2,1 մլրդ դրամ՝ պարեկային ոստիկանության համար․ կլինի ավելի բարձր աշխատավարձ

Նախատեսվում է պահուստային ֆոնդից ՀՀ ոստիկանությանը հատկացնել 2 մլրդ 161,6 մլն դրամ պարեկային ոստիկանության ստեղծման նպատակով: Այս մասին Կառավարության հերթական նիստին հայտնեց ՀՀ ոստիկանության պետի տեղակալ Արա Ֆիդանյանը:

Նիկոլ Փաշինյանը նշեց, որ այս որոշումը կապված է պարեկային ոստիկանություն ունենալու նպատակադրման հետ: 

Նա հայտնեց, որ մեկնարկը լինելու է Երևանից, ապա կիրականացվի Շիրակի և Լոռու մարզերում, այնուհետև մնացած բոլոր մարզերում: «Սրանով նոր շունչ և ազդակ կհաղորդվի ընդհանրապես Ոստիկանության բարեփոխումներին, ըստ էության, լինելու են նոր մեքենաներ, նոր դիզայն: Պետք է ասել նաև, որ պարեկային ոստիկանությունում նաև ավելի բարձր աշխատավարձ սահմանելու որոշում ենք կայացրել և հույս ունենք, որ այս գործընթացում ոչ միայն գործող ոստիկանները, այլ նաև քաղաքացիական անձինք որոշում կկայացնեն և այս ծառայության մեջ ներգրավելու քայլ կկատարեն»,-ասաց նա։