«Լեզուն» կուլ տված Փաշինյանից արդեն ականապատված տարածքների քարտեզ են պահանջում
Պաշտոնական Բաքուն երեկ հրապարակել է հաղորդագրություն, որի համաձայն Ադրբեջանի արտաքին գործերի նախարար Ջեյհուն Բայրամովը փետրվարի 22-ին նամակով դիմել է ՄԱԿ-ի գլխավոր քարտուղար Անտոնիո Գուտերեշին և բողոք է հայտնել այն կապակցությամբ, որ Հայաստանը պատերազմի ավարտից հետո Ադրբեջանին չի փոխանցել ականապատված տարածքների քարտեզները:
Ադրբեջանի արտաքին գերատեսչության մամլո ծառայության փոխանցմամբ, «Հայաստանը հրաժարվում է ճշգրիտ տեղեկություններ հայտնել ականապատված տարածքների մասին, ինչը հակասում է միջազգային մարդասիրական իրավունքի նորմերին»: Ադրբեջանի ԱԳ նախարարությունը հայտնում է, որ պատերազմի ավարտից հետո Բաքվի հսկողության ներքո հայտնված տարածքներում ականների պայթյուններից զոհվել է 15 մարդ, այդ թվում՝ 9 խաղաղ բնակիչ, վնասվածք է ստացել 65 մարդ, այդ թվում՝ 8 խաղաղ բնակիչ:
Ուրեմն, պատերազմի ավարտից, եռակողմ հայտարարության ստորագրումից գրեթե 4 ամիս անց Ադրբեջանն ու Թուրքիան դեռ չեն վերադարձրել հայ ռազմագերիներին, ավելին՝ Ալիևն արդեն հայտարարել է, որ բոլորին վերադարձրել է, իսկ ովքեր մնացել են՝ դրանք ըստ Բաքվի «ահաբեկիչներ» են:
Ու այս սանձարձակ իշխանությունները Հայաստանից ականապատված տարածքներ են պահանջում: Ինչո՞ւ... Ամեն ինչ օրինաչափ է, Հայաստանում Փաշինյանի իշխանության առկայության պայմաններում այսպես էլ պետք է լիներ:
Բանը հասել է նրան, որ մեր գերիներին ամիսներ շարունակ պահում են ադրբեջանական բանտերում, հավանաբար կտտանքների են ենթարկում, սակայն հայկական կողմից ականապատված տարածքների քարտեզներ են պահանջում:
Փաշինյանի «լեզուն» կուլ տված իշխանության հետ՝ հենց այսպես էլ պետք է վարվեին ու շարունակում են վարվեն. պահանջներ են ներկայացնում ու ներկայացնում իրենց ցանկությունները.
Ադրբեջանի «մեծ եղբայր» Թուրքիան էլ իր «գործն» է շարունակում: Տնտեսական համագործակցության կազմակերպության գագաթնաժողովում Թուրքիայի նախագահ Ռեջեփ Թայիփ Էրդողանն անդրադարձել է Ղարաբաղյան հակամարտությանը, ինչպես նաև սադրիչ հայտարարություններ արել Հայաստանում տեղի ունեցող իրադարձությունների վերաբերյալ:
«Հուսով ենք, որ Հայաստանը քայլեր կձեռնարկի դեպի խաղաղություն և կդառնա տարածաշրջանային կայունության մի մասը»,- ասել է նա:
Անդրադառնալով Հայաստանում տեղի ունեցող ներքին իրադարձություններին՝ Էրդողանն ասել է. «Ես ուզում եմ այստեղ կրկնել, որ մենք երբեք չենք կարող և չենք ընդունելու հակաժողովրդավարական միջամտություններ, որոնք հաշվի չեն առնում ժողովրդի կամքը»:
Վերջին մի քանի օրերին արդեն Էրդողանը երկրորդ անգամ է խոսում Հայաստանի ներքաղաքական իրադարձություններից. «Ցանկանում եմ կրկնել, որ մենք երբեք չենք ընդունել և չենք ընդունելու ժողովրդի կամքը առոչինչ համարող հակաժողովրդավարական միջամտությունները»: Նույն Էրդողանը մի քանի օր առաջ էլ էր սադրող հայտարարություն արել Հայաստանի ներքաղաքական իրադարձությունների մասին՝ որակելով դրանք որպես «հեղաշրջման փորձ»։
Սա է Փաշինյանի իշխանության գործունեության շարունակման պտուղը: Թուրքիան ու Ադրբեջանն անթաքույց պահանջներ են ներկայացնում, միաժամանակ ցույց տալով, որ իրենց ձեռնտու է Հայաստանում Փաշինյանի իշխանության առկայությունը, որովհետև նրա՝ «լեզուն» կուլ տված վիճակը խիստ բարենպաստ է թուրք-ադրբեջանական նպատակների համար:
Հետևեք մեզ Viber-ում
