Լավ լուր. Պետությունն անվճար դեղամիջոց կտրամադրի հեպատիտ C-ով հիվանդներին

Հայաստանում հեպատիտ C-ով հազար հիվանդի պետությունն անվճար դեղամիջոց կհատկացնի: Առողջապահության նախարարությունը Վրաստանի գործընկերոջ հետ համագործակցության արդյունքում ձեռք է բերել պրեպարատները: Նշված 1000 հիվանդները, ովքեր կընտրվեն ըստ տարիքի եւ ըստ ծանրության աստիճանի, պետպատվերի շրջանակում կստանան դեղը, իսկ բուժման համար նախատեսված մյուս դեղամիջոցը հիվանդները ձեռք կբերեն բավականին մատչելի գներով: Այսօր Հայելի ակումբում ասաց ՀՀ գլխավոր վարակաբան Արա Ասոյանը: Բժիշկը հայտարարեց, որ լավ նորություն ունեն հեպատիտ C-ով հիվանդների համար. «Մեզ համար երկար ժամանակ լուրջ խնդիր էր հեպատիտ C-ով հիվանդների բուժումը, քանի որ դեղամիջոցները բավական թանկ էին։ Մեր տնտեսական, ֆինանսական վիճակը հաշվի առնելով՝ մեր երկիրը չէր կարողանում այդ հիվանդությունը ներառել պետպատվերով բուժվող հիվանդությունների ցանկում։ Խոսքը մի քանի հազար դոլարանոց դեղերի մասին է։ Այսօր ԱՆ-ն մոտ հազար հիվանդի համար կարողացել է տարբեր հումանիտար աղբյուրներով՝ այդ դեղերը  ներմուծել Հայաստան, և հունիսի 1-ից կսկսվի մոտ հազար հիվանդի բուժումը»։