Ամուսնուս չեն ձերբակալել, նա տղայիս հետ Երեւան է գնացել. դատավորի կին.hraparak.am

Ինչպես տեղեկացրել էինք, այսօր ձերբակալվել է Գեղարքունիքի մարզի ընդհանուր իրավասության դատարանի դատավոր Վանիկ Վարդանյանը: Վանիկ Վարդանյանի կինը՝ տիկին Սուսաննան մեզ ասաց, որ իր ամուսնուն չեն ձերբակալել. «Կներեք ձեր հարցերին չենք կարող պատասխանել, իմ ամուսնուն չեն ձերբակալել, նա տղայիս հետ առավոտյան Երեւան է գնացել, ուրիշ բան չունենք ասելու»: Լրատվամիջոցները գրում են ձերբակալության մասին, միթե դո̉ւք տեղյակ չեք, մեր այս հարցին տիկին Սուսաննան պատասխանեց. «Այս պահին ոչինչ չենք կարող ասել, կներեք»: Նշենք, որ  Վանիկ Վարդանյանը ծնվել է 1953 թվականին Կոտայքի մարզի Լեռնանիստ գյուղում, ընդամենը մեկ տարուց պետք է թոշակի գնար։ 1973 թվականից մինչև 1975 թվականը ծառայել է ԽՍՀՄ բանակում։ 1975 թվականից մինչև 1981 թվականը սովորել ԵՊՀ իրավաբանական ‎ֆակուլտետի հեռակա բաժնում։ 1982 թվականից ծառայության է անցել ՀՀ Ոստիկանության համակարգում` նշանակվելով Հրազդանի ՆԳ բաժնի տեղամասային տեսուչի պաշտոնում։ 1991 թվականին նշանակվել է Հրազդանի ՆԳ բաժնի քննչական բաժանմունքի քննիչ, 1992 թվականին՝ նույն բաժնի ավագ քննիչ, իսկ 2006 թվականին՝ ՀՀ Ոստիկանության ՔԳՎ ենթակա ստորաբաժանումների Կոտայքի մարզի քննչական բաժնի հատկապես կարևորագույն գործերով ավագ քննիչ։ 2008 թվականից մինչ օրս աշխատում է Գեղարքունիքի մարզի ընդհանուր իրավասության դատարանի դատավոր։ Նա ամուսնացած է, ունի երկու երեխա։