Ձեզ քիչ է, պարոն Դարբինյան

Նախկին վարչապետ, Հայ-Ռուսական համալսարանի ռեկտոր Արմեն Դարբինյանը իր երբեմնի կուռքին՝ Նիկոլ Փաշինյանին ուղղված սկանդալային բաց նամակ է հրապարակել:

<<Վերջին ամիսների ընթացքում Ձեր ամենօրյա ազգակործան և պետականաքանդ գործունեությանը զուգահեռ վարչապետի աշխատակազմի և ԿԳՍՄ նախարարության զգալի ուժեր լծել եք Հայ-Ռուսական համալսարանի ռեկտորին պաշտոնանկ անելու անբովանդակ նպատակի իրագործմանը: Համոզվելով սակայն, որ նման տվայտանքները անիմաստ են և անարդյունք, Դուք գնացիք առավել Ձեզ բնորոշ և հարազատ ճանապարհով՝ անձնական օգտագործման ԱԱԾ-ի միջոցով փոխանցեցիք ինձ ռեկտորի հրաժարականի պահանջ:
Միանգամից ասեմ, որ ծիծաղելով մերժում եմ Ձեր այս անհեթեթ պահանջը՝ համարելով սակայն, որ Ձեր հոտառությունը Ձեզ չի դավաճանել. ի դեմս ինձ և իմ համակիրների Դուք ունեք և ապագայում կունենաք ամենաջերմեռանդ քաղաքական հակառակորդներ, և եթե ես երբևիցե որոշեմ հրաժարական տալ, ապա այն կունենա միայն մեկ նպատակ. քաղաքականապես Ձեզ տապալել և քոքահան անել նիկոլիզմը Հայաստանյան քաղաքական ասպարեզից>>։
Արմեն Դարբինյանն ամենեւին զարմանալի չի համարում Նիկոլ Փաշինյանի՝ իրեն ազատելու մտադրությունը:
<<Դուք հանդգնել եք Ձեր թարախակալ հայացքը նետել և անարժան ձեռքը բարձրացնել մեր համալսարանի վրա. այն արժեքները, որոնք դրված են մեր գործուեության հիմքում, տրամագծորեն հակառակ են Ձեր անձի էությանը և հոգեկերթվածքին: Մեր Արժեքներն են. Սերը, Ազատությունը, Արժանապատվությունը, Արդարությունը, Ստեղծարարությունը,
Համերաշխությունը, Իմացությունը և Անձնային աճը: Ձեզ հոգեհարազատ են հակառակ հասկացությունները. ատելությունը, թշնամանքը, բռնաճնշումը, քանդումը, տգիտությունը, խառնակչությունը, սողունությունը: Կա ևս մի պատճառ՝ իմ և իմ գլխավորած համալսարանի նկատմամբ Ձեր թշնամանքի դրսևորման. դա Ձեր հակառուսական էությունն է, որը Դուք երբեք չեք թաքցնի, անգամ Ձեր այժմյան կռացած և վասալային կեցվածքի տակ>>: Դարբինյանը հոխորտում է նաեւ՝ իր պաշտոնանկությունը երբեւիցե թույլ չի տա:
Ամեն ինչ կարելի էր սպասել, բայց ոչ այս մեկը, երբ Արմեն Դարբինյանն ամենավերջին բառերով է բնորոշում իր երբեմնի կուռք Նիկոլ Փաշինյանին՝ <<հիստերիկ եւ անբռնազբոս>> եւ նրա իշխանությունը գնահատում նիկոլիզմ: Այն Դարբինյանը, ով Նիկոլ Փաշինյանի վարչապետ դառնալու առաջին իսկ օրվանից կրնկակոխ քծնում է նրան ու ծափահարում ցանկացած քայլ՝ դատարանների դեմ հակաօրինական արշավից սկսած վերջացևած անգամ Մել Դալուզյանի պաշտպանությունը: Նա երկրորդն էր Նիկոլ Փաշինյանից հետո, ով հայտարարեց, թե ինքն էլ է այլասեռված Մելին վերցնում իր անձնական պաշտպանության ներքո:
Ռոբերտ Քոչարյանի պաշտոնավարման ժամանակ վարչապետ աշխատած, ապա բուհի ռեկտոր նշանակված սույն պարոնը հետաքրքիր է, որ որեւէ անգամ չի բարձրաձայնել, որ համակարգում ինչ-որ բան իր սրտով չէ, անգամ պաշտոնաթողությունից հետո նա չի խոսել նախկիններից, նրանց թալանից, ապօրինություններիս, սխալ քաղաքականությունից եւ այլնից: Այնինչ Փաշինյանի վարչապետ դառնալուց հետո հանկարծ հասկացել էր, թե ինչ թալանչի իշխանություններ ենք ունեցել, խանդավառված էր իշխանափոխությամբ եւ նոր վարչապետով: Վերջինի բառ ու բանով, շարժուձևով, նիստուկացով: Եւ, ահա, ինչպիսի հայտնագործություն՝ վարչապետը զուսպ է եւ հավասարակշիռ:Գրում էր նա իր էջում: Միգուցե պարոն Դարբինյանն անկեղծորեն մտածում է, որ մարդ մի օր կարող է <հիստերիկ> լինել, մյուս օրը՝ զո՞ւսպ, չի լինում այդպես, իսկ եթե կա, ուրեմն ընկալման հարց է: Արմեն Դարբինյանի՝ իշխանությունների վերաբերյալ ընկալումն էլ յուրօրինակ է, իբր փորձում էր էյֆելյան աշտարակի իր բարձունքից երբեմն դիտողություններ, նկատառումներ անել, բայց մեծ հաշվով ռեվերանսներ էր անում գործողներին, հիշեցնում իր տեղը: Իսկ, այ, երբ հերթը հասել է իրեն եւ ինքն է հայտնվել Փաշինյանի թիրախում, վերջինս հիստերիկ է եւ անհավասարակշիռ:
Ինչպես չասել, որ ձեզ քիչ է պարոն Դարբինյան: Հատկապես եթե նկատի ունենանք, որ տիկին Մակունցը ձեր ուսանողներից մեկին էր փորձել ռասկրուտկա անել եւ Թուրքիայի շպիոն դարձնել:

Անի Սահակյան