Սերժ Սարգսյան-Կարեն Կարապետյան. ո՞ւմ կողմն են Ելք-ն ու Ծառուկյան դաշինքը

ԱԺ արտահերթ նիստում Կառավարության ներկայացրած նախագծերի փաթեթի քննարկումը հետաքրքիր ելքով ավարտվեց: Խոսքը ՀՀ կառավարության կառուցվածքի և պետական պաշտոններ զբաղեցնող անձանց վարձատրության մասին օրենքներում   փոփոխություններ կատարելու վերաբերյալ նախագծերի մասին է, որը ԱԺ-ում ներկայացրեց ՀՀ արդարադատության նախարարի առաջին տեղակալ Արթուր Հովհաննիսյանը: Նախագիծը նպատակ ունի Կառավարության կառուցվածքը համապատասխանեցնել սահմանադրական փոփոխություններին: «Համաձայն դրա՝ նախարարների թիվը չպետք է գերազանցի 18-ը: Բացի այդ, այսուհետ չի լինի կառավարության աշխատակազմի ղեկավար-նախարարի պաշտոնը: Այն կփոխարինվի աշխատակազմի ղեկավարի պաշտոնով: Այս փոփոխությանը համահունչ՝ պետական պաշտոն զբաղեցնող անձանց վարձատրության մասին օրենքում ևս փոփոխություն կլինի: Բացի այդ, աշխատավարձի այն գործակիցը, որը պահպանվում է աշխատակազմի ղեկավարի հայեցողական պաշտոնի համար,  կունենա նաև օրենսդիր մարմնի աշխատակազմի ղեկավարը: Նրա գործակիցը կհամապատասխանեցվի կառավարության աշխատակազմի ղեկավարի գործակցին»,- ներկայացրեց ԱՆ փոխնախարարը: Ավելի մատչելի ներկայացնենք հարցը.կառավարության աշխատակազմի ղեկավար-նախարարի պաշտոնը վերացվում է, մնում է միայն աշխատակազմի ղեկավար, սակայն նա ստանալու է նախարարին հավասար աշխատավարձ, ավելի քան 790 հազար դրամ: Որպեսզի համահունչ լինի ԱԺ-ի հետ, կբարձրացվի նաեւ ԱԺ աշխատակազմի ղեկավարի աշխատավարձը. համապատասխանաբար պետք է ավելացվեն նաեւ տեղակալների աշխատավարձերի ինդեքսը, արդյունքում թե՛ կառավարության, թե՛ ԱԺ-ի աշխատակազմերի ղեկավարների տեղակալները կստանան այնքան աշխատավարձ, որքան ՀՀ օրենսդիր մարմնի ներկայացուցիչները՝ պատգամավորները՝ 660 հազար դրամ: Այս փոփոխությունը պատգամավորների շրջանում բուռն վրդովմունք է առաջացրել. ընդդիմադիրներն բացահայտ , իսկ ՀՀԿ-ականները անձնական զրույցներում էին արտահայտում: Հատկապես ակտիվ քննադատում էին «Ելք» խմբակցության պատգամավորները. քարտուղար Գևորգ Գորգիսյանը հարցրեց. «Սա արդարացվա՞ծ է, և արդյոք սա պատգամավորի դերի նվաստացում չէ»: Փոխնախարարը չհամաձայնեց պատգամավորի հետ։ «Փաստորեն, պատգամավորի գործունեությունը հենց հավասարապես այդքան է և ոչ ավել: Կոչ եմ անում դեմ քվեարկել նախագծին»,- ասաց նա: «Ելք» դաշինքի պատգամավոր Էդմոն Մարուքյանն էլ նշեց, որ Կառավարության աշխատակազմի ղեկավարը չպետք է նախարարների աշխատավարձի չափ աշխատավարձ ստանա։ «Չեմ հասկանում ՝ինչու ենք աշխատավարձերի սանդղակն այս կերպով փոփոխության ենթարկում: Հիմա բոլորը պետք է ասեն ՝եթե աշխատակազմի ղեկավարի աշխատավարձը խորհրդականի աշխատավարձի չափ է, բա ինչո՞ւ մնացածինն էլ այդքան չէ»: Սակայն խնդիրն այսքանով կարծես թե չի սահմանափակվում: Նիկոլ Փաշինյանն առավել խորությամբ էր հարցը դիտարկել: Նա իր ելույթում ասաց, որ այս նախագծի էությունից կարելի է եզրահանգել, որ Սերժ Սարգսյանի և Կարեն Կարապետյանի միջև սկսվելու է որոշակի մրցապայքար՝ իշխանությունը ստանձնելու համար.«Քանի որ մամուլում էլ կան տեղեկություններ, որ հենց այս փուլում նախարարների նշանակման հարցում Սերժ Սարգսյանի և Կարեն Կարապետյանի միջև մթնոլորտն այնքան էլ խաղաղ չի եղել, այդ կոնֆլիկտը կենտրոնացել է աշխատակազմի ղեկավարի վրա։ Որովհետև եթե նախարար լիներ, դրա նշանակման հարցում Սերժ Սարգսյանի դերակատարումը պետք է մեծ լիներ, նա պետք է ստորագրեր հրամանագիրը, իսկ վարչապետն այդ պաշտոնում նախընտրում է ունենալ սեփական մարդուն։ Եվ քանի որ հակասություններ են եղել, որոշել են «նախարար» բառը հեռացնել և այս փուլում կնքել զինադադար»,- հայտարարեց նա: Նշված օրենքի նախագծի փաթեթը քվեարկության դրվեց և 58 կողմ, 11 դեմ ձայների հարաբերակցությամբ առաջին ընթերցմամբ ընդունվեց: «Ելք»-ը դեմ քվեարկեց նախագծին, որը խորհրդարան էր ուղարկել կառավարությունը,եւ որով Կարեն Կարապետյանը, փաստորեն, նախարարական լիազորություններ ու կարգավիճակ է սահմանում իր կադրի՝ աշխատակազմի ղեկավարի համար, իսկ Ծառուկյան դաշինքի պատգամավորների մեծ մասը՝ ձեռնպահ, ոմանք էլ չմասնակցեցին քվեարկությանը՝ ըստ էության այս փուլում չեզոք դիրք գրավելով: Անի Սահակյան