2 տարի պատանդ եմ եղել այս պետության ձեռքին.Վոլոդյա Ավետիսյան

Արդեն տեղեկացրել ենք,որ առավոտյան «Վարդաշեն» քրեակատարողական հիմնարկից ազատ արձակվեց  ազատամարտիկ, պահեստազորի գնդապետ Վոլոդյա Ավետիսյանը: Գնդապետը բանտից դուրս եկավ ծաղիկները ձեռքին, որոնք նվիրեց իրեն դիմավորելու եկած կանաց եւ աղջիկներին, լրագրողներին: «Իմ աճեցրած վարդեն են»,-ասաց: Վոլոդյա Ավետիսյանին դիմավորելու էին եկել մարտական ընկերները, ընտանիքի անդամներն ու հարազատները, որոնք ավելի ուշ հասան, քան գնդապետը դուրս կգար ՔԿՀ-ից: Պապին դիմավորելու էր եկել նաեւ թոռնիկը՛ Վոլոդյան, ով ծնվել է նրա կալանավորվելուց հետո: Ներկաները հուզվեցին նրանց հանդիպման տեսարանից: Գնդապետը  կարծում է, որ ազատազրկումը իր համար պատիժ էր գործած մեղքերի համար: Իսկ գործած մեղքեր նա համարում է Հանրապետական կուսակցությանը նախագահական ընտրություններում օժանդակելը: Վոլոդյա Ավետիսյանը հայտարարեց, որ շարունակելու է իր պայքարը՝ այս անգամ հանուն դատապարտյալների իրավունքների պաշտպանության, քանի որ, նրա կարծիքով, դատապարտյալների համար օրենքը հավասար չի գործում: «2 տարի պատանդ եմ եղել այս պետության ձեռքին, քանի որ եթե համաներումը եւ վաղաժամկետ ազատման իրավունքը կիրառվեր, երկու տարի առաջ ազատության մեջ կլինեի» ,-հայտարարեց Վոլոդյա Ավետիսյանը: Հիշեցնենք, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը Վոլոդյա Ավետիսյանին դատապարտել էր 6 տարի 6 ամիս ազատազրկման: Վոլոդյա Ավետիսյանը մեղադրվում է խարդախության մեջ: Մեղադրանքն առաջադրվել էր այն փուլում, երբ Վոլոդյա Ավետիսյանը ազատամարտիկների հետ Ազատության հրապարակում հանրահավաքներ էր անցկացրել: -