ՊՆ-ում «սայլուտը» ներսից են խփելու

Ինչպես հայտնի է Նիկոլ Փաշինյանն Արտակ Դավթյանին առաջարկել է ԶՈՒ ԳՇ պետի պաշտոնում, սա այն նույն Դավթյանն է, որին Նիկոլ Փաշինյանն իր իշխանության օրոք երկու անգամ պաշտոնի է նշանակել ու ազատել աղմկոտ հանգամանքներում եւ նույնպիսի իրավիճակում էլ, փաստորեն նշանակում է ԳՇ պետ: 2018 թվականի հեղափոխությունից հետո Փաշինյանը հայտնի օրենքի փոփոխությամբ, բայց միեւնույն է հակասահմանադրական ճանապարհով ազատվեց Մովսես Հակոբյանից եւ ԳՇ պետ նշանակեց Դավթյանին: 2020 թվականին Փաշինյանը Դավթյանին պաշտոնանկ արեց, երբ վերջինը, անտեսելով արգելքը, համավարակի թեժ շրջանում որդու հարսանիքն էր կազմակերպել եւ բազում հյուրեր հրավիրել:
Հարկ է նշել, որ Դավթյանի ԳՇ պետ աշխատած շրջանում զենք-զինամթերք ձեռք բերելու գործարքների շուրջ քրեական գործ կա հարուցված, եւ Պատրոն Դավիթը կալանավորված է։ Եթե Դավթյանին Փաշինյանը վերադարձնում է իր պաշտոնին, նշանակում է, որ այդ գործարքներն անօրինական չեն, եւ վատ զենք չի մատակարարվել,ուստի պետք է ազատ արձակել Պատրոն Դավիթին, հակառակ դեպքում պետք է մեղադրանք առաջադրվի առաջին հերթին ԳՇ պետին, ապա՝ մատակարարին:
Դավթյանի ԳՇ պետ եղած ժամանակ է կառավարությունը փոխել սպառազինության Սպառազինության ձեռքբերման ռազմական պլանը :Այս մասին նոյեմբերի 19-ին «Հայելի» ակումբում, հրավիրված ասուլիսին ասաց Պաշտպանության նախարարության ռազմական վերահսկողական ծառայության նախկին պետ, Արցախի պաշտպանության նախկին նախարար, ՀՀ զինված ուժերի գլխավոր շտաբի նախկին պետ, գեներալ-գնդապետ Մովսես Հակոբյանը: Նրա խոսքով` 2016 թվականի ապրիլյան պատերազմից հետո ռազմաքաղաքական ղեկավարությունը որոշել է ձեռք բերել այնպիսի սպառազինություն, որը կհամապատասխանի ժամանակի մարտահրավերներին` նոր սերնդի պատերազմին:
ԳՇ պետի պաշտոնից ազատվելուց մեկ ամիս անց Արտակ Դավթյանը նշանակվեց Ռազմարդյունաբերության կոմիտեի նախագահ, իսկ 44-օրյա պատերազմից հետո լքեց այս պաշտոնը: Նույն օրը ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը սուր քննադատեց Արտակ Դավթյանին.«Արտակ Դավթյանի մասին դուք կկարդաք Քննիչ հանձնաժողովի եզրակացության մեջ: Ըստ իս՝ Դավթյանը շատ վատ դերակատարություն է ունեցել 2016թ․պատերազմում՝ որպես օպերատիվ վարչության պետ», ասաց նա լրագրողների հետ հանդիպման ժամանակ: Ինչպես հայտնի է պաշտպանության գործող նախարար Վաղարշակ Հարությունյանը Անդրանիկ Քոչարյանի մտերիմն է եւ նրա լոբինգով է նշանակվել այդ պաշտոնում, բայց դեֆակտո նախարարը ինքը՝ Քոչարյանն է:
Դավթյանի ԳՇ պետ նշանակվելը Անդրանիկ Քոչարյանին զսպող միջոց է դառնալու: Վերջինս ՊՆ մատակարարման ոլորտում մեծ դերակատար էր, հավանաբար դուրս կմղվի այնտեղից: Քանի որ Արտակ Դավթյանն էլ բարյացկամ տրամադրվածություն չունի Քոչարյանի նկատմամբ եւ իրեն ուղղված քննադատություններին ի պատասխան Քոչարյանին տեղն էր նստեցրել.<< Ընդամենը մի կարճ ժամանակամիջոց զբաղեցնելով Պաշտպանության նախարարի առաջին տեղակալի պաշտոնը՝ նա իրեն համարում է խոշոր ռազմական գործիչ, որը քաջատեղյակ է երկրի անվտանգության համակարգից։ Փառք Աստծո, որ ավելի բարձր պաշտոն ՊՆ-ում չունեցավ։ Իսկ որտե՞ղ էր այդ անձը պատերազմական այս օրերին։
Եթե այդքան հզոր ռազմական գործիչ է, ինչո՞ւ չհայտնվեց պատերազմական թեժ կետերից մեկում կամ, լավ, գոնե առաջնագծից 10-15 կմ հեռավորությունից չղեկավարեց մեր զորքի շարժը և իր ռազմական գիտելիքներով և փորձառությամբ չկանխեց նահանջը կամ պարտությունը։ Թող լիներ առաջնագծում, հետևեր, թե ինչպես են ընթանում գործընթացները, ուղղորդեր՝ հաշվի առնելով Ապրիլյան պատերազմի դասերը․ չէ՞ որ Ապրիլյան պատերազմի հանգամանքներն ուսումնասիրող քննիչ հանձնաժողովի նախագահն է։
Հիմա էլ խոսում է թերացումների մասի՞ն։ Ապրիլյանի 4 օրն ուսումնասիրեց մեկ տարի, և ուսումնասիրությունների ավարտից մի քանի ամիս անց էլ հանձնաժողովի աշխատանքի արդյունքները դեռ հրապարակված չեն։ Հետաքրքիր է՝ իսկ ինչքա՞ն ժամանակ անհրաժեշտ կլինի պարոն Քոչարյանին 44 օրվա պատերազմը վերլուծելու համար։
Խորհուրդ կտամ, որ մեծ-մեծ խոսելու փոխարեն՝ պարոն Քոչարյանը ներկայացնի, թե անձամբ ինչ օրենսդրական նախաձեռնություններով է հանդես եկել, որոնք կբարձրացնեին ԶՈւ մարտունակությունը, կնպաստեին մեր երկրի անվտանգության ամրապնդմանը։ Ես նման նախաձեռնություն չեմ հիշում, չկա։ Հիմա հարց եմ տալիս՝ պարո՛ն Քոչարյան, ինչո՞ւ ոչինչ չեք արել Ապրիլյան պատերազում արձանագրված բացթողումները շտկելու համար։ Թե՞ խոսելն ու խանգարելն ավելի հեշտ է, քան գործուն քայլեր անելը>>։
Այնպես որ, ՊՆ-ում շուտով սալյուտը ներսից է խփելու:

Անի Սահակյան