Ալիևի պահանջը Լավրովի ներկայությամբ՝ հայ գերիների վերադարձի դիմաց

Ռուսաստանի արտգործնախարար Սերգեյ Լավրովը ապրիլի 2-ին, ԱՊՀ անդամ պետությունների դիվանագիտական գերատեսչությունների ղեկավարների հավաքի շրջանակներում, կհանդիպի իր հայ և ադրբեջանցի պաշտոնակիցների հետ։ Այս մասին այսօր հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։

Անդրադառնալով ԱՊՀ արտգործնախարարների հավաքի օրակարգին՝ Զախարովան նշել է, որ դիվանագետները քննարկելու են բոլոր հրատապ տարածաշրջանային և միջազգային խնդիրները։ «Ի թիվս այլ հնարավոր հանդիպումների ԱՊՀ ԱԳՆ ղեկավարների խորհրդի նիստի շրջանակում, նախատեսվում է Ռուսաստանի արտաքին գործերի նախարարի շփումն Ադրբեջանի և Հայաստանի արտաքին գերատեսչությունների ղեկավարների հետ», - ասել է նա:

Իր հերթին Հայաստանում Ռուսաստանի դեսպանը կարծում է, որ Հայաստանի, Ռուսաստանի և Ադրբեջանի արտգործնախարարների հանդիպմանը գերիների վերադարձի թեման կքննարկվի...

Գերիների ու, առհասարակ, պահվող անձանց վերադարձի հարցն առաջնահերթություններից մեկն է այդ թվում Ռուսաստանի, ՌԴ ղեկավարության ու մեր խաղաղապահ անձնակազմի աշխատանքի առումով, այսօր լրագրողների հետ զրույցում ասաց ՀՀ-ում ՌԴ դեսպան Սերգեյ Կոպիրկինը։ «Սա հեշտ լուծվող հարց չէ, բայց աշխատանքները տարվում են և այս ուղղությամբ գրանցվում են որոշակի հաջողություններ», - ասաց դեսպանը՝ պատասխանելով հարցին, թե Ռուսաստանի, Հայաստանի և Ադրբեջանի արտաքին գործերի նախարարների՝ ապրիլի 2-ին կայանալիք հանդիպմանը հնարավո՞ր է գերիների վերադարձի հարցում ինչ-որ տեղաշարժ լինի։
«Համոզված եմ, որ հետագայում ևս կարվի ամեն բան, որպեսզի այս հարցն իսկապես լուծվի ու լուծվի հնարավորինս շուտ։ Մեր դիրքորոշումը դուք գիտեք, ու, իհարկե, ավելի տրամաբանական մոտեցում է բոլորը բոլորի դիմաց փոխանակումը։ Արվում է ամեն հնարավորը, և կարծում եմ՝ այո, հանդիպումների ընթացքում այս թեման ևս կքննարկվի», - ասել է Կոպիրկինը։

Նշենք, որ երեկ Երևանում հանդիպեցին Հայաստանի արտգործնախարարն ու Արցախի նախագահը, որոնք ևս խոսել են գերիների վերադարձի համար ձեռնարկվող քայլերի մասին:

Արցախի նախագահ Արայիկ Հարությունյանն ու Հայաստանի արտաքին գործերի նախարար Արա Այվազյանն հանդիպմանը խոսել են Արցախում ստեղծված հումանիտար և սոցիալ-տնտեսական հիմնախնդիրների լուծման ուղղությամբ ձեռնարկվող քայլերից: Նախագահի աշխատակազմից փոխանցում են, որ նրանք կարևորել են տեղում միջազգային մասնագիտացված կառույցների անխոչընդոտ ներգրավվածությունը:

Հրատապ հասցեագրում պահանջող հումանիտար հարցերի համատեքստում Արայիկ Հարությունյանը և Արա Այվազյանը մտքեր են փոխանակել հայ ռազմագերիների և քաղաքացիական պատանդների հայրենադարձման ուղղությամբ ձեռնարկվող քայլերի շուրջ՝ անընդունելի գնահատելով Ադրբեջանի կողմից այդ խնդրի անհարկի քաղաքականացումը: Ընդգծվել է ադրբեջանա-ղարաբաղյան հակամարտության վերջնական քաղաքական լուծման անհրաժեշտությունը ԵԱՀԿ Մինսկի խմբի համանախագահության հովանու ներքո։ Այդ առնչությամբ շեշտվել է Արցախի ժողովրդի ինքնորոշման և անվտանգության իրավունքների ճանաչման անկյունաքարային դերը հակամարտության արդարացի լուծման համատեքստում:

Հայ ռազմագերիների, պահվող անձանց, իսկ ավելի ճիշտ ալիևյան ռեժիմի կողմից պատանդ պահվող հայերի նկատմամբ, պատերազմի ավարտից շուտով 5 ամիս անց, ցուցաբերվում է հանցագործություն: Ստորագրվել է փաստաթուղթ, որն Ադրբեջանն ուղղակի չի իրականացնում: Հայ ռազմագերիներին Բաքուն հայտարարել է ահաբեկիչ ու հարցը փակել:

Բայց բոլորի համար պարզ է, որ այս հարցը դառնալու է սակարկությունների թեմա՝ թե՛ Հայաստանի, թե՛ Ռուսաստանի հետ բանակցություններում, ու որքան էլ արևմտյան կառույցները պահանջեց Բաքվից վերադարձնել ռազմագերիներին, Ալիևն իր հաշվարկներն ունի:

Լավրովի հետ հանդիպումն իհարկե, կարող է տեղաշարժ արձանագրել: Ռուսական կողմը Հայաստան-Ադրբեջան համաձայնության, այսպես ասած՝ երաշխավոր է, և նրա շահերից ամենևին էլ չի բխում եռակողմ հայտարարության կետերից մեկի չկատարումը: Ի վերջո, դա ռուսական «իմիջի» հարց է նաև:

Ապրիլի 2-ից հետո կերևա, թե ինչ տրամադրություններ են առկա ադրբեջանական կողմի մոտ: Կամ, այսպես ասած՝ ինչ է Ալիևն այս անգամ պահանջելու հայկական կողմից՝ հայ ռազմագերիների վերադարձի դիմաց:

Մետաքսյա Շալունց