Տեղի կունենա Հրանտ Դինքի սպանության հարցով կցված գործերի առաջին նիստը

Ստամբուլի հայկական «Ակօս» թերթի փոխանցմամբ՝ Ստամբուլի 14-րդ ծանր հանցագործությունների դատարանը որոշում է կայացրել, որի համաձայն, Հրանտ Դինքի սպանության հարցով կցված գործերի առաջին նիստը տեղի է ունենալու ապրիլի 19-ին։ Վճռաբեկ դատարանի 5-րդ քրեական պալատը որոշում էր կայացրել Հրանտ Դինքի սպանության հիմնական գործին կցել նաև հանրային պաշտոնյաների գործը։ Այս միացյալ գործը քննվելու է Ստամբուլի 14-րդ ծանր հանցագործությունների դատարանում։ Ապա Ստամբուլի 14-րդ ծանր հանցագործությունների դատարանը քննություն է իրականացրել երկու գործերի շուրջ և նախնական զեկույց է կազմել։ Այդ զեկույցի համաձայն՝ որոշում է կայացվել կցված գործերի առաջին նիստն իրականացնել ապրիլի 19, 20, և 21-ին։ Նիստը տեղի է ունենալու Չաղլայանում գտնվող Ստամբուլի արդարադատության պալատի մեծ դահլիճում։ Միաձայն որոշմամբ ձերբակալվածներ Ալի Ֆուաթ Յըլմազերի, Ռամազան Աքյուրեքի, Էրջան Դեմիրի, Մուհիթթին Զենիթի և Օզքան Մումջուի նկատմամբ շարունակվելու է կալանք կիրառվել։ Որոշվել է նաև, որ Ստամբուլի նահանգային ոստիկանությանը գրություն է ներկայացվելու՝ ճշտելու 2004 թվականին «Ակօս» թերթի և Դինքի տան անվտանգության ապահովման համար ինչ միջոցառումներ են իրականացվել, ինչպես նաև հստակեցվելու է 1997 թվականին Ստամբուլի անձնագրային բաժնում Հրանտ Դինքի հետ կապված որևէ գրության առկայությունը, իսկ առկայության դեպքում, պահանջվելու է եղած գրությունը։