես, պարոն Քոչարյանի պաշտպանների հետ միասին, դատարանի էլեկտրոնային հասցեին ուղարկել ենք միջնորդություն, որպեսզի Քրեական օրենսգրքի 300․1 հոդվածով քրեական հետապնդումը պարոն Քոչարյանի նկատմամբ դադարեցվի, այդ մասով քրեական գործով վարույթը կարճվի, խափանման միջոցը փոփոխվի և դատարանը պարտավորեցնի քրեական հետապնդում իրականացնող մարմիններին գրավոր ներողություն հայցել պարոն Քոչարյանից։ Դա եղել է շաբաթ օրը։ Երկուշաբթի օրը Սահմանադրական դատարանի որոշումը հրապարակվել է ՍԴ պաշտոնական կայքէջում։ Հիմա, անկախ նրանից, մենք կհամարենք, որ Քրեական օրենսգրքի 300․1 հոդվածը դադարել է գոյություն ունենալ մարտի 26-ին, թե երեկ՝ մարտի 29-ին, այս պահին, փաստացի մեր պաշտպանյալի նկատմամաբ հետապնդում է իրականացվում մի հոդվածով, որը Քրեական օրենսգրքում գոյություն չունի։ Դուք հիմա գոնե մեր միջնորդությունը քննարկեք, ավելին՝ դուք այդ միջնորդությունը քննարկելու կարիք չունեք, դուք պիտի հիմա արդեն քրեական հետապնդումը դադարեցրած լինեիք, քննարկում եք հարց, թե նիստը հետաձգենք մինչև մյուս երեքշաբթի օրը, թե չէ՞։ Դուք պատկերացնում եք ինչ մասշտաբի օրինախախտում եք անում, դուք ուզում եք, որ ես այդ օրինախախտման անունը կոնկրետ ասեմ, ուզում եք ասեմ, որ արդեն հանցագործության եք մոտենում։ Ես չեմ ուզում դատարանին վիրավորած լինեմ, ոչ թե ձեզ, ձեր հետ խնդիր չէի ունենա, դատարանը չեմ ուզում վիարվորեմ։ Դուք հիմա, փաստորեն, մտադրվել եք քրեական հետապնդումը շարունակել մի հոդվածով, որը գոյություն չունի։ Դուք դա լու՞րջ եք պատրաստվում անել։ Դատախազների հետ արդեն համաձայնեցրե՞լ եք, արդեն սցենար եք նախապատրաստել, թե ոնց եք դա անելու՞։ Պատրաստվում եք 7 օր քրեական հետապնդում շարունակել, որպեսզի հետո էլ դատախազները հնարավորություն ստանան ինչ-որ մեղադրանքներ փոխե՞ն։ Ու դուք պատկերացնում եք, որ դրա տակից կարող եք դուրս գա՞լ»,-ասաց պաշտպան Հայկ Ալումյանը։

Ավելորդ է ինչ որ բան ավելացնելը, ըստ ամենայնի իշխանությունը Հայկ Ալումյանի նախանշած սցենարով էլ կառաջնորդվի, իսկ սա նշանակում է վերջնականապես կողպել հարցերին լուծում տալու իրավական ճանապարհները, իսկ այդ դեպքում միակ ճանապարհը մնում է իշխանությունների նկատմամբ վրեժխնդրությունը, գնդակահարությունը։

Նշենք, որ վարչական դատարանն էլ վարույթ է ընդունել ԶՈՒ ԳՇ պետի առաջին տեղակալ Տիրան Խաչատրյանի հայցն ընդդեմ Պաշտպանության նախարարության, սա էլ նշանակում է, որ իրավաբանորեն Խաչատրյանը մնում է իր պաշտոնին, քանի դեռ դատարանը որոշում չի կայացրել։ Ճիշտ Օնիկ Գասպարյանի պատմությունը։ Կթողնեն Խաչատրյանին շարունակել պաշտոնավարումը, թե նրա նկատմամբ էլ իրավական բեսպրեդելը կկիրառվի, կիմանանք առաջիկա օրերին։

Անի Սահակյան