«Ադրբեջանում տասնյակներով սպաների են ձերբակալում և ոչնչացնում». Հրանտ Մելիք-Շահնազարյան
« Ադրբեջանը երբեք չի ճանաչի Արցախի անկախությունը, և հայկական կողմն էլ, ըստ նրա՝ տարածքային զիջումներ չի անի Ադրբեջանին:Որքան էլ պաշտոնապես հայտարարենք, որ պատրաստ ենք տարածքային զիջումների գնալ և ստանալ Արցախի անկախությունը, դա կյանքի կոչելու մեխանիզմներ չկան»,-լրագրողների հետ հանդիպմանը նման տեսակետ հայտնեց քաղաքագետ Հրանտ Մելիք-Շահնազարյանը։ Անդրադառնալով ԵԱՀԿ ՄԽ համանախագահների հասցեական՝ Ադրբեջանին դատապարտող հայտարարությանը, նա նշեց. «Նման հայտարարություն առաջին անգամ չի արվում:Ուզում եմ հիշեցնել 2015թ. հունվարի նախադեպը, երբ Կրակովի հանդիպումից հետո Ադրբեջանի արտգործնախարարին կոչ արեցին, որ Ադրբեջանը հետևողական լինի իր ստանձնած պարտավորությունների կատարման հարցում։ Շատ ավելի շահեկան կլինի, երբ նմանատիպ հայտարարությունները կողք կողքի դնենք և ոչ թե՝ որպես սենսացիոն ձեռքբերում ներկայացնենք, այլ՝ որպես օրինաչափություն։ Սա վկայում է այն մասին, որ ՄԽ-ն որոշ չափով վերանայում է իր դիրքորոշումները, մոտեցումները»։ «Պատերազմով սպառնացող Ադրբեջանի Զինված ուժերում լուրջ խնդիրներ կան, այնտեղ տասնյակներով սպաների են ձերբակալում և ոչնչացնում՝ առանց դատ-դատաստանի։ Սա խոսում է իրենց Զինված ուժերի բարոյահոգեբանական վիճակի մասին, նրանց պատրաստվածության մասին, և առիթ տալիս ենթադրելու, որ նման Զինված ուժերով ու նման խնդիրներ կուտակած բանակով Ադրբեջանն այս պահին չի կարող պատերազմ սկսել, որքան էլ դա նրանց հետաքրքրության շրջանակներում լինի»,-հայտնեց քաղաքագետը:
Հետևեք մեզ Viber-ում
