Դեմ քվեարկել այս նախագծին. Գևորգ Գեորգիսյան
ՀՀ արդարադատության նախարարի առաջին տեղակալ Արթուր Հովհաննիսյանն այսօր ԱԺ-ում ներկայացրեց «ՀՀ կառավարության կառուցվածքի մասին» ՀՀ օրենքում փոփոխություն կատարելու մասին, «Պետական պաշտոններ զբաղեցնող անձանց վարձատրության մասին» ՀՀ օրենքում փոփոխություններ կատարելու մասին, «Հանրային ծառայության մասին» ՀՀ օրենքում լրացումներ կատարելու մասին, «Տեսչական մարմինների մասին» ՀՀ օրենքում փոփոխություններ կատարելու մասին նախագծերի փաթեթը։ Նա նշեց, որ նախագծերի փաթեթի նպատակն է՝ ՀՀ կառավարության կառուցվածքը համապատասխանեցնել նոր Սահմանադրության փոփոխություններին, համաձայն որի՝ նախարարների թիվը չպետք է գերազանցի 18-ը: Սակայն ՀՀ ԱԺ պատգամավորների և նրա միջև բանավեճ սկսվեց: «Ելք» դաշինքի պատգամավոր Նիկոլ Փաշինյանը նկատեց՝ Սահմանադրության այն դրույթը, որին Հովհաննիսյանը հղում է անում, ուժի մեջ է մտնելու 2018 թվականից, և հասկանալի չէ, թե ինչու են չգործող թեզին համապատասխանեցնում օրենսդրությունը «Ելք» դաշինքի պատգամավոր Գևորգ Գեորգիսյանն էլ նշեց, որ ԱԺ-ի և կառավարության դերերի գերադասման և ստորադասման ճանապարհով են գնում. «Ճիշտ է՝ Սահմանադրությամբ կառավարությունն ունի բացառիկ իրավունք՝ ներկայացնելու կառավարության կազմը, բայց այդ կազմը հաստատում է ԱԺ-ն։ Բացի այդ, այս նախագծով՝ աշխատակազմի ղեկավարի առաջին տեղակալը ստանալու է նույնքան աշխատավարձ, որքան պատգամավորը։ Արդյոք սա արդարացված է, և արդյոք սա նորից պատգամավորի դերի նվաստացում չէ»։ Ա. Հովհաննիսյանն ասաց, որ սա որևէ մեկի դերի նվաստացում չէ։ «Փաստորեն պատգամավորի գործունեությունը գնահատվում է հավասարապես այդքան, ոչ ավելին։ Ես կոչ կանեի ամբողջ ԱԺ-ին՝ դեմ քվեարկել այս նախագծին»,- ասաց Գեորգիսյանը:
Հետևեք մեզ Viber-ում
