Մոսկվայում աճում է փոթորկից զոհվածների թիվը

Մոսկվայում եւ Մերձմոսկվայում նախօրյակին մոլեգնած փոթորկից զոհվածների թիվը հասել է 16-­ի, տեղեկացնում է ՏԱՍՍ­-ը: Մոսկվայի մարզի նահանգապետ Անդրեյ Վորոբյովը հայտարարել է, որ մարզում փոթորկի զոհ է դարձել հինգ մարդ, 34 հոգի հոսպիտալացվել է: «Ընդամենը բուժօգնություն ստանալու համար դիմել է 168 մարդ, 15 հիվանդանոցներ են հասցվել 146 տուժածներ»,­-ասել է նա: Մոսկվայի քաղաքագլուխ Սերգեյ Սուբյանինը հայտարարել է, որ նախնական տվյալներով Մոսկվայում փոթորիկը տապալել է 3,5 հազար ծառ: Վնասվել են 140 բազմահարկ բնակելի շենքերի ու վարչական շենքերի տանիքներ, վնասվածքներ են ստացել 1500­-ից ավելի ավտոմեքենաներ: Փոթորկի հետեւանքները վերացնում են քաղաքային ծառայությունների 35 հազար աշխատակիցներ, ինչպես նաեւ ավելի քան 4,5 հազար միավոր տեխնիկա: