Դավաճանություն պատերազմի ժամանակ

2021 թվականի պետական բյուջեով պարգևատրումների համար նախատեսված է 18 միլիարդ 825 միլիոն դրամ՝ չհաշված քաղծառայողների համար նախատեսվածը, իսկ այս ցուցանիշը 21 և ավելի տոկոսով գերազանցում է նախորդ տարվանը: Այս մասին 2021 թվականի բյուջեի նախագծի քննարկման ժամանակ, նշել է Ֆինանսների նախարար Ատոմ Ջանջուղազյանը; Ի պատասխան` «Լուսավոր Հայաստան» խմբակցության պատգամավոր Արկադի Խաչատրյանի հարցի, թե
նոր իրողություններով պայմանավորված՝ Կառավարությունն արդյո՞ք մտադիր է վերանայել պարգևատրումները, թե՞ այս թիվը նույնությամբ մնալու է,
նախարար Ջանջուղազյանն ասել է. «Մենք բազմիցս առիթ ունեցել ենք այդ հարցին անդրադառնալու․անվանումը, դժվար է ասել, որ արտահայտում է բովանդակությունը, որովհետև մենք, ըստ էության, այս լուծումը ներկայացրել ենք՝ որպես միջանկյալ այնքան ժամանակ, քանի դեռ պետական կառավարման համակարգի բարեփոխումը չի հասել իր տրամաբանական ավարտին և չի գտնվել լուծումը ծանրաբեռնվածության բաշխման և աշխատանքի վարձատրության համարժեք համակարգի, իսկ մինչ այդ սա ժամանակավոր լուծում է»։
Պատգամավորի ճշտող հարցին՝ փաստորեն պարգևավճարների մասով փոփոխություն չե՞նք կարող ակնկալել, և նշված թիվը փոփոխման ենթակա չէ՞, Ատոմ Ջանջուղազյանը պարզաբանել է․ «Համենայնդեպս, ներկայացված նախագիծն այնպիսին է, ինչպիսին կա և որևէ ուղղությամբ որևէ փոփոխության մասին խոսքը, կարծում եմ, ժամանակավրեպ է»։
Ինչպես ասում են` մեկնաբանություններն ավելորդ են: Մենք պատերազմի մեջ ենք, ամեն օր համայն հայությունից գումար ենք խնդրում, արձանագրում ենք, որ բանակի սպառազինության հարցը օրհասական է, այլապես մենք ազգովի երկրորդ անգամ ցեղասպանության ենք ենթարկվելու, իշխանությունը սեփական պերմիաների ֆոնդն է ավելացնում: Փաստորեն, թավշյա իշխանությունը չի ուզում աշխատել առանց պրեմիաների: Մարդիկ չէին տեսել պատից կախ, հանկարծ տեսան ճակտից կախ. բա թե պարգևավճարն աշխատավարձի մաս է կազմում: Ներողություն, որտեղ է նման բան գրված: Եթե իշխանավորները գտնում են, որ իրենք ավելի շատ են աշխատում, քան օրենքով նախատեսված աշխատավարձն է, ապա ոչ ոք իրենց ձեռքը չի բռնել` թող դիմում գրեն հեռանան: Ինչ վերաբերում է արժանապատիվ վարձատրության և պարգևատրման իրավունքին. հարգելի իշխանավորներ, հնարավոր է, որ պետական կառավարման համակարգում աշխատելը բարդ ու դժվար գործ է: Բայց հավատացեք, որ մարտի դաշտում կռվելն ավելի դժվար է: Հիշեք պատերազմում զոհված 1170 հերոսներին, ներկա գտնվեք նրանց հոգեհանգիստներին, այցելեք եռաբլուր, գնացեք հիվանդանոցներ, նայեք վիրավորված հազարավոր տղաներին, նրանց, որ առողջություն ու կյանք են տվել երկրին: Նայեք ու վերջապես հասկացեք, որ ձեր պրեմիան դուք արդեն ստացել եք, որովհետև նրանք չկան, իսկ դուք ապրում եք իրենց հաշվին, որովհետև նրանք ոտք, ձեռք, տեսողություն, լսողություն, կենսական կարևոր օրգաններ են կորցրել, իսկ դուք քայլում եք, լսում, ապրում եք առողջ, հաշմանդամ չեք և դա ամենամեծ պարգևատրումն է, որ ստացել եք: Փաստորեն, տղաները պատրաստ են առանց փողի մեռնել հայրենիքի համար, որi մի մասնիկն էլ դուք եք, իսկ դուք առանց պրեմիայի աշխատել չեք կարող: Կառավարությունը պաշտոնյաների պարգևատրման ֆոնդն ավելացրել է 21 տոկոսով, իսկ պաշտպանության ծախսերն ընդամենը 1,3 տոկոսվ:
Սա խրախճանք չէ ժանտախտի ժամին, սա դավաճանություն է պատերազմի ժամանակ:2021 թվականի բյուջեն այս նախագծով չի կարող ընդունվել:

Հայկ Դավթյան